Read tharaka TITO 2 Bible Online

TITO 2 - tharaka bible

TITO 2

¹Îndî woû, rutanaga antû mantû mara makûgwatanîra na ûrutani bwa mma.

²Îraga akûrû beemenyagîîre, bathûgaanagie bwega na beegue barî ûûme. Nwa mwanka barikie wîtîgio, wendo, na kûûmîîria.

³Îra kinya eekûrû bara bakûrû wana bo bakarage rîonthe barî eekûrû ba mîkarîre îmîtheru. Na ti bakaraga bagîtuuyanagîîra ûrongo kana beegua barî nkombo cia ncoobi. Nwa mwanka kinya bo barutanage mantû meega,

⁴i kaingo baûmba gûtûma eekûrû bara beethî beendaga arûme baao na aana baao.

⁵Nwa mwanka beegue barî na ûtombo bûûkûrû, nwa mwanka beegue barî baagîru, nwa mwanka beegue bakîûmba kûruta ngûgî ciao cia mîciî bakîînyiagia kîrî arûme baao kaingo gûtooneka muntû acambia ntûmwa ya Ngai.

⁶Wana kinya aana beethî ba antû arûme bakaanie ûbeere barûthage mantû na njîra îra yagîrîte.

⁷Tuîka ngerekano îmbega mantûûni monthe. Tuîka wa mma ûrutaniini bwaku na ûtigeekîre mathee.

⁸Îndî amwe noogu tûmagîra mîgambo îra yagîrîte kaingo anthû baaku beegua nthoni, baaga ûntû bûûthûûku bwa gûtûgwetanîria na bu.

⁹Nkombo na cio ibatîîrue ciînyiagia kîrî anene ba cio na ibakenagia na mantû monthe. Gûtiagîrîte nkombo îcookagia mûnene wa yo mîgambo,

¹⁰kana îmwiya. Îndî kwagîrîte warîonthe nkombo yonanagia nwa îîtîgîke mantûûni monthe, kaingo antû batîîya ûrutani bwa Ngai Mwonokia wetû kuumania na mantû monthe mara barûthaga.

¹¹Twagîrîtwe tûrûthaga mantû mama n'ûntû Ngai aagwûrire ûtugi bwake n'ûntû bwa wonokio bwa antû bonthe.

¹²Gûkûrûkîîra kîrî ûtugi bwake, Ngai atûrutanaga kûrega wîyia na wîrirîîria bunthe bwa kîînthîgûrû. Tûrûthaga mantû na njîra îra yagîrîte, tûtûûraga tûrî baagîru, na tûrî ba mûtûûrîre wa kîîngai îgiita rîrî tûrî îgûrû rîa nthîgûrû îno,

¹³tweteereete ntugû îra nthaarime twîrîgîîrîîte. Ntugû înu i rîo tûkoona mwago wa Ngai wetû ûra mûnene na wa Mwonokia wetû Yiesû Kîrîstû.[2]

¹⁴Kîrîstû eerutire n'ûntû bwetû atûkûûra kuuma meeyiani ma mîthemba yonthe, atûtheria twatuîka baake wenka, na atûtuîkithia antû barî na wendo bwa kwenda mantû meega.

¹⁵Kwoogu îrutanaga antû mantû mama ûgîtûmagîra watho bunthe bûra ûrî na bu rîra ûkûbeekîra inya kana ûkûbakaania. Ûtikaareke muntû akûbûthîîria.