Read tharaka NJAKUBU 2 Bible Online

NJAKUBU 2 - tharaka bible

NJAKUBU 2

¹Aruayia na aarayia, woona bwîtîgîîtie Mwathani Yiesû Kîrîstû ta we Mwathani wa mwago, bûtikaathûkagie antû kûringana na bûra bakari.

²Kwa ngerekano ga tûthûkie antû baîrî baayîîte kîûthûranooni kîenu. Muntû ûmwe akaaya arî na mbete ya thaabu na eekîrîte nguo cia goro, na ûngî n'we nkîa akaaya eekîrîte nguo inthiru.

³Bûkaaya kûthûkia muntû ûyu eekîrîte nguo imbega arî na gîtûmi nkûrûki, bûkamwîra, “Kara nthîgûrû gîtîîni gîkî kîega,” îndî ûyu nkîa we bûkamwîra, “Woû rûngama aara kana uumpare aaga,”

⁴anga gûku ti kwathûrana na bwatuîka agambithania kûringana na mathûgaanio meenu maathûûku?

⁵Nthikîîriani, eendwa, aruayia na aarayia. Ngai aathuurire nkîa ituîka itonga n'ûntû bwa wîtîgio bûra irî, kaingo ithûkia rûgai rwa ûnene bûra Ngai eeyanire wîrane kîrî bara bamwendeete.

⁶Îndî biû bûtionaga nkîa ta antû! Î rîo rî, anga twa itonga wabibu bibûcegagîîra na bikabûthûngîria magambaani?

⁷Twa bio kaîrî bicambagia riîtwa rîrî gîtîîyo rîa ûra bûrî baake?

⁸Wabu bûkaingia watho bûra bûnene bwa Ngai, bûra bwandîkîîtwe *Maandîkooni Maatheru bwauga, “Enda mûtûûri waku ta bûra wîbendeete,” nabûkamenya ibûkûrûtha bûra kwagîrîte.

⁹Îndî rîra bûkwathûra antû bûkoonaga bamwe barî ba gîtûmi nkûrûki ya bara bangî, bûbu i wîyia na watho bûrîonania bûrî auni watho.

¹⁰Ûra aathîkagîra bûra bunthe watho buugîîte tatiga gacuncî kamwe, i bûmwe na aunîîte bunthe,

¹¹n'ûntû woora augire, “Ûtikaathûngîîre” nwa we kaîrî augire, “Ûtikaûragane.” Kwoogu wana ûkeegua ûtirathûngîîra, îndî ûkûûragana, nwa ta bûmwe, woû ûrî muuni watho.

¹²Kwoogu bûkîaria na bûkîrûtha mantû, rûthagaani bûkîmenyaga bûkaagambithua na watho bûra bûthaûraga muntû

¹³n'ûntû muntû ûra ateeganagua kîao, wana we Ngai atimwîgua kîao akîmûgiitîra îgamba. Îndî ûra eeganagua kîao naateegua ûguaya bwa îgamba.

¹⁴Inkûbûûria, aruayia na aarayia, kûrî na gîtûmi kîrîkû muntû kuugaga arî na wîtîgio atakwonania na mantû mara arûthaga? Wîtîgio ta bûbu bwamwonokia?

¹⁵Kwa ngerekano, ga tuuge kûrî na mûruanyûkwe kana mwaranyûkwe ndeni ya Kîrîstû atarî na nguo kana irio bia kûrîa.

¹⁶Kûrî na gîtûmi kîrîkû ûmwîra, “Îthi bwega, wîrigîîrie mpîo, na ûrîe ûbae,” ûtakûmwaa bibu atarî na bio?

¹⁷I ta bu gûkari ûgu. Wîtîgio bwa muntû bunka atakûrûtha mantû meega i wîtîgio bûûkuû.

¹⁸Muntû nwa auge, “Niû i wîtîgio ndî.” Ûngî n'we akauga, “Niû i mantû meega ndûthaga.” Woû uugaga ûgu rî, tambonia bûra muntû aûmba kwîgua arî na wîtîgio na atakûrûtha mantû meega. Niû ngakwonia wîtîgio bwakwa kuumania na mantû mara ndûthaga.

¹⁹Ingûkûûria, woû ûtiîtîgîîtie Ngai n'ûmwe? Bûbu n'ûntû bwega. Îndî anga nwiyî kana kinya irundu biithûûku ibiîtîgîtie ûgu na ibiinainaga n'ûguaya?

²⁰Woû ûtakîîte mûno! Nûkwenda nkwonie wîtîgio bwa muntû atakûrûtha mantû meega bûtirî gîtûmi?

²¹I mbi yatûmire Ngai oona Îburaîmu, kîûyûyû gîetû arî muntû ûmwagîru? Ti bûra aarûthire weegua neetîgagîîria kûruta Isaka mwana wake arî kîgongwana?

²²Aabu ûtikwona wîtîgio bwake na mantû mara aarûthire imakûrutanîria ngûgî amwe? Mantû mara Îburaîmu aarûthire i mo maatûmire wîtîgio bwake bûtuîka wîtîgio bûûyûru.

²³Na wabu bûra *Maandîko Maatheru maugîîte bwaingîk atî, “Îburaîmu neetîgîîtie Ngai. Na n'ûntû bwa wîtîgio bwake Ngai aamûthûkiirie arî muntû ûmwagîru.” Gîkî i kîo gîatûmire Îburaîmu eetwa mûcoore wa Ngai.

²⁴Kwoogu bûtikwona muntû athûkagua n'ûmwagîru kuumania na mantû meega mara arûthaga, na t'ûntû bwa bûra arî na wîtîgio bunka?

²⁵Na nwa ta bu Ngai aathûkiirie kinya Raabu, mûka ûra aarî îrwaya, arî ûmwagîru n'ûntû bwa bûra aarûthire rîra aagwatire ûgeni Aisiraeri bara baarî athigaani, abatoorookithia baathi na njîra îngî.

²⁶Ta bûra mwîrî ûtarî na mwoyo ûtuîkaga n'ûmûkuû, i ta bu wîtîgio bûkari. Wîtîgio bwa muntû gûtarî bu akûrûtha i wîtîgio bûûkuû.