Read tharaka 1 NJOANA 2 Bible Online

1 NJOANA 2 - tharaka bible

1 NJOANA 2

¹Aana baakwa, mbwandîkîrîte baarûa îno kaingo bûtikaaye kwîyia, îndî ûra akeeyia namenye tûrî na ûra atwaragîîria kîrî Ngai, ta we Yiesû Kîrîstû ûra mwagîru.

²N'ûntû bwa kwîruta gwake arî kîgongwana itûrekagîrwa meeyia meetû, na ti tiû twinka îndî n'antû bonthe.

³Ûkaaya kwîgua tûkaathîkîra maathana maake i rîo tûkaamenya wabu itûmwiyî.

⁴Muntû akaaya kuuga, “Niû imwiyî,” îndî atakwathîkîra maathana maake, ûyu i mûûrongo na ûmma bûtirî ndeni yake.

⁵Îndî ûra aathîkagîra kiugo gîake, ûyu n'we oonanagia neendeete Ngai kûrû. Ûgu i bu tûûmba kûmenya tûrî ngwatanîro na Ngai.

⁶Muntû ûra augaga arî na ngwatanîro na Mwathani nwa mwanka mîtugo yake îkare ta bûra ya Yiesû Kîrîstû yakari.

⁷Eendwa, yathana rîrî nkûbwandîkîra tika rîrî rîgeni. I yathana warîra rîkûrû, rîra bweegiirue kuuma kîambîrîria. I rîo ûrutani bûra bweegiirue kuuma kîambîrîria.

⁸Îndî yathana rîrî nwa rîîyerû. Ûmma bwa rîo bwonekanaga kîrî Kîrîstû na kîrî biû. Kwathîkîra kûra bwathîkagîra yathana rîrî kûrîonania mwindu nûkûthira na werû bwa mma ibûkûmûrîka.

⁹Muntû ûra augaga arî werûûni na atiendeete mwîtîgîri ûra ûngî, ûyu i mwinduuni arî kinya îîndî.

¹⁰Ûra eendeete mwîtîgîri ûra ûngî arî werûûni na ndeni yake gûtirî ûntû bûûthûûku bûra bûûmba kûgiitaria muntû ûngî.

¹¹Muntû ûra athûîre mwîtîgîri ûra ûngî ûyu i mwinduuni arî na atikûmenya bûra athiîte n'ûntû mwindu ûmûtuîkithîîtie ntûngi.

¹²Biû twana, mbwandîkîrîte n'ûntû ibûrekeretwe meeyia meenu riîtwaani rîa Yiesû Kîrîstû.

¹³Akûrû, mbwandîkîrîte n'ûntû ibwiyî ûra aarî oogo kuuma kîambîrîria. Aana beethî, mbwandîkîrîte n'ûntû ibûcindîîte ûra mûthûûku.

¹⁴Twana, mbwandîkîrîte n'ûntû ibwiyî Baaba. Akûrû, mbwandîkîrîte n'ûntû ibwiyî ûra aarî oogo kuuma kîambîrîria. Aana beethî, mbwandîkîrîte n'ûntû bûrî na inya, n'ûntû kiugo kîa Ngai igîkaraga ndeni yenu na n'ûntû ibûcindîîte ûra mûthûûku.

¹⁵Bûtikeende nthîgûrû kana into bia yo n'ûntû muntû ûra eendeete nthîgûrû atiendeete Baaba.

¹⁶Mantû monthe ma nthîgûrû mara antû beeriragîîria, mara antû boonaga bakameenda, na into bionthe bia nthîgûrû bira antû beekumagîria, gûtirî kîo kiumîîte kîrî Baaba. Bionthe i bia nthîgûrû.

¹⁷Nthîgûrû na mantû ma yo mara antû beendaga makaathira, îndî ûra arûthaga bûra Ngai eendaga agaatûûra tene na tene.

¹⁸Aana baakwa, mûthiro ûrî akubî. Ibwîgîîtue mûregi Kîrîstû akaaya na îîndî ûgu aregi Kîrîstû ibaumîrîte baingî. Na gîku i kîo gîgûtûma tûmenya mûthiro ûrî akubî.

¹⁹Antû baba bataarî ba ngwatanîro yetû. Na gîku i kîo gîatûmire baathûka batûtiga n'ûntû ûkeegua baarî beetû batikîthi. Îndî baathiire kaingo kûmenyeka bwega atî bonthe bataarî ba ngwatanîro yetû.

²⁰Îndî biû ibwiyî mantû monthe n'ûntû ibwîtûûrîrîtue Kîrundu Ûmûtheru.

²¹Ntikûbwandîkîra i bûra bûtaiyî ûmma. Ndîbwandîkîra n'ûntû ibûbwiyî na n'ûntû ibwiyî gûtirî ûrongo buumaga ûmmaani.

²²Îîndî rî, mûûrongo n'ûû? N'ûra augaga Yiesû t'we Kîrîstû. Ûyû n'we mûregi Kîrîstû ûra aregaga Ngai Baaba na Mwana wake.

²³Ûra aregeete Mwana naregeete Îthe. Ûra eetîgagîra Mwana arî na ngwanatîro na Îthe.

²⁴Kwoogu menyagîîraani ûrutani bûra bweegiirue kuuma kîambîrîria, n'ûntû bwarûtha ûgu bûgaakaraga ndeni ya Mwana na Îthe.

²⁵Ngai akaingia wîrane bûra aatwere ta bu mwoyo wa tene na tene.

²⁶Mantû mama mbwandîkîrîte makoneetie bara bakwenda kûbweneeria.

²⁷Îndî biû bûrî na Kîrundu Ûmûtheru ûra bwetûûrîîrue. Kwoogu bûtikwenda muntû ûngî wa kûbûrutana. Kîrundu Ûmûtheru abûrutanaga mantû monthe na mara monthe abûrutanaga i ma mma, ti ma ûrongo. Kwoogu thingatagaani bûra abûrutanaga. Na karagaani ndeni ya Kîrîstû.

²⁸Kwoogu îîndî, aana baakwa, karagaani bûrî ndeni ya Kîrîstû kaingo ntugû îra agaacooka tûtikaaye kwîgua nthoni kana ûguaya.

²⁹Ibwiyî n'ûmwagîru na ibwiyî muntû ûra arûthaga bûra kwagîrîte i mwana wake.