Read tharaka AIBIRANIA 2 Bible Online

AIBIRANIA 2 - tharaka bible

AIBIRANIA 2

¹Gîku i kîo gîtûmaga wîgua nwa mwanka tûrûmîîre mantû mara tweerirwe, kaingo tûtabîtia njîra.

²Mantû ma *watho mara Ngai aariirie agîtûmagîra araîka Kîrîmaani gîa Sinaî imaayire kwonekana maarî ma mma. Ûra wonthe ataathîkagîra watho aakaanûkagua bûra kwaagîrîte.

³Kwoogu n'ata tûtakîewa îkaanûkia twarega gwîtîgîra wonokio bûbû bûûnene, bûra bûgweteetwe nthetooni îmbega? Wonokio bûbû bwagwetirwe mbere i Mwathani we wengwa, bwacooka bwonanua i bwa mma kîrî tiû i bara baamwîgiirue akîaria.

⁴Na Ngai naakûûyîîre na iriga, magegania, biama mwanya mwanya, na biewa bia Kîrundu Ûmûtheru bira eeyaga antû bara eendaga.

⁵Ngai ataathuura araîka batuîka aathani ba nthîgûrû îngî înjerû îra îkeegua îrî oogo, îra tûkwarîîria.

⁶Kûrî bantû *Maandîko Maatheru maugîîte, “Muntû îîndî n'ûû wakûmûthûgaanîria, muntû[2] îîndî n'ûû wakûmûmenyeera?

⁷Wamûtuîkithiirie ûmûniini kîrî araîka kwa îgiita rîîkai,[3] wamwaa mwago na gîtîîyo. Wamûtuîkithiirie mwathi wa bionthe bira waûmbire,

⁸wamwere watho bwa kwathaga bionthe.” Ngai aamwere watho bwa kwathaga bionthe, gûtirî kîo aatiga. Îndî kagiitaani gaka tûrî îîndî tûtionaga taka arî na watho bwa kwathaga bionthe.

⁹Tûmwonaga arî Yiesû ûra “aatuîkithiirue ûmûniini kîrî araîka kwa îgiita rîîkai,”[4] arî na mwago na gîtîîyo kuumania na gîkuû kîra aakuire bantû a muntû wonthe n'ûntû bwa ûtugi bwa Ngai.

¹⁰Yiesû n'we oonokanagia. Na kwoogu ikwaagîrîte Ngai ûra aûmbire into bionthe, ûra abiigîîte oogo, atûma Yiesû eegua arî na mûkarîre ûtarî na mabîtia na njîra ya kûnyamaarua. Aarûthire ûgu kaingo antû baingî batuîka aana baake na batûûrania amwe n'we mwagooni wake.

¹¹Yiesû n'we atheragia antû bakauma meeyiani maao, na bara atheragia i ba îthe ûmwe n'we. Na gîku i kîo gîtûmi kîra gîtûmaga eegua rîtarî îgi kûbeeta aruagina na aaragina.

¹²Eeraga Ngai, “Ngakûmenyithania kîrî aruayia na aarayia, nkainaga ndwîmbo cia gûgûkumia biîthîranooni.”

¹³Kaîrî auga, “Nkamwîtîgia.” Na kaîrî augîîte, “I niû ûyû amwe na aana bara Ngai athuurîîte beegua barî amwe naani.”

¹⁴Na n'ûntû aana baba n'antû baûmbîîtwe na nyama na nthakame, Yiesû wana we aakarire ta bo mûûmbîreeni. Na gîtûmi gîa kûrûtha ûgu i kaingo na njîra ya gûkua gwake athiria Nkoma ûra arî inya ya gîkuû.

¹⁵Kwoogu naûmbire kûthaûra bara baatûîre barî nkombo cia ûguaya bwa gîkuû mûtûûrîreeni wao unthe.

¹⁶Igûkwoneka t'araîka Yiesû aayire gûteethia. Aayire gûteethia bara barî ba rûciaro rwa Îburaîmu.[5]

¹⁷Kwoogu kwarî nwa atuîkire ta aruagina na aaragina na njîra cionthe, kaingo atuîka mûthînjîri ûra mûnene mwîtîgua kîrî Ngai, mûthînjîri arî kîao, aruta kîgongwana gîa kûthiria meeyia ma antû.

¹⁸Na n'ûntû aranyamaarua na aragerua, nateethagia bara begeragua.