Read tharaka AIBIRANIA 8 Bible Online

AIBIRANIA 8 - tharaka bible

AIBIRANIA 8

¹Bûra bungwa tûkwenda kuuga n'atî tûrî na mûthînjîri ûra mûnene, ûra aakarire nthî rûteere rwa njara ya ûrîo ya gîtî kîa Ngai ûmûnene.

²Akaraga arî mûthînjîri ûra mûnene kûra kûtheru mûno, gûntû kwa mma gwa kûgongera Ngai. Gûtaakwa i muntû, gwakirwe i Ngai wengwa.

³Mûthînjîri ûra mûnene wonthe atuîkithagua we kaingo aruta ngûgî ya kûrutîra Ngai igongwana na biewa. Na kwoogu wana kinya Kîrîstû mûthînjîri wetû ûra mûnene, nwa mwanka eegue arî na gîa kûmûrutîra.

⁴Ûkaaya kwîgua arî gûkû nthîgûrû ûtiîgua kinya arî mûthînjîri woogu n'ûntû tûrî na athînjîri gûkû bara barutagîra Ngai bira biîranîîtwe *wathooni.

⁵Ara bo barutagîra ngûgî ka arî mûbuanaano kana ngerekano ya bûra gûkari kungwa kûra îgûrû. Gîku i kîo gîtûmi kîra gîatûmire Ngai eera Musa amenyeere rîra aarî akubî kwamba *îrema rîra, kûra Ngai aarîîkanaga na antû. Aamwîrire, “Menyeera woone ûkûrûtha kîra gîntû kûringana na mûbango ûra wooniirue kîrîmaani.”

⁶Îndî îîndî ngûgî îra Ngai eete Yiesû aruta arî mûthînjîri n'yo mbega nkûrûki ya anthînjîri ba mbere. Gîtûmi i kwîgua ngûgî îra arutaga arî mwîguithania wa antû na Ngai n'ya kîrîîkanîro kîega nkûrûki, kîra kîrî na mawîrane meega nkûrûki.

⁷Ûkaaya kwîgua kîrîîkanîro kîa mbere gîtaarî na mabîtia, gûtikîîgua kûrî na gîtûmi gîa kîrîîkanîro kîngî rîa maîrî gîa kûthûkia kaanya ga kîa mbere.

⁸I Ngai arî we oonire kîrîîkanîro kîa mbere kîrî na mabîtia, kaingo auga, “Kagiita kaayîîte nkaarîîkanîra kîrîîkanîro kîngî na antû ba Isiraeri na ba Njunda, i Mwathani akuuga.

⁹Kîo ûtiîgua gîkari ta kîra ndarîîkanîîre na biûyûûyû biao, rîra ndabagwatire njara ndabatongoreeria ndabaruta nthîgûrû ya Miisiri. Bataathîka kûringana na bûra twarîîkanîrîte. Mwathani ariuga, i kîo n'ûntû ndabatiganîîrie.

¹⁰Kîrîîkanîro kîra nkaarîîkanîra na antû ba Isiraeri ntugû ciiyîîte, Mwathani ariuga, ûkeegua gîkari ûûgû, ngeekîra maathana maakwa mathûgaanioni maao, na mmaandîke nkorooni ciao. Ûkeegua ndî Ngai wao, na bakeegua barî antû baakwa.

¹¹Gûtiîgua kûrî na gîtûmi kîao kûrutana atûûri baao na antû baao, babeera, ‘Menyaani Mwathani!’ n'ûntû bonthe bakaammenya, kuuma bara baniini mwanka bara banene.

¹²Nkabarekera mantû maathûûku mara baarorûtha, na ntiiririkana meeyia maao kaîrî.”

¹³Rîra Ngai akwaria mantû ma “kîrîîkanîro kîngî,” i ta kwonania atuîkithîîtie kîra kîa mbere gîîkûrû. Na kîra gîkûrû gîtirî na ûrito kaîrî, kîrî akubî kuuma oogo.