Read tharaka TITO 1 Bible Online

TITO 1 - tharaka bible

TITO 1

¹I niû Paûrû, mûruti ngûgî ya Ngai na mûtûmwa wa Yiesû Kîrîstû ngûkwandîkîra. Ndatuîkithiirue mûtûmwa nteethia kûrikithia wîtîgio bwa bara Ngai athuurîîte, na mbamenyithia ûmma bungwa bwa kîîngai

²bûra bûrî wîrîgîîrooni bwa kwewa mwoyo wa tene na tene. Karaaya mûno Ngai ûra atarongwaga naatwere wîrane bwa mwoyo ûyû

³na rîra kagiita kara kaagîrîte gaakinyire naagwûranîîre ûntû bûbû ntûmwaani yake îra mpetwe na watho i Ngai Mwonokia wetû mmîtûmagîîria.

⁴Nkwandîkîrîte woû Tito, mwana wakwa wengwa ndeni ya wîtîgio bûra twinthe tûrî na bu. Ngai Baaba na Kîrîstû Yiesû Mwonokia wetû barookwaa ûtugi na ûkiri.

⁵Ndagûtigire Kiriti kaingo ûrûngaria mantû mara mataarî makûrûnga njîra bwega na ûtaara akûrû ba kanica, ba wakîra taûni wata bûra ndakwîrîîte.

⁶Nwa mwanka mûkûrû wa kanica eegue arî na riîtwa rîega, mûrûme wa mûka ûmwe weegua agûreene, na nwa mwanka weegua arî na aana beegue barî aana eetîgîri. T'aana ndagi kana batarî aathîki.

⁷Na n'ûntû mûtongoria wa kanica i mûrûngamîîri wa ngûgî ya Ngai, nwa mwanka eegue arî muntû arî na riîtwa rîega. Ti muntû wa kwîbûkagîîria kana wa kûthûûrangaga na mpwî. Atikeegue arî muntû wa ntogoona, kana arî muntû aûmba kûringana, kana wa kwîrirîîria ûtonga.

⁸Mûtongoria wa kanica nwa mwanka eegue arî muntû wa nkoro ya kwenda kûgwataga antû ûgeni na wa kwendaga mantû meega. Nwa mwanka eegue arî muntû arî na ûtombo bûûkûrû. Nwa mwanka eegue arî muntû ûmwagîru na ûmûtheru nkoro. Na nwa mwanka eegue atarî muntû wa kwathagwa i mwîrî wake.

⁹Nwa mwanka eegue arikîîtie ntûmwa îra îrî ya gwîtîgîka, îra îgwatanagîra na ûrutani bwetû. Na gîtûmi i kaingo aûmba gwîkîra antû wîru na ûrutani bûra bûrî bwa gwîtîgîka, na kaingo akoonagia bara batagwatanagîra na ûrutani bwa mma mabîtia maao.

¹⁰Antû baingî ibakûregana na ûrutani bûra tûrutanaga. I bo bagûta bara bangî na ndwaria ciao cia ûtaku. Na mûno mûno, i bara baugaga eetîgîri bataanwe kûringana na wîthîre bwa Ayaundi.

¹¹Antû baba nwa mwanka beerwe batige n'ûntû ibaindiganîîtie antû ba mîciî îmingî bakîrutanaga mantû mara batabatîîrue barutana. Na barîrûtha ûgu kûringana na wîrirîîria bûra barî na bu bwa kwenda ûtonga.

¹²Na wabu ûmwe wa iroria biao naugire bûra bakari. Atî, “Antû beetû ba Kiriti n'arongo mûno. I bûmwe na nyamû na n'ithao na n'wabu beendeete kûrîa!”

¹³Na wabu ûkûûyî bûbu bwa kîroria gîku kîaugire ûgu n'ûmma. Kwoogu bakaanie ûtarî na mathee kaingo beegua barî na wîtîgio bwa mma,

¹⁴batigane na ngono cia Kîîyaundi cia ûrongo na barege kûrûthaga mantû mara bakwîrwa barûthage n'antû bara bagarûrîîte ûmma.

¹⁵Bara bo bathereetue nkoro boonaga bionthe birî biitheru.[1] Îndî bara beetankîîte na meeyia na bateetîgagia, gûtirî bu bwao bûtheru n'ûntû mathûgaania maao i maindiganu. Batiiyî i bûrîkû bwega kana i bûrîkû bûthûûku.

¹⁶Baugaga ibaiyî Ngai, îndî mantû mara barûthaga matigwatanagîra na ûntû bûbu. N'antû baathûûku mûno, aregi kwathîkîra Ngai na gûtirî ûntû bwega baûmba kûrûtha.