Read tharaka PIREMONI 1 Bible Online

PIREMONI 1 - tharaka bible

PIREMONI 1

¹I niû Paûrû ngûkwandîkîra baarûa îno ndî nceera n'ûntû bwa Kîrîstû Yiesû. Ndîkwandîkîra tûrî amwe na mûruayia Timotheo, woû Piremoni mwendwa wetû na mûruti ngûgî îmwe naati,

²mwarayia Abiya, Arikipas ûmwe wa njûûrî yetû na antû bonthe ba kanica bara barîîkanaga agu mûciî waku.

³Ngai Baaba wetû na Mwathani Yiesû Kîrîstû baroobwaa ûtugi na ûkiri.

⁴Rîra nkûririkanaga marombaani maakwa rîonthe incookagîria Ngai wakwa nkaatho

⁵n'ûntû imbîgagua bûra wîtîgio bwaku bûgana kîrî Mwathani Yiesû, na wendo bwaku kîrî antû bonthe ba Ngai.

⁶Îromba rîakwa n'atî ngwatanîro îra tûrî n'yo wîtîgioni bwetû îkoongeera gûciûkîrwa gwa ûntû bwega bunthe bûra tûrî na bu ndeni ya Kîrîstû.

⁷Wendo bwaku, mûruayia, ibûtûmîîte nkena mûno na bwambîkîra wîru mûno ndaririkana bûra ûbooreereetie nkoro cia antû ba Ngai.

⁸Na kinya ûkeegua n'ûntû bwa Kîrîstû ndî na ûcamba bwa gûkwîra ûrûthe bûra ûbatîîrue ûrûtha,

⁹n'ûntû bwa wendo ndîona i kaaba nkûûrîîtie kwa wendi bwaku ûrûthe bûra nkwenda. Kaîrî ririkana ndî mûkûrû na îîndî ndî nceera n'ûntû bwa Kîrîstû Yiesû.

¹⁰Mantû mara nkwenda gûkûûria i mantû ma Onesimas ûra aatuîkire mwana wakwa mantûûni ma wîtîgio ndî gûkû nceera.

¹¹Mbereeni atiraarî na gîtûmi kîrî woû. Îndî îîndî arî na gîtûmi mûno kîrî woû na niû.

¹²Imbendeete Onesimas mûno, îndî ndamwîra acooke gwaku.

¹³Nkîenda gûkara n'we agînteethagîîria bantû aaku îîndî ndî nceera n'ûntû bwa ntheto îmbega,

¹⁴îndî ingî gûtirî bu naani nkwenda kwîthuurîra ûtaambîîte kûmbîtîgîîria. Ntienda gûkwîra nwa mwanka ûnteethie n'ûntû i woû wengwa ûbatîîrue wîgua nûkwenda gûnteethia ûtagûkinyîîrua.

¹⁵Waûmba kwîgua Onesimas araumîîte gwaku kagiita gaku gaakai, kaingo acooka bûtûûrania bûtakîathûkana kaîrî.

¹⁶Aticookeete arî ta nkombo akî, acookeete arî ûmwega nkûrûki ya nkombo. I mûruanyûkwe mwendwa. Ûkaaya kwîgua inkûmwona arî mûruayia ûmwega ûûgû rî, î woû ûkaamwona arî ûmwega ata arî nkombo yaku na arî mûruanyûkwe ndeni ya Mwathani?

¹⁷Kwoogu ûkaaya kwîgua na mma ûnthûkagia tûrî kîmwe naawe, ndeenda ûmwîtîgîîria acooka gwaku ta bûra ûnthûkia mbûyîîte gwaku ndî niû.

¹⁸Na waya kwîgua ka kûrî ûntû aakûrûthîra, kana n'îrandû rîaku arî na rîo, ngakûrîa rîo ndî niû.

¹⁹Ndîandîka mîgambo îno na njara ciakwa ningwa, i niû Paûrû nkaarîa! (Îndî ntikwenda gûkwîra wana woû ûrî na îrandû rîakwa, ta rîo mwoyo waku.)

²⁰Kwoogu, mûruayia, ndîenda ûndûthîra ûntû bwega ndeni ya Mwathani. Îkîra nkoro yakwa wîru ndeni ya Kîrîstû.

²¹Ndîkwandîkîra ngîtîgagia ûkaarûtha ûgu ndakwîra. Na inkûmenya ûkaarûtha kinya nkûrûki.

²²Na bûngî na bu, ingûkûûria kwa wendi bwaku ûnthuuranîra bantû a gûkara, n'ûntû inkwîrîgîîra Ngai akaambotithia mbîgue ndî amwe naabi kaîrî, kûringana na maromba meenu.

²³Wana Epabaras tûrî n'we gûkû nceera n'ûntû bwa Kîrîstû Yiesû. Thûkia nkeethi ciake.

²⁴Kinya bara bangî tûrutaga na bo ngûgî—Maariko, Arîstakas, Ndemas na Ruka bauga ûkeethue.

²⁵Ûtugi bwa Mwathani Yiesû Kîrîstû bûrookara naabi.