Read tharaka TITO 3 Bible Online

TITO 3 - tharaka bible

TITO 3

¹Îririkanagia antû kwînyiagia kîrî anene na kîrî bonthe bara barî na watho bwa kwathana, babaathîkagîre, na bakarage magiita monthe baûmba kûrûtha mantû meega.

²Beere muntû atikaarie mantû maathûûku îgûrû rîa ûra ûngî. Ibatûûranie na ûkiri bakîîganagua kîao, na boonanagie kwînyithia kîrî woora muntû.

³Wana tiû kûrî rîra twarî baataku. Twaregaga kwathîka tweneereetue i mantû ma nthîgûrû îno na mawîrirîîria ma mîthemba yonthe matûgwete ûkombo. Twatûûraga tûrî antû ba ntheto na ba rûriitho. Antû batûmena naati tûkabamena woogu batwonia.

⁴Îndî rîra Ngai Mwonokia wetû aarîkiirie na gûtûgwûrîra kîao na wendo bwake,

⁵naatwonokiirie. Ataatwonokia n'ûntû bwa ûntû bwega bûra twarorûtha. I kîao aatwîgiirue atwonokia na njîra ya kûthambua îciarwa rîa maîrî, atûgarûra na njîra ya Kîrundu Ûmûtheru.

⁶Ngai naatwîndamîîrie Kîrundu Ûmûtheru wa kûgana gûkûrûkîîra kîrî Yiesû Kîrîstû Mwonokia wetû,

⁷kaingo kuumania na ûtugi bwa Ngai atwona tûrî baagîru kîrî we na atwa rûgai rwa mwoyo wa tene na tene ûra twîrîgîîrîîte.

⁸Na wabu kiugo gîku i gîa gwîtîgîka. Ndîenda ûkinyîîria antû mantû mamu, kaingo bara beetîgîîtie Ngai beegua barî na wendo bwa kwîruta kûrûtha mantû meega, n'ûntû i meega na marî baita kîrî muntû wonthe.

⁹Ûtigeetîgîîrie gûturania mbaara cia ûtaku, kûthingatanagîîra ndîîyo, kana ûthetania na antû bûgîkararanîria bûra *watho buugîîte. Mamu i mantû ma ûtheri mûno na matirî baita.

¹⁰Ûkaaya kwona muntû akûgaania antû, mûkaanie rîa mbere na rîa maîrî. Akaaya kûrema bûtikeende kûgwatanîra n'we.

¹¹Menya muntû ta ûyu gûtirî nkarari nakwîyia na naûrîîte. Ûgu akûrûtha ibûkwonania nabîtîîtie.

¹²Rîra ngaatûma Aritemas kana Tikikas baaya, geria bûra kûûmbîka ûûye taûni ya Nikoporis ûmbone n'ûntû mbangîîte nkare noogo mwanka îgiita rîa mpîo rîthire.

¹³Na kaîrî, tûma Cenas ûra mûgambi na Apooras na mpwî, na wone barî na bionthe bira bakwenda.

¹⁴Nwa mwanka antû beetû beerutane kwîruta kûrûthaga mantû meega kaingo baingia moobatu. Batibatîîrue bakaraga woogu mana.

¹⁵Thûkia nkeethi cia bonthe bara tûrî na bo. Na tûkeetherie acoore beetû ndeni ya wîtîgio. Ûtugi bwa Ngai wetû bûrookaraga naabi bwinthe.