Read tharaka 2 TIMOTHEO 2 Bible Online

2 TIMOTHEO 2 - tharaka bible

2 TIMOTHEO 2

¹Îndî woû, mwana wakwa, îgua ûûmîîrîîtie n'ûntû bwa ûtugi bûra bwonekaga kîrî Kîrîstû Yiesû.

²Îthûkia mantû mara monthe weegiirue nkîrutana mbere ya akûûyî baingî mûno, wîre mo bara wîtîgîîtie n'eetîgua, bara bakaûmba kûrutana bangî na bo.

³Îtîgîîria wana woû ûnyamaaranîrue amwe na eetîgîri bara bangî ûrî ta mûcikaarî ûmwega wa Kîrîstû Yiesû.

⁴Mûcikaarî natiganaga na mûtûûrîre wa kîra ntugû kaingo aûmba gûkenia mûnene wake.

⁵Na mûcindani atiûmba gûcinda eewa kîewa, nwanga akathingata bûra watho bwa macindano buugîîte.

⁶Na mûrîmi ûra arutîîte ngûgî aarîma na inya mûno n'we abatîîrue arîa maketha arî wa mbere.

⁷Îthûgaanîria bwega mantû mama ngûkwîra n'ûntû i Mwathani agaakûûmbithia gûciûkîrwa i mo monthe.

⁸Ririkanaga atî i Yiesû Kîrîstû ûra Ngai aariûkiirie arî ûmûkuû wa rûrîîyo rwa mûnene Ndaundi, wata bûra ntûmagîîria nthetooni îmbega.

⁹Na n'ûntû bwa gûtûmîîria ntheto îmbega, i kîo gîgûtûma nnyamaara ûûgû mwanka nkathaîkwa taka kûrî watho mbunîîte. Îndî amwe na ûgu kiugo kîa Ngai gîtithaîkîka.

¹⁰Kwoogu i ntûma mbûmagîîria mathîîna monthe, nkîthangîkagîra bara Ngai athuurîîte, kaingo wana bo boona wonokio bûra bûrî kîrî Kîrîstû Yiesû, bûra bûreetaga mwago wa tene na tene.

¹¹Kiugo gîkî i gîa gwîtîgîka atî, “Ûkaaya kwîgua itwakuyanîîrie amwe na Kîrîstû, tûgaatûûra amwe n'we.

¹²Weegua tûkaathi na mbere na kûûmîîria, tûkaathana amwe n'we. Twauga tûtimwiyî, wana we akauga atitwiyî.

¹³Twarega gûtuîka eetîgua, agaatûûra arî mwîtîgua, n'ûntû we atiûmba gûkaana mîgambo yake.”

¹⁴Kwoogu kara ûkîririkanagia antû ba kwenu mantû mama. Bakaanie Ngai akîîgagua ûbeere batigaaturanîrie mîgambo mbaara n'ûntû gûtiteethia nwa mbi. I kwînyangia kwînyangagia wîtîgio bwa bara beegagua bathikîîrîîtie.

¹⁵Ûmia buru mwanka wone ûgeetîgîîrîka meethooni ma Ngai ûrî mûruti ngûgî wa Kîrîstû, ûra atarutaga ngûgî yake na njîra îrî îgi, ûra arutanaga kiugo kîa Ngai kîa mma na njîra îra yagîrîte.

¹⁶Regana na ndwaria ira itarî cia kîîngai na cia waa n'ûntû nitûmaga antû batororeria gûtuîka aregi aathîkîri Ngai.

¹⁷Ndwaria ta inu ikari ta kîronda kîa mûteneka. Ngerekano ya bara barî rwaria ta rûru n'Umenaias na Biretas.

¹⁸Antû baba baangaratanîîte mûno, baatiga kûthingata ûmma, baatua kûgiitaria wîtîgio bwa eetîgîri bamwe bakîbarutanaga kûriûka igwakûrûkire.

¹⁹Îndî na bu ûmma bwa Ngai bûtienyenyeka n'ûntû i mma tûrî na rwano rwa kwonania tûrî ba Ngai wata bûra *Maandîko Maatheru maugîîte, “Ngai naiyî antû bara barî baake,” na “Muntû ûra augaga n'wa Mwathani nwa mwanka atigane na meeyia.”

²⁰Ndeni ya nyomba ya mûciî ûmûnene, ikwîgagua kûrî na into biingî bia kîrugîro, bia mîthemba na mîthemba. Bimwe bia into bibu biîgagua birî bia thaabu, bingî i bia fetha, bingî i bia gûcaa na bingî i bia yûmba. Kîrî into bibu bimwe i bia gûtûmîka kagiita mwanya. Na bira bingî na bio i bia gûtûmîka woogu, rîonthe.

²¹Muntû akaaya kwîtheria nkorooni yake akarekana na mantû maathûûku ta mamu, we i ta into bia gûtûmîka kagiita mwanya, n'ûntû neethereetie. Na kwoogu arî na gîtûmi kîrî mûnene wake. Agaakaraga eethuuranîrîte atûmîka kîrî ngûgî îmbega yonthe.

²²Ûtikaareke wîrirîîria bwa wîthî bwaku bûgûtanga. Woû amwe na bara barombaga Ngai bamwîtîgîîtie na mma, cûûgagiani na inya bûkarage bwîbagîrithîîtie nkorooni cienu na bwîtîgîîtie, bûkîendanaga, na bûrî na ûkiri na antû bara bangî.

²³Ûtigaate thaa ûgîturania mbaara cia waa, mbaara cia ûtaku, n'ûntû nwiyî ndwaria ta inu i cio ireetaga matheta.

²⁴Mûruti ngûgî wa Mwathani atibatîîrue athetania. Abatîîrue oonia antû bonthe ûbooreeru, arî mwarimû ûmwega na ûûmagîîria,

²⁵agîkaanagia bara bakûthûgaania mwanya n'we eenyiîtie n'ûntû kwaûmbîka Ngai akaa antû babu kaanya ga kwîrira bakamenya ûmma.

²⁶Rîru i rîo mathûgaania maao makaabacookera kaîrî baûmbe kuuma mûtegooni ûra Nkoma arabagwete na uu, aatûma barûtha kwenda gwake.