Read tharaka 2 PETÛRÛ 3 Bible Online

2 PETÛRÛ 3 - tharaka bible

2 PETÛRÛ 3

¹Eendwa, îno n'yo baarûa yakwa ya ciîrî kûbwandîkîra. Na baarûani ino irî ciîrî ndîcûa kwona kana meeciiria meenu maatheru makaaririkana mantû mama.

²Ndîenda bûririkana mantû mara iroria biitheru bia Ngai biaroriirie tene mûno. Na inkwenda bûririkana maathana ma Mwathani Mwonokia wetû mara bwarutanirwe n'atûmwa bara aatûmire kîrî biû.

³Mûno mûno, ibûbatîîrue bûmenya ntugûûni cia mûthiro gûkeegua kûrî na antû bakaanyûrûntaga ntheto ya Ngai. Bakaarûthaga mantû kûringana na mawîrirîîria maao maathûûku.

⁴Na bakaamînyûrûntaga bakauga, “Yiesû akuuga akaaya kaîrî îîndî arî kû? Kuuma wo tene rîra nthîgûrû yaûmbirwe nthuke cia biûyûûyû ciakua mwanka îmunthî tûrî mantû makari wabûra maakari.”

⁵Îndî antû babu ibaûragîria matû bakarega gwîtîgîîria ûmma bungwa atî, tene Ngai i kiugo aatûmîîre auga ikwîgue kûrî na nthîgûrû na îgûrû, na ciegua irî oogo, aategategia rûûyî nthîgûrû yaumîra.

⁶Na rûûyî warûru i ru eenyangiirie na ru nthîgûrû rîra auyûriirie rûûyî kunthe.

⁷Na i kiugo kaîrî Ngai aatûmîîre auga nthîgûrû na îgûrû rîra rîrî oogo îîndî aîgîîte akaabîîthia na mwanki ntugû îra akaagiitîra antû îgamba na athirie bara baaregire kûmwathîkîra.

⁸Na, eendwa, bûtikaariganîrueni n'ûntû bûmwe. Kîrî Ngai ntugû îmwe i bûmwe na mîanka ngiri, na mîanka ngiri i bûmwe na ntugû îmwe.

⁹Kûringana na bûra antû bamwe bathûgaanagia, boonaga Ngai atirî mpwî cia kwingia wîrane bwake. Îndî i kagiita abwete[6] n'ûntû gûtirî muntû eendaga aûra. Eendaga antû bonthe beerira meeyia maao.

¹⁰Ntugû ya gûcooka kwa Mwathani îgaakara ta ntugû îra mwamba aayaga. Kagiita gaku îgûrû rîkaathira na gîtuma kîînene mûno, bionthe bira birî ku bithirue na mwanki. Kinya nthîgûrû na bira birî ku bikaabîîthua.

¹¹N'ûntû ûgu i bu bionthe bikaathirua, thûgaaniani bûmenye bûbatîîrue bwîgua bûrî antû bakari ata. Mîkarîre yenu îbatîîrue îîgua îrî îmîtheru na îrî ya kîîngai,

¹²bweteereete ntugû ya kûûya kwa Mwathani. Karagaani bûrî na wendo bwa gweteera ntugû înu, rîra îgûrû rîkaabîîthua rîthirue, kîra gîntû kîbîîthue kîthire kûrû.

¹³Îndî itweteereete îgûrû rîngî rîîyerû na nthîgûrû îngî înjerû kûringana na wîrane bwa Ngai, kûra wagîru bûtûûraga.

¹⁴Kwoogu, eendwa, cûûgiani mûno bûkarage bûrî baatheru nkorooni bûtarî na mabîtia na bûrî na ûkiri bweteereete ntugû îra Mwathani akaaya.

¹⁵Thûgaaniani bwone bûra Ngai arî mwinyîkîria. N'ûntû mbere ya ntugû ya kûgiitîrwa îgamba îkinya nakwenda kûnenkera antû kaanya ga kwonoka, wata bûra mûruayia wetû, mwendwa, Paûrû, aabwandîkîîre kûringana na ûûme bûra Ngai aamwete.

¹⁶Mantû wamamu nwa mo agweteete baarûani ciake cionthe. Na mamwe ma mara marî baarûani ciake i maûmo kûmenyeka. Bara batarî na ûmenyo, bara batarikîîte wîtîgioni bataûraga mantû mamu bakîbîtagia ta bûra bataûraga kûra kûngî *Maandîkooni Maatheru. Kûrûtha ûgu i kwîbînyangia beereetagîra bongwa.

¹⁷Îndî biû, eendwa, n'ûntû ibûkaanîîtue mantû mama, îmenyeereeni bûtikaaye kûbîtithua i mabîtia ma antû batarî ba mîkarîre îmîega buuma mûrûngamooni wenu.

¹⁸Îthiini na mbere kwongeerwa ûtugi na kûmenya Mwathani Mwonokia wetû, Yiesû Kîrîstû. Arookumua îîndî mwanka tene na tene. Aameni.