Read tharaka NJAKUBU 4 Bible Online

NJAKUBU 4 - tharaka bible

NJAKUBU 4

¹I kû ndûa na matheta gatîgatîîni keenu biumaga? Biumanagia na mawîrirîîria meenu maathûûku mara makaraga makîrûaga ndeni ya mîîrî yenu.

²Bwîriragîîria mûno kûgîa into îndî bûtibionaga. Rîra bwaga bira bwendaga bwîgua bûrî na bio i rîo bwanjagîîria matheta na bûkarûa kana bûkaûragana. Bwagaga bira bûcûaga n'ûntû bûtirombaga Ngai abwaa bio.

³Kaîrî wana bwaromba bûtieyagwa n'ûntû bûrombaga bûrî na mworooto ûmûthûûku wa kwenda kûbitûmîra kwingia mantû mara bwîriragîîria.

⁴Biû bûtirî mwanya na arugûri. Ka bûtaiyî ûgatuîka mûcoore wa mantû ma nthîgûrû ûgûtuma ûnthû na Ngai? Kwoogu ûra eendaga gûtuma ûcoore na mantû ma nthîgûrû eetuîkithagia mûnthû wa Ngai.

⁵Bûtikaathûgaanie gûtirî bu *Maandîko Maatheru maugîîte, ara kwandîkîîtwe, “Ngai arî bata na mwoyo ûra aatwere.”[2]

⁶Îndî kîrî mantû mama Ngai natweyaga ûtugi bûra bûrî inya nkûrûki, ta bûra Maandîko Maatheru maugîîte, “Ngai nathûîre mwîkumia îndî ûra eenyiagia namweyaga ûtugi.”

⁷Kwoogu înenkanîreeni kîrî Ngai bûregane na Nkoma bwone abûkuthûke.

⁸Îthengangîraani Ngai bwone aayanga akubî naabi. Îrireeni, eeyia baba. Theriani nkoro cienu, biû antû ba nkoro ciîrî.

⁹Gwatwaani i kîîthikîîro, rîraani bûminuke, kûtheka kwenu igûtuîke i kîrîro. Na gîkeno kîenu igîtuîke kîeba.

¹⁰Înyithieni mbere ya Mwathani n'we akabûneneithia.

¹¹Aruayia na aarayia, tigaani gûtuuyanagîîra n'ûntû muntû ûra atuuyagîîra ûra ûngî kana akamûgiitîra îgamba, eegagua akîbûthia watho na akabuagîra gîtûmi. Na rîra ûkwagîra watho gîtûmi, woû ûtirî ûra ûbuathîkagîra kaîrî n'ûntû ka ûbubûthagia.

¹²I Ngai wenka eeyanire watho, na n'we wenka mûgambithania. Nwa we wenka aûmba kwonokia kana kwînyangia. Ûrîthûgaania ûrî ûû rîra ûkûgiitîra muntû ûra ûngî îgamba?

¹³Thikîîriani mbwîre biû naabi buugaga, “Îmunthî kana rûû tûkauma aaga tûthi taûni nna tûkare noogo mwanka ûthire watûringaga biacaara cietû na tûkîonaga baita.”

¹⁴Bûkiuga ûgu, bûtiiyî bûra gûgaakara rûû! Mwoyo wenu îîndî i mbi? Mwoyo i ta ngooki bûra yonekanaga kagiita gaakai, îgacooka îkaûra.

¹⁵Bûbatîîrue buuga ûûgû, “Mwathani eenda tûgaatûûra na tûrûthe ûûgû na ûûgû.”

¹⁶Îndî naabi bûrî eekumia na bwendaga kwîbûkîîria. Na bûbu n'ûntû bûûthûûku.

¹⁷Kwoogu ûra aiyî ûntû bwega îndî atiburûthaga, i meeyia mamu.