Read tharaka AIBIRANIA 4 Bible Online

AIBIRANIA 4 - tharaka bible

AIBIRANIA 4

¹Ngai natwete wîrane atî twaûmba kûthi bantû ara atûthuuranîrîte a kûnogoka. Kwoogu twîmenyeereeni gûtikeegue kûrî na wacietû atakîthi noogo.

²Tûtûmîîrîîtue ntheto îno mbega atî Ngai natûthuuranîrîte kînogoko, ta bûra yatûmîîrue kîrî bara Musa aatongoreerie bauma Miisiri. Îndî gûtirî bu yabateethia na bu n'ûntû bataamîtîgîra barî na wîtîgio.

³Tiû bara tûmîîtîgîîtie twaûmba kûthi bantû agu a kûnogoka. Îndî îgûrû rîa antû babu, Ngai augîîte, “Nkûthûûra ndathiîtia ndauga, ‘Batikooro bakinya kûra mbathuuranîrîte kûrî kînogoko kîao.’ ” Ngai naugire ûgu wana weegua kînogoko gîku kîathuuranîîrwe kuuma wo rîra nthîgûrû yaûmbirwe.

⁴Bantû ana *Maandîkooni Maatheru kwîrîîtwe, “Ntugû ya mûgwanja Ngai aanogoka akûthiria ngûgî ciake cionthe.”

⁵I ntûma kwandîkîîtwe, “Batikooro bakinya kûra mbathuuranîrîte kûrî kînogoko kîao.”

⁶Kwoogu bantû ara Ngai athuuranîrîte kînogoko arî woogo antû bathi. Îndî bara beegiirue ntheto îno mbega bataakinya noogo n'ûntû bwa kûrega kwathîka kwao.

⁷I rîo Ngai aabangire ntugû îngî îgwîtwa “îmunthî.” Aamenyithaniirie yo na Ndaundi nyuma ya kagiita kaaraaya, rîra augire, “Bweegua Ngai akîaria naabi îmunthî, bûtikaûmie biongo.”

⁸Ûkaaya kwîgua Njocua aratongoria Aisiraeri baakinya kînogokooni gîku, ûtiîgua Ngai akîgweta bantû angî nyumaani.

⁹Kwoogu kûrî na *Sabatû ya mwanya ya kûnogoka kîrî antû ba Ngai.

¹⁰Athii kînogokooni kîra Ngai athuuranîrîte bakaanogoka baathiria ngûgî yao, ta bûra Ngai aanogokire akûthiria yake.

¹¹Kwoogu tûcûûgieni na njîra cionthe tûthi kînogokooni gîku, kaingo gûteegua kûrî we atakîthi noogo n'ûntû bwa kûrûtha ta bûra bara baaregire kwathîka baarûthire.

¹²Kiugo kîa Ngai i ta gîntû kîrî mwoyo na kîrî inya. Ûûgî bwa kîo i nkûrûki ya bwa rûyiû rwa gûtema na mbarî irî ciîrî. Gîtûtemaga gîgakinyîîra mwoyo na nkoro gîkoonania bûra mawîrîîria na mathûgaanio ma nkoro cietû makari, ta bûra rûyiû rûûmba gûtema mîndî rûgakinyîîra ûthuumo.

¹³Gûtirî kîûmbe kîîbiithîra kiugo. Mantû monthe imaagwûre na ibûûrîîni marî kîrî we. N'we twinthe tûkeera mantû mara twarorûtha.

¹⁴N'ûntû tûrî na mûthînjîri ûra mûnene mûno wa Ngai, ta we Yiesû Mwana wa Ngai, ûra aathiire îgûrû, tûbatîîrue tûrika wîtîgioni bûra twîtîgîîtie.

¹⁵Mûthînjîri wetû ûra mûnene namenyaga kûra tûremagîîrwa n'ûntû aragerua na njîra cionthe ta bûra tûgeragua, îndî ateeyia.

¹⁶Kwoogu itwîgue tûrî na ûcamba tûthengeere gîtî kîa ûnene kîa Ngai ûra eeyanaga ûtugi kaingo atwîgua kîao na atwa ûtugi bwa gûtûteethia rîra tûrî thîînaani.