Read tharaka AIBIRANIA 13 Bible Online

AIBIRANIA 13 - tharaka bible

AIBIRANIA 13

¹Îthiini na mbere kwendanaga ta muntû na mûruagina kana mwaragina.

²Ririkanagaani kûgwataga antû ûgeni, n'ûntû bamwe ba bara baarûtha ûgu ibaagwatire araîka ûgeni batakûmenya.

³Ririkanagaani bara barî nceera, taka bûrî amwe na bo ku. Na ririkanagaani bara bakûnyamaara taka bûkûnyamaara na biû.

⁴Kûgûrana ikûbatîîrue gûtîîywa i bonthe. Arûme na eekûrû ibabatîîrue beegua barî eetîgua bonthe. Ngai akaagambithia bara bamaramaraga na bara bathûngagîîra.

⁵Bûtikeende wendo bwa mbia bûbûgwata ûkombo. Îganagîrwaani i bira bûrî na bio n'ûntû Ngai augîîte, “Ntikooro gûtiga kana ngûta.”

⁶Kwoogu ga tuugeeni ûûgû, “Mwathani n'we mûnteethia, ntiîgua ûguaya. N'ûû ûûmbûûria?”

⁷Ririkanagaani atongoria beenu bara baabwîrire kiugo kîa Ngai. Thûgaanîriani mûtûûrîre wao, bûthûkie wîtîgio bwao bûrî ngerekano.

⁸Yiesû Kîrîstû akari bûmwe rîonthe, îgoro, îmunthî, mwanka gûtarî rîo.

⁹Bûtikaarekeeni moorutani maageni ma mîthemba yonthe matûma bûta njîra. N'ûntû bwega kûûmîîrua nkoro n'ûtugi bwa Ngai, îndî ti kwathîkîra maathana îgûrû rîa irio. Maathana ta mamu matiteethagia bara bamaathîkagîra.

¹⁰*Athînjîri ba Ngai ba Ayaundi bara barutaga ngûgî nyomba ya Ngai, batirî na aki ya kûrîa kîgongwana gîetû.

¹¹Mûthînjîri ûra mûnene wa Ngai airaga nthakame ya nyamû ara atheru mûno, akîmîruta îrî kîgongwana gîa kûthiria meeyia îndî biimba bikarîrîrîkîrwa na mwanki ome ya ara marema maambîîtwe.

¹²Ûgu i ta bu Yiesû aanyamaaragîrua ome ya taûni ya Njerusaremu, kaingo atheria antû na nthakame yake wengwa, bathira meeyia.

¹³Kwoogu tûthiini naara arî ome, twîgue îgi rîra eegiirue.

¹⁴Aaga nthîgûrû ti gwetû gwa gûtûûra tene na tene. Ga tweteerete gwetû kagiita gakaaya.

¹⁵Kwoogu ga tûkumieni Ngai gûkûrûkîîra kîrî Yiesû, kûrî ta kîgongwana gîa ûkumio bwetû kuuma tûnyuani tûra tuumbûraga riîtwa rîake.

¹⁶Bûtikaariganîrueni i kûrûtha mantû meega na teethanagiani na bira bûrî na bio, n'ûntû mantû ta mamu imakenagia Ngai, marî ta kîgongwana.

¹⁷Athîkagîraani atongoria beenu na bûtikaabakararagieni n'ûntû babûrûngamîîrîîte bakaûrua i Ngai. Bwabaathîkîra bakaaruta ngûgî bakeneete. Îndî bwarega bakaaruta ngûgî barî na kîeba, na bûbu bûtibûteethia.

¹⁸Tûrombagîreeni. Tûrî na mma tûtikwîgambithia nkorooni n'ûntû twendaga kûrûtha bûra kwagîrîte magiita monthe.

¹⁹Mûno mûno, inkûbûûria bûndombere, Ngai atûme ncooke kîrî biû na mpwî.

²⁰Ngai wa ûkiri ûra aariûkiirie Mûrîîthi wa ng'ondu, mûrîîthi arî îgweta mûno, ta we Mwathani wetû Yiesû Kîrîstû, gûkûrûkîîra kîrî nthakame ya kîrîîkanîro gîa tene na tene,

²¹aroobwaa bira bionthe biega bûrûthe kwenda gwake. Arootûma tûrûthaga bûra bûmûkenagia, n'ûntû bwa Yiesû Kîrîstû. We arookumua tene na tene. Aameni.

²²Aruayia na aarayia, inkûbûûria bûthûgaanîrie bwega mantû mama mbwîrîîte baarûani îno, n'ûntû ti ndaaya mûno.

²³Inkwenda kûbûmenyithia atî mûrûayia wetû Timotheo, nararekiirue auma nceera. Akaaya naaga na mpwî, nkîîya nkamûreeta tûûye kûbwona.

²⁴Keethiani atongoria beenu bonthe na antû ba Ngai bonthe. Eetîgîri ba Itaaria bakûbûkeethia.

²⁵Ûtugi bûrookaraga naabi bwinthe.