Read tharaka 1 PETÛRÛ 5 Bible Online

1 PETÛRÛ 5 - tharaka bible

1 PETÛRÛ 5

¹Ndî na ûntû nkwenda kwîra akûrû beenu ba kanica. Niû ningwa ndî mûkûrû na ndî mûkûûyî wa kûnyamaarua kûra Kîrîstû aanyamaariirue. Nkeegua ndî ûmwe wa bara bakoonekana na mwago ûra ûkoonanua.

²Ndîbûkinyîîria bûrîîthagie ng'ondu cia Ngai, nabwîtîgîîtie na cio. Ciraithîreeni na nkoro ya kwenda na t'ûntû na bûra bwagîrîtwe bûciraithîra. Rûthagaani ûgu n'ûntû ibûgûkeneera kûruta ngûgî înu îndî t'ûntû bwa ûtonga.

³Bûtigaatûmîre ûnene bwenu kwinyîîria bara bwetwe bûmenyeera. Îgaguani bûrî ngerekano îmbega kîrî bo.

⁴Na rîra Mûrîîthi ûra mûnene akaaya bûkeewa kîewa, ta kîo nthûmbî ya ûnene îrî mwago îra îtakîthira rî kana rî.

⁵Na biû naabi, aana beethî, înyithagieni kîrî akûrû. Bwinthe bûbatîîrue wamuntû eenyithagia kîrî ûra ûngî, n'ûntû *Maandîko Maatheru maugîîte, “Ngai atigwatanagîra na eekumia, eeyaga ûtugi bara beenyithagia.”

⁶Bûrî njaraani irî inya mûno cia Ngai. Kwoogu înyithagieni kaingo akaabûneneithia rîra îgiita rîgaakinya.

⁷Mweyageeni mathîîna meenu monthe n'ûntû n'we abûmenyagîîra.

⁸Karagaani bwîthuuranîrîte, bwîmenyeereete! Mûnthû wenu Nkoma athiûrûkaga ta cimba îkîruruma îgîcûa muntû wa gûtaguta.

⁹Bûtikaareke mûnthû abûkîria inya. Karagaani bwîrikîîtie wîtîgioni bwenu. Ibwiyî wana eetîgîri bara bangî nthîgûrû yonthe barînyamaarua wata ûgu bûkûnyamaarua.

¹⁰Îndî nyuma ya kûnyamaarua bantû a kagiita gaakai, Ngai mwene ûtugi bunthe ûra aabwîtire mwagooni wake wa tene na tene gûkûrûkîîra kîrî Kîrîstû Yiesû akabûûyûria, akabwongeera inya, na akabûrûngamia mûcingiini ûmwitu.

¹¹Inya ya Ngai îroonekanaga tene na tene. Aameni.

¹²Ndîbwandîkîra baarûa îno înkubî ngîteethagîîrua i Sairas. Mmûthûkîîtie i mûruayia mwîtîgua ndeni ya Kîrîstû. Na gîtûmi gîakwa gîa kûbwandîkîra i mbûûmîîria na mbwîra mantû mama ma ûtugi bwa mma bwa Ngai. Kwoogu îrikieni kîrî bu.

¹³Antû ba kanica ba naaga Mbabironi[7] bakûbûkeethia. Bathuurîîtwe i Ngai wata biû. Na kinya Maariko akûbûkeethia. Mwonaga ta mwana wakwa.

¹⁴Keethanagiani na wendo bwa eetîgîri. Bûrookaraga na ûkiri bwinthe biû bûrî ndeni ya Kîrîstû.