Read tharaka AIBIRANIA 7 Bible Online

AIBIRANIA 7 - tharaka bible

AIBIRANIA 7

¹Merikisendeki aarî mûnene wa taûni yeetagwa Saremu, na aarî mûthînjîri wa Ngai ûra atûûraga îgûrû mûno. Rîra Îburaîmu aacookeete agûcinda anene, Merikisendeki akûrîîkana n'we naamûthaarimire.

²Îburaîmu aathûkia gîcuncî gîa îkûmi gîa wakîra gîntû aataîte ndûani aapa Merikisendeki. Riîtwa Merikisendeki riugaga ‘Mûnene wa wagîru’. Kaîrî eetagwa ‘Mûnene wa ûkiri’, n'ûntû Saremu i ta kuuga ‘ûkiri’.

³Îthe na gina wa Merikisendeki batiiyîkeene, na gûtirî we aiyî antû baao.[8] Gûtirî muntû aiyî rîra aaciarirwe kana rîra aakuire. Aiyîkeene ataatiga kwîgua arî mûthînjîri wa Ngai, ta bûra Mwana wa Ngai akari.

⁴Kwoogu ibûkwona bûra Merikisendeki aarî na gîtûmi kîgana. Kîûyûûyû gîetû, Îburaîmu, aramwaa gîcuncî gîa îkûmi gîa wakîra gîntû aataîte.

⁵*Watho bwa Musa buugîîte bara bagaatuîkaga *athînjîri ba Ngai barî ba rûrîîyo rwa Raawî nwa mwanka beeyagwe gîcuncî gîa îkûmi kuuma kîrî antû, yaani kuuma kîrî antû baao bongwa, amwe na kwîgua i ba rûrîîyo rwa Îburaîmu ta bo.

⁶Tika Merikisendeki aarî wa rûrîîyo rwa Raawî, îndî Îburaîmu naamwere gîcuncî gîa îkûmi. Amwe na ûgu, Merikisendeki naathaarimire Îburaîmu, na Îburaîmu eetwe mawîrane i Ngai.

⁷Gûtirî nkanja ûra athaarimanaga n'we mûnene kîrî ûra athaarimagwa.

⁸Athînjîri ba Ngai bara baarî ba rûrîîyo rwa Raawî, baarî antû na ibaakuire. Îndî amwe na ûgu ibeeyagwa gîcuncî gîa îkûmi. Îndî Merikisendeki we twîragwa atûûraga mwoyo.

⁹Kwoogu nwa tuuge Raawî ûra akwewa gîcuncî gîa îkûmi, wana we neeyanire kîo rîra Îburaîmu eere Merikisendeki.

¹⁰N'ûntû wana kinya ûkeegua ataarî agûciarwa rîru, mbeû îra yamûciarire nîarî na Îburaîmu rîru Merikisendeki aarîîkanîîte n'we.

¹¹Aisiraeri ibeerwe *watho na baarutanagwa bûra buugîîte n'athînjîri ba Ngai ba rûrîîyo rwa Raawî. Îndî ûkaaya kwîgua ngûgî îra athînjîri baba ba Ngai baarutîîre antû yaûmbire gûtûma beegua barî baatheru kûrû kîrî Ngai, gûtiîgua kûrî na gîtûmi gîa kwîgua kûrî na mûthînjîri wa Ngai ûngî mûtariini wa Merikisendeki, na ti mûtariini wa Arûni.

¹²Mûthînjîri wa mûtari ûngî akaaya kûreetwa, wana watho nwa mwanka bûgarûrwe.

¹³Kîrîstû ûra mantû mama magûkonia aarî wa mûgongo ûngî, na gûtirî we wa mûgongo wao aatuîka mûthînjîri wa Ngai.

¹⁴Gûtirî we ataiyî Mwathani wetû n'wa mûgongo wa Njunda, na Musa ataarogweta nwa ata îgûrû rîa athînjîri ba Ngai bakuuma mûgongooni wao.

¹⁵Kûgarûka gûku kwa mûtari wa *athînjîri ba Ngai igûkwoneka gûtarî na kîrigicano rîra tûkwona kûrî na mûthînjîri ûngî akari ta Merikisendeki.

¹⁶We ataatuîkithua mûthînjîri wa Ngai na njîra ya maathana makoneetie kûringana na kûra muntû aciarîrîtwe. Îndî we aatuîkithiirue mûthînjîri wa Ngai n'inya ya mwoyo ûra atûûraga mwanka tene na tene.

¹⁷*Maandîko Maatheru maugîîte ûûgû îgûrû rîake, “Ûgaatûûra ûrî mûthînjîri wa Ngai mûtariini wa Merikisendeki.”

¹⁸Watho bûra bûkûrû bwarekanirwe na bu n'ûntû bûtaarî na ûrito, na n'ûntû bwarî bwa ûtheri.

¹⁹Watho bûbu gûtirî gîntû bwaûmba gûtûma kîîgua kîrî kîtheru kûrû. Kwoogu îîndî itwetwe wîrîgîîro bwega nkûrûki bûra bûtûmaga tûthi kîrî Ngai.

²⁰Na bûngî na bu, ûyû aatuîkithiirue mûthînjîri na kûthiîtia kwa Ngai, ûntû ataarûtha rîra aatuîkithagia bara bangî anthînjîri baake.

²¹Îndî Kîrîstû aatuîkire mûthînjîri na njîra ya kûthiîtia kûra Ngai aathiîtiirie rîra augire ûûgû îgûrû rîake, “Mwathani akûthiîtia na atiigarûka, ‘Ûgaatûûra tene na tene ûrî mûthînjîri wa Ngai mûtariini wa Merikisendeki.’ ”

²²Ûgu i ta kwonania Yiesû n'we agaatwotithia kwîgua tûrî na kîrîîkanîro kîega nkûrûki na Ngai.

²³Mwanya ûngî ûra ûrî oogo, i kwîgua ikwarî na athînjîri babu bangî baingî n'ûntû ibaakuyaga bagatiga kûruta ngûgî.

²⁴Îndî Yiesû arî mwoyo mwanka tene na tene. Na kwoogu wana kinya ngûgî yake ya kwîgua arî mûthînjîri wa Ngai ataatigana n'yo.

²⁵Kwoogu rî kana rî noonokagia[9] bara bathiyaga mbere ya Ngai gûkûrûkîîra kîrî we, n'ûntû arî oogo magiita monthe kaingo aaranîria na Ngai n'ûntû bwao.

²⁶Ûyu n'we mûthînjîri wa Ngai ûra aagîrîte kîrî tiû. I mûtheru, atirî mabîtia na atirî meeyia. N'ûmwathûrane na eeyia eetithua kûra îgûrû mûno.

²⁷Gûtirî gîtûmi gîake kûruta igongwana ntugû cionthe ta athînjîri bara bangî bara mbere baambaga kûruta kîgongwana kîa meeyia maao bo bongwa, rîru bakaruta gîku kîngî n'ûntû bwa meeyia ma antû bara bangî. Yiesû we aarûthire ûgu na njîra ya kûruta kîgongwana rîmwe gûtarî kaîrî, rîra eerutire aambwa mûtharabaani.

²⁸Watho bwa Musa bûtuîkithagia antû athînjîri bara banene ba Ngai na antû nwa bagwe magerioni. Îndî kûthiîtia kwa Ngai ûra aathiîtiirie nyuma ya rîra eeyanîîte watho i ku gwatuîkithiirie Mwana wake mûthînjîri ûra mûnene, ûra athereetue cwe tene na tene.