Read tharaka AIBIRANIA 6 Bible Online

AIBIRANIA 6 - tharaka bible

AIBIRANIA 6

¹Kwoogu ga tûrekaneeni na ithoomo bia mbere îgûrû rîa Kîrîstû. Ga tûthiini mbere ûgimaani. Tûtibatîîrue tûcooka kûbûrutana mantû ma kwîrira kwa mantû mara muntû aûmba kûrûtha magatûma akua, kana mantû ma gwîtîgia Ngai,

²ûbaatithio, kwaiganîîra njara,[6] kûriûka kuuma kwa bara bakuû, na kûgiitîrwa îgamba.

³Tûrekaneeni na mantû mama! Na ûgu i bu tûkaarûtha weegua i kwenda kwa Ngai.

⁴Gûtiûmbîka bara mbereeni baiyî ûmma bacooka kwîrira kaîrî. Bo baroona werû, baracama mantû meega ma îgûrû, na bareewa kîewa gîa Kîrundu Ûmûtheru. Baracama beegua bûra kiugo kîa Ngai kîbuîte bûgana, na baramenya bûra nthîgûrû îra îngî njerû, îra îkeegua îrî oogo, bûra îkeegua îrî na inya îgana. Îndî bakaaya kûrekana na mantû mamu, gûtiûmbîka bacooka kwîrira kaîrî. I ta kwamba Mwana wa Ngai kaîrî na kûmwira îgi antûûni.

⁷Antû bamwe bakari ta gûntû kûra kuuraga mbura mûno. Arîmi ba gûntû ta gûku ibeegagua barî na irio mûno. I gûntû kûthaarimagwa mûno i Ngai.

⁸Na kûrî antû bangî na bo bakari ta gûntû kûra kuumaga mîîgua na nkamba. Gûku i gûntû kwa ûtheri. Ku kûrî ûgwatiini bwa kûrîrîkwa i Ngai, na mûthiani i gûkaabîîthua.

⁹Eendwa, wana kinya ûkeegua itûkuuga mantû mama, tûrî na mma bûkaathi na mbere na kûrûtha mantû meega kwonania bûrî boonoku.

¹⁰Ngai agiitaga magamba bûra kwagîrîte. Atiiriganîrua i bûra bûmûrutîrîte ngûgî bûgana, bwonania wendo bwenu kîrî we na gûteethagia antû baake, wata ûgu bûthiîte na mbere kûrûtha.

¹¹Twenda mûno wakîra ûmwe wacienu athi na mbere kûruta ngûgî înu na inya mwanka mûthia, kaingo wabu bwewa kîra bwîrîgîîrîîte.

¹²Bûtikaagîe ûthao. Tûatiani antû bara beetîgîîtie, bara batanogaga i gweteera na bûkeewa rûgai rûra rûrî mawîraneeni.

¹³Rîra Ngai eere Îburaîmu wîrane, naathiîtiirie kwonania wabu akaingia wîrane bwake. Na n'ûntû gûtaarî na riîtwa rîngî rînene nkûrûki ya rîake, aatûmîîre riîtwa rîake we wengwa kûthiîtia.

¹⁴Augire, “Na mma ga ngûkwîra, ngakûthaarima na nthagayie rûrîîyo rwaku.”

¹⁵Rîru Îburaîmu eeteera atakûnogerwa na eewa kîra Ngai aamwete wîrane bwa kîo.

¹⁶Rîra antû bathiîtagia, bathiîtagia na riîtwa rîa muntû ûmûnene kîrî bo. Mûthiîtio n'uu wonanagia bûra muntû akuuga i bu kûrî, na ûkathiria mbaara ira ikûrî oogo.

¹⁷Ngai aathiîtiirie akîendaga kwonia bara eere wîrane, wabu mîbango yake itikooro îgarûka rî kana rî.

¹⁸Kwoogu Ngai eeyanire wîrane bwake na kûthiîtia aathiîtia. Mantû mama marî maîrî matiigarûka, n'ûntû Ngai atirongwaga. Na kwoogu tiû bara tûtoorookerete gwake atûrigîîria, itwîkîrîtwe wîru bûûnene. Tûgwete twarikia wîrîgîîro bûra twetwe.

¹⁹Wîrîgîîro bûbû i nanga[7] cia mîoyo yetû. I wîrîgîîro tûgwîtîgia na bûûriku. Wîrîgîîro bwetû bûtûtongoragîîria tûgakûrûkîîra nguoni îra îgaanîîtie nyomba ya Ngai, bûgatûkinyia bantû ara atheru mûno gûku îgûrû nyomba ya Ngai.

²⁰Yiesû naathiire noogo arî mbere n'ûntû bwetû. Naatuîkire mûthînjîri ûra mûnene wetû mûtariini wa Merikisendeki, mwanka tene wa tene.