Read tharaka 1 NJOANA 3 Bible Online

1 NJOANA 3 - tharaka bible

1 NJOANA 3

¹Baaba oonanagia natwendeete mûno na gûtwîta aana baake, na wabu tûrî bo. I kîo n'ûntû antû ba nthîgûrû batatwiyî n'ûntû kinya Ngai batimwiyî.

²Eendwa, îîndî tûrî aana ba Ngai na mwanka agu tûtiiyî tûgaakara ata. Îndî itûkûmenya rîra akaaya tûkaabuanaana n'we na tûkamwona bûra akari bu bungwa.

³Na muntû wonthe ûra arî na wîrîgîîro bûbû neetheragia n'ûntû we n'ûmûtheru.

⁴Ûra eeyagia i watho eegagua akiuna n'ûntû wîyia i kuuna watho.

⁵Ibwiyî Yiesû aayire kaingo tûrekerwa meeyia meetû na we wengwa atirî wîyia.

⁶Ûra wonthe akaraga ndeni ya Kîrîstû atikaraga akîîyagia. Îndî ûra akaraga akîîyagia atimwiyî buru.

⁷Aana baakwa, muntû atikaabwenie. Ûra arûthaga bûra kwagîrîte n'ûmwagîru ta bûra Kîrîstû arî ûmwagîru.

⁸Muntû ûra akaraga akîîyagia ûyu n'wa Nkoma, n'ûntû Nkoma yeeyiirie kuuma kîambîrîria. Mwana wa Ngai aayire kaingo eenyangia ngûgî cia Nkoma.

⁹Ûra acierwe i Ngai atikaraga akîîyagia n'ûntû mûkarîre wa Ngai ûrî ndeni yake. Na n'ûntû Ngai n'we Îthe, ûra acierwe i Ngai atiûmba gûkara akîîyagia.

¹⁰Bûbu i bu tûûmba kûmenya na bu aana ba Ngai na ba Nkoma. Muntû ûra atarûthaga bûra kwagîrîte, ûra ateendaga eetîgîri bara bangî, ûyu t'wa Ngai.

¹¹Ûrutani bûra bweegiirue i bûbû—nwa mwanka twendanage.

¹²Tûtigaakare ta Kaini ûra wa Nkoma, ûra aûragire mûruagina. I mbi yatûmire amûûraga? N'ûntû Kaini aarûthaga ûthûûku, îndî mûruagina aarûthaga bûra kwaagîrîte.

¹³Bûtikaarigare bwamenwa n'antû ba nthîgûrû.

¹⁴Itûkûmenya bwega ituumîîte gîkuûni twathûngîra mwoyooni n'ûntû itwendeete eetîgîri bara bangî. Ûra ateendeete eetîgîri bara bangî atauma gîkuûni.

¹⁵Muntû ûra athûîre mwîtîgîri ûra ûngî i mûûragani. Na ibûkûmenya bwega gûtirî mûûragani arî na mwoyo wa tene na tene ndeni yake.

¹⁶Kwîruta kwa Yiesû na gûkua n'ûntû bwetû i ku gûtwonagia bûra wendo bûkari. Wana tiû itwagîrîtwe gûkua n'ûntû bwa eetîgîri bara bangî.

¹⁷Muntû akaaya kwîgua arî na into biingî bia kûmûgana na akoona mwîtîgîri ûra ûngî atarî gîntû na akarega kûmûteethia, n'ata muntû ta ûyu aûmba kuuga arî na wendo bwa Ngai ndeni yake?

¹⁸Aana baakwa, twonanagieni wendo bwetû i bwa mma na mantû mara tûkaarûthaga, îndî ti na kwaria gunka.

¹⁹Wendo bwetû kîrî eetîgîri bara bangî i bu bûgaatûma tûmenya tûrî na ûmma, na atî, twaûmba kûrûngama mbere ya Ngai tûtarî na ûguaya nkorooni cietû.

²⁰Ûkeegua nkoro cietû igîtûgambithagia, Ngai n'we mûnene kîrî cio na naiyî mantû monthe.

²¹Eendwa, îndî ûkeegua nkoro cietû itagûtûgambithia, tûkeegua tûrî na kûûmîîria mbere ya Ngai.

²²Bionthe bira tûrombaga itweyagwa bio n'ûntû itwathîkagîra maathana maake na itûrûthaga mantû mara mamûkenagia.

²³Na yathana rîake rîra atwete, n'atî twîtîgîre Mwana wake, Yiesû Kîrîstû na twendanage ta bûra atwathîîte.

²⁴Ûra aathîkagîra maathana maake akaraga ndeni ya Ngai, na Ngai n'we arî ndeni yake. Na Kîrundu ûra aatwere n'we atûmaga tûmenya Ngai arî ndeni yetû.