Read tharaka AIBIRANIA 5 Bible Online

AIBIRANIA 5 - tharaka bible

AIBIRANIA 5

¹Mûthînjîri ûra mûnene wonthe athuuragwa kuuma kîrî antû agatuîkithua n'we akaabarûngamîîra mantûûni mara magûkonia Ngai. N'we eeyanaga biewa bia antû kîrî Ngai na akarutîra Ngai igongwana biao n'ûntû bwa meeyia maao.

²Atiinyagîîria bara bataku, bara babîtagia njîra n'ûntû we wengwa kûrî kûra aremagîîrwa.

³Na kwoogu nwa mwanka arutîre Ngai igongwana biake we wengwa n'ûntû bwa meeyia maake na ma antû.

⁴Gûtirî we eetuîkithia mûthînjîri ûra mûnene wa Ngai eepa gîtîîyo gîku. I Ngai amwîtaga aruta ngûgî înu ta bûra eetire Arûni.

⁵Ûgu i ta bu Kîrîstû aarûthire. Ateerûmîîria wengwa gîtîîyo gîa kwîgua arî mûthînjîri ûra mûnene. I Ngai aamwîrire, “Woû ûrî mwana wakwa. Îmunthî ngûtuîka abaagu.”

⁶Na kûrî bantû angî kaîrî *Maandîko Maatheru maugîîte, “Ûgaatûûra ûrî mûthînjîri wa Ngai mûtariini wa Merikisendeki.”

⁷Rîra Kîrîstû aarî gûkû nthîgûrû aarombaga Ngai ûra akîûmba kûmwonokia atigaakue akamwîra amwe ûteethio. Aarombaga na inya akîruaga meethori. Na n'ûntû bwa gûtîîya kûra aatîîyîîte Ngai, maromba maake imeeguîkire.

⁸Wana kinya ûkeegua aarî Mwana wa Ngai, neerutanire kwathîka kuumania na kûnyamaara kûra aanyamaarire.

⁹Na n'ûntû ûtûûro bwake bwatuîkire bûtaarî na mabîtia, n'we aatuîkire kaumo ka wonokio bwa tene na tene kwa bara bonthe bamwîtîgîîtie.

¹⁰Aatuîkithiirue mûthînjîri ûra mûnene i Ngai mûtariini wa Merikisendeki.

¹¹Tûrî na maingî makûgweta îgûrû rîa ûntû bûbû, îndî bûrî na inya gûtûma bûtaûkîrwa i bu, n'ûntû mathûgaania meenu matikûûmba kûgwata bûra tûkûbwîra.

¹²Bûkarîîte bûrî eetîgîri kwa îgiita rîraaya ûntû bwîgua îîndî bûrî aarimû. Îndî îîndî bûra bûkari i bûkwenda muntû wa kûbûrutana kaîrî ithoomo bia mbere bia kiugo kîa Ngai. Kîthoomo kîra bûkwenda gîkari ta îria bantû a irio biongwa.

¹³Muntû wonthe ûra irio biake birî îria akari ta kaana na gûtirî bu aiyî îgûrû rîa ûrutani bwa wagîru bwa Ngai.

¹⁴Irio biongwa i bia antû agima. Bo ibarutanîîtwe mûno kwathûrana wega na ûthûûku.