Read tharaka NJAKUBU 3 Bible Online

NJAKUBU 3 - tharaka bible

NJAKUBU 3

¹Aruayia na aarayia, baingî beenu bûtikeerirîîrie gûtuîka arutani ba kiugo kîa Ngai, n'ûntû ibwiyî tiû bara tûrutanaga bara bangî kîo îgamba rîetû ûkeegua rîrî rîûmo nkûrûki ya bara bangî.

²Twinthe itûbîtagia na njîra inyingî mûno. Ûkaaya kwîgua kûrî we atabîtagia na mîgambo îra aaragia, ûyu i mwîtîgîri ûmûgima. We nwa aûmbe kwatha mwîrî wake unthe.

³Antû boogagîîra gacuuma kaniini kanyuani ka mbaraathi kaingo ibaathîkîra baûmba gûcierekeria wanaara bakeenda.

⁴Kana thûkia ngerekano ya meeri. Meeri n'înene mûno na itindîkagwa i ruuo rûûnene. Îndî ndereba amîtarithagia wanaara akeenda agîtûmagîra kamûtî kaniini.

⁵Ûgu i ta bu rûrîmî rûkari. I karûngo kaniini ka mwîrî îndî nwa kaarie rwaria rûûnene rwa wîkumia. Tathûgaania wone bûra karathe kamwe kaûmba gûtûma mwithû unthe ûbea.

⁶Na kaîrî rûrîmî rûkari ta mwanki. Rûgwataga mwanki wa îcamaarîro rûgatambia ûthûûku rûgateereera mwîrî wa muntû unthe na rûkeenyangia ûtûûro bwake bunthe.

⁷Nyamû cia kîthaka, nyoni, ira itambaga na nthî na kinya ira ikaraga rûûyîîni, cionthe muntû naûmbaga gûcirutana ikamwathîkagîra.

⁸Îndî rûrîmî, gûtirî muntû aûmba kûrûrutana rûmwathîkîra. Ru n'ûthûûku bûtaathîka na rûrî ûrogi bûûî.

⁹Rûrîmî warûra tûkumagia na ru Mwathani Baaba wetû nwa ru tûrîrîkaga na ru bara bangî, antû Ngai aûmbîîte barî ngerekano yake.

¹⁰Atî kanyua wakamwe nwa ko kaumaga mîgambo ya nkaatho na ya kûrîrîkana. Aruayia na aarayia, ûûgû ti bu kûbatîîrue kwîgua gûkari.

¹¹Gûtirî kînyaka kîûmba kwîgua kiumaga rûûyî rwega na rûûthûûku.

¹²Aruayia na aarayia, mûkûyû ûtiûmba gûciara ncabiibû, na mûcabiibû ûtiûmba gûciara nkûyû. Na kinya kînyaka kîa rûûyî rûûthûûku gîtiûmba kuuma rûûyî rwega.

¹³N'ûû wacienu arî na ûûme na ûmenyo? Weegua kûrî we noonanie na mûtûûrîre wake ûmwega na mantû meega mara arûthaga arî na kwinyithia kuumania na ûûme bûra arî.

¹⁴Îndî ûkaaya kwîgua nkorooni yaku ûrî muntû wa rûriitho, marûrû na wa kwenda kûgîta wenka, woû ûtikaarie ûrongo ûgîîkumîria ûûme bwaku.

¹⁵Ûûme ta bûbu ti bwa kuuma kîrî Ngai, i bwa kîînthîgûrû n'ûntû ti bwa gîîkîrundu. Na i Nkoma abûreetaga.

¹⁶Bantû onthe antû barî na rûriitho na kwenda kûgîta nkûrûki ya bara bangî, bantû agu gûtiûraga gîtuma na ûthûûku bwa mîthemba yonthe.

¹⁷Îndî ûûme bwa kuuma kîrî Ngai i bûûtheru, ibwendeete ûkiri, ûbooreru, kûthikanagîîria na kûûyûrwa i kîao. Bûciaraga mantû meega, bûtirî kîmenyano na bûtiîtuîkithagia kîra muntû atarî.

¹⁸Ûra eendeete ûkiri aandaga na ûkiri agaketha wagîru.