Read tharaka NJAKUBU 1 Bible Online

NJAKUBU 1 - tharaka bible

NJAKUBU 1

¹I niû Njakubu mûruti ngûgî wa Ngai na Mwathani Yiesû Kîrîstû nkûbwandîkîra. Inkûbûkeethia biû mîîrîga îkûmi na îîrî bûnyageere gûntû na gûntû.[1]

²Aruayia na aarayia, thûkagiani kîrî gîkeno kîînene rîra bûkwona magerio ma mîthemba yonthe

³n'ûntû ibûkûmenya rîra wîtîgio bwenu bûkûûmba gûcinda magerio mamu, i rîo kûûmîîria kwenu kwongeerekaga.

⁴Rekaani kûûmîîria kwenu kwingie ngûgî ya ku ndeni yenu kaingo bwîgua bûrî eetîgîri agima, gûtarî kîo bûkwaga.

⁵Ûra wacienu akaaga ûûme bwa kuuma kîrî Ngai, narombe Ngai amwe. Na Ngai akamwaa n'ûntû eeyaga antû bonthe na wingî atakûnung'una.

⁶Na akîromba abatîîrue aromba arî na wîtîgio, atarî na nkanja n'ûntû muntû arî na nkanja nkorooni yake akari ta bûra makûmbî ma îria macûgagua i ruuo rûmeerekeretie mbarî weera rûkwenda.

⁷Muntû ta ûyu naakamenya gûtirî kîo akoona kuumania na Mwathani

⁸n'ûntû we i njoka ya mîromo îîrî. Gûtirî ara arûngi kîrî mantû maake monthe.

⁹Mûruayia kana mwarayia ûra arî na ûkîa nwa akeneere kwîgua Kîrîstû amûthûkagia arî muntû wa gîtûmi mûno.

¹⁰Na ûra arî na ûtonga wana we rîra Ngai amwonia bûra arî ûmûniini nabatîîrue akeneera bu n'ûntû itonga bira biîgwatagia ûtonga bûra birî na bu bikaathira ta bûra maûa maûrûrûkaga.

¹¹Kagiita ka mwathû riûa riumaga rîkarûngûria kîmera, maûa makanyaara makaûrûrûka, ûthongi bunthe bûra bûkûrî oogo bûkathira. Ûgu i ta bu itonga na bio bikaathirua birî ngûgîîni ciao.

¹²Kîthaarimo i kîrî ûra aûmagîîria magerio mamûyîîra, n'ûntû amoota ageekirwa nthûmbi ya mwoyo îra Ngai eeyanire wîrane bwa yo kîrî bara bamwendeete.

¹³Muntû aayîîrwa i magerio atikauge i Ngai akûmûgeria. Ngai atigereka arûtha ûthûûku na atigeranagia.

¹⁴Muntû athûngagîra magerioni aakuuyua i mawîrirîîria maake maathûûku mwanka magatûma arîîkîîrua i mûtego wa mo.

¹⁵Wîrirîîria bwagîa nda bûciaraga wîyia na wîyia bwakûra bûgaciara gîkuû.

¹⁶Kwoogu, eendwa, aruayia na araayia, bûtikeende kweneerua.

¹⁷Ûntû bwega bunthe na kîewa kîîganîîru biumaga îgûrû kîrî Ngai, Mûûmbi wa bionthe bira bimûrîkaga îgûrû. We atigarûkaga ta bio na atikaraga akîgarûkaga ta irundu.

¹⁸Aatûreetire ûtûûrooni bûûyerû na njîra ya kiugo gîake kîa mma kwa wendi bwake, tûrî rûciaro rwa mbere kîrî biûmbe biake bionthe.

¹⁹Eendwa, aruayia na aarayia, menyaani ûûgû, muntû nakarage na mpwî cia kwîgua, îndî ti cia kwaria kana cia kûthûûra.

²⁰N'ûntû muntû arî na mûthûûro atiûmba kwîgua arî ûmwagîru kûringana na bûra Ngai eerîgagîîra.

²¹Kwoogu bûtikaarûthe mantû ma rûko kana mûkarîre wenu wîgua ûrî wa mantû maathûûku. Îtîgîîriani kiugo kîa Ngai kîra aandîîte nkorooni cienu bwînyiîtie. Kîaûmba kwonokia mîoyo yenu.

²²Nabûteebenia mana nakûthikagîîria kiugo gîake akî. Nwa mwanka bûrûthage bûra kiugo gîkuuga.

²³Ûra athikagîîria bûra kiugo gîkuuga na atarûthe bûra gûkwendekana akari ta muntû eeraithîîte na kîyici bûra akari ûthiû,

²⁴eebona bûra akari akathi. Na atirakarakara akariganîrua i bûra eebonire akari.

²⁵Îndî ûra acûnkûûnaga bwega watho bûra bûtheru, bûra bûthaûraga antû, na akathi na mbere akarûtha bûra eegua atakûriganîrua, muntû ûyu akaathaarimwa mantûûni mara akaarûthaga.

²⁶Ûkaaya kwîgua muntû augaga n'wa ndini, îndî atimenyagîîra rûrîmî rwake, ndini înu yake n'ya ûtheri, nakwîbenia mana.

²⁷Ndini îmbagîru na ya mma mbere ya Ngai Baaba n'îno: gûteethagia aana ba nkîa na ntigwa mathîînaani maao, na muntû akeemenyagîîra atigaakwe rûko i mantû ma nthîgûrû îno.