Read tharaka 2 TIMOTHEO 4 Bible Online

2 TIMOTHEO 4 - tharaka bible

2 TIMOTHEO 4

¹Ndîkwîra ngîgûkinyagîîria, Ngai akîîgagua barî na Kîrîstû Yiesû ûra akaagambithia antû bonthe, bara bakuû na bara ûkeegua tûrî mwoyo, na n'ûntû akaaya kwathana arî mûnene.

²Tûmagîîria kiugo kîa Mwathani ûgîkinyagîîria antû, kagiita karî keega kana gatarî keega. Rutaga antû mabîtia, bakaanagie, na beekagîre wîru ûrî na kûûmîîria ûkîbarutana mantû mamu monthe.

³Kagiita gagaakinya antû batige kwenda kwîgua ûrutani bûra bûrî bwa mma, beende kwîgagua ûrutani bûngî bwa mwanya kûringana na bûra wîrirîîria bwao bûkari. Bakeethîrania mûkwîrî wa aarimû ba kûbarutana mantû mara beendeete kwîgua.

⁴Bakaarega kwenda kwîgua ûmma, beenganage na ngono cia ûrongo.

⁵Îndî woû nwa mwanka ûkarage wîthuuranîrîte kagiita konthe, winyîkîrîtie ûnyamaarue, naawe ûrute ngûgî ya gûtûmîîria ntheto îmbega, kaingo wingia kûrû ngûgî yaku.

⁶Aakwa niû kagiita i ta gaakinyu gakûrutwa kîgongwana nkue mbûtige,

⁷n'ûntû mwanka agu îîndî indûîte ndûa îmbega na inya yakwa yonthe wandûmîîrîîte wîtîgio.

⁸Îîndi kîewa kîa nthûmbî ya ûnene, nthûmbî ya wagîru, ikîmbeteereete n'ûntû bwa kûûmbana. I kîo kîewa kîra nkeewa i Mwathani, Mûgambithania ûmwagîru rîra ntugû îgaakinya. Ti ninka akaa kîewa gîku. Akaa wana bara bangî bonthe bamweteereete na wîrû acooka.

⁹Cûûgia bûra kûûmbîka ûûye na mpwî.

¹⁰Ndemas neendire mantû ma nthîgûrû îno na kûthi aathi bwa Thesaronike, aantiga. Kîresikes aathiire bwa Garatia na Tito n'we aathiire bwa Ndaramatia.

¹¹I Ruka wenka akî twatigirwe n'we. Wakara kûûya bûûye na Maariko n'ûntû anteethia mûno ngûgîîni.

¹²Indatûmire Tikikas Ebeeso.

¹³Ûnthûkîrie kabuuti gaakwa kara ndatigire Tiroas karî na Karipas, ûndeetere ko. Kaîrî ûtikaariganîrue i kûndeetera mabuku maakwa, na mûno mûno, mara ma ndwara.

¹⁴Aregisanda ûra mûturi nanthûûkiirie mûno. Îndî i Mwathani akaamûûria n'ûntû bwa mantû mara aandûthîîre.

¹⁵Îmenyeere mûno îgûrû rîake n'ûntû nareganaga na ntûmwa yetû.

¹⁶Gûtirî we aantheteera îgiita rîra rîa mbere nkwirwa kootiini. Bonthe ibaankuthûkire baathi, baantiga ninka. Inkûromba Ngai atikaabarîyie n'ûntû bwa ûgu baarûthire!

¹⁷Îndî Mwathani we naarî amwe naani, ampa inya ndaûmba gûtûmîîria ntûmwa ya ntheto îmbega yonthe kîrî antû bonthe ba nthîgûrû ingî beegua, aambonokia mbere ya ntuîrwa kûûragwa.

¹⁸Mwathani agankûûra ûntûûni bûûthûûku bunthe ankinyithie bwega ûneneeni bwake bwa îgûrû. Mwathani arookumagua tene na tene. Aameni.

¹⁹Nkeetheria Pirisiira, Akuira na antû bonthe ba mûciî wa Onesiporas.

²⁰Erastas aatigirwe Korintho. Na Tirobimas ndaamûtigire Miritas arî mwayie.

²¹Cûûgia bûra ûûmba ûûye mbere ya kagiita ga mpîo gakinya. Iburas, Pundes, Rinas, Kiraundia na eetîgîri ba naaga bonthe bagûgûkeethia.

²²Mwathani nakarie nkoro yaku. Ûtugi bûrookaraga naabi.