Read tharaka AIBIRANIA 12 Bible Online

AIBIRANIA 12 - tharaka bible

AIBIRANIA 12

¹Na kwoogu n'ûntû tûrî na gîkundi kîînene ûgu, kîra gîtûthiûrûkîîte gîa akûûyî ba wîtîgio, ga tuugieni rwîro rûra tûbatîîrue tûthi na mbere na kuugia tûrî na kûûmîîria. Na kaingo tûûmba kuugia, nwa mwanka tûtigane na kîra kîonthe gîtûrigagîîria na wîyia bûra bûtûkooragia.

²Tûraitheeni Yiesû ûra aanjîîrie wîtîgio bwetû. N'we agaatûkinyia mûthia wa bu. Naûmîîrie gîkuû kîra aakuire mûtharabaani, na eetîgîra aagîa îgi rîa gîkuû gîku ta gûtarî bu bwarî oogo, n'ûntû bwa gûkena kûra Ngai aamûkeneetie. Îîndî akari rûteere rwa Ngai rwa ûrîo rwa gîtî kîa ûnene.

³Thûgaanîriani bûra gwakarîkire kîrî Yiesû, bûra aûmîîrie aanyamaarua n'antû ba meeyia bara baamûkararagia. Bwarûtha ûgu bûtiîgua bûkînogerwa nkorooni cienu kana bûthira wîru.

⁴Kûrûani kûra bûrûaga na meeyia bûtikûrî gûkinyia a kûruta mîoyo yenu.

⁵Ka bûriganîrîtue i mîgambo ya kûbwîkîra wîru îra Ngai aaragia naabi ta aana baake? “Mwana wakwa, ûtikaathûkie ta ûntû bûûthû Ngai akwonia kûra ûbîtagîria. Ûtigaakue nkoro akûthetia.

⁶N'ûntû ûra Mwathani eendeete n'we oonagia kûra abîtagîria. Eeyaga îkaanûkia ûra wonthe athûkagia arî mwana wake.”

⁷Ûmîîriani rîra Ngai abwonia kûra bûbîtagîria, n'ûntû eegagua akîbûthûkia ta aana baake. Ka kûrî mwana atoonagua n'îthe kûra abîtagîria?

⁸Ûkeegua bûtoonagua kûra bûbîtagîria, ta bûra aana bonthe boonagua, ûtiîgua bûrî aana ba mma, bwîgua bûrî ta aana bara baciaragîrwa mîciî bagakûra batarî beethe.

⁹Twinthe tûreegua tûrî na babaaba gûkû nthîgûrû na itwabatîîyaga. Kwoogu anga tûtibatîîrue twînenkanîra kîrî wathani bwa Baaba wa mîoyo yetû, kaingo tûtûûra mwoyo?

¹⁰Babaaba beetû baatwonagia kûra twabîtagîria gwa kagiita gaakai, kûringana na bûra boonaga bûrî bwega mûno. Îndî Ngai atwonagia kûra tûbîtagîria n'ûntû bwa ûteethio bwetû twingwa, kaingo twîgua tûrî na ûtheru ta bwake.

¹¹Rîra wîgagua tûkîonua kûra tûbîtagîria, tûtikenaga. Wîgagua tûkîîgua ûrûrû na tûtikenaga. Îndî nyumaani bara beegagua booneete baita kuumania na kwoneerua kûra babîtagîria, iboonaga maumithio ma wagîru na ûkiri.

¹²Îgîani inya nkûrûki kûra bûtiraarî na ya kûgana.

¹³Îthiini na mbere na njîra îra yaagîrîte kaingo ûra arî kîonje ataremwa kûthi, aûmbe kûgwata inya.

¹⁴Cûûgiani mûno bûtûûranagieni na ûkiri na wakîra muntû. Geriani na njîra cionthe gûtûûra bûrî baatheru, n'ûntû bwarega kûrûtha ûgu bûtiona Mwathani.

¹⁵Îmenyeereeni gûtikeegue kûrî we atakîewa ûtugi bwa Ngai. Raithaani bwone gûtirî we arî na marûrû aaya gûtûma antû baingî bagîe thîînaani, beeyia.

¹⁶Nwa mwanka bwone gûtirî we akûruta ngûgî cia ûmaramari, kana atatîîyaga Ngai ta Esaû ûra eendiirie ûrikithaathi bwake bwa mwana wa mbere na irio bia îrîa rîmwe.

¹⁷Ibwiyî nyumaani neendire kwewa kîthaarimo n'îthe, îndî îthe amûregeera. Atikîona bûra akîrûtha agarûrania bûra aarî akûrûtha amwe na kwîgua neendaga athaarimwa mûno mwanka aarîra.

¹⁸Biû bûtaakinya Kîrîmaani gîa Sinaî kîra kîûmba gûtongeka na njara, kîrî na mwanki ûgwakana, kîrumeene mwindu, kîrî na kîbuubani,

¹⁹kayû ga karumbeeta na kayû gakwaria. Rîra Aisiraeri beegiirue kayû kaaria, beerekanire bauga batikwenda kwîgua mûgambo ûngî.

²⁰Bataûmîîria watho bwa Ngai bûra augîîte, “Kinya nyamû yatongithia kîrîma, nîûragwe na maiga wana yo.”

²¹Na wana Musa we wengwa naamakîîte mûno i bûra oonire mwanka auga, “Inkwinaina n'ûguaya.”

²²Îndî biû ibûkinyîîte Kîrîmaani gîa Cayûni na Njerusaremu îngî înjerû ya îgûrû, taûni ya Ngai ûra atûûraga mwoyo. Ibûkinyîîte kûra kûrî araîka ngiri itatarîka,

²³na kûrî kîîthîrano kîînene, kîrî na gîkeno, kîûthûrano kîa bara barî ta aana ba mbere ba Ngai bara mariîtwa maao maandîkîîtwe gûku îgûrû. Ibûkinyîîte kîrî Ngai ûra arî mûgambithania wa bonthe, na kîrî irundu bia antû baagîru bara batheretue.

²⁴Ibûkinyîîte kîrî Yiesû, mwîguithania wa kîrîîkanîro kîîyerû gatîgatî ka Ngai na antû baake. Na ibûkinyîîte kîrî nthakame îra yamincagwa n'ûntû bwa meeyia, îra îtweyaga wîrîgîîro bwa mantû meega nkûrûki ya nthakame ya Abeeri.

²⁵Îmenyeereeni bûtikaarege kwathîkîra kayû ka Ngai rîra akwaria. Aisiraeri bara baaregire kwathîka bakwîgua kayû gaake akîaria arî gûkû nthîgûrû batoona wega. I thîîna îgana ata tûkoona twarega kûmwathîkîra akîaria arî îgûrû?

²⁶Kagiitaani kara, kayû gaake ikainainiirie nthîgûrû. Îndî îîndî augîîte, “Nkainainia nthîgûrû kaîrî, na ti nthîgûrû yonka îndî n'amwe na îgûrû rîene.”

²⁷Mûgambo ûyu, “kaîrî,” ûrîonania kîra kîonthe kîaûmbirwe gîkainainua na kîrutarutwe oogo, kaingo bira bitainiinîka bitigwa.

²⁸Na kwoogu, n'ûntû itûkwewa ûnene bûra bûtainiinîka, ga tûcookerieni Ngai nkaatho na tûmûgonge, tûkîmûtîîyaga na tûkîmûkuthûkaga na njîra îra îkaamûkenia.

²⁹Ga tûrûtheeni ûgu n'ûntû Ngai wetû akari ta mwanki wa wînyangia.