Read tharaka 1 NJOANA 4 Bible Online

1 NJOANA 4 - tharaka bible

1 NJOANA 4

¹Eendwa, bûtigeetîgagie irundu bionthe bira birî na antû. Ambagaani bûkabigeria bûkoona kana i bia Ngai, n'ûntû iroria biingî bia ûrongo ibiumîrîte nthîgûrû.

²Ûûgû i bu tûûmba kûmenya muntû arî na Kîrundu wa Ngai. Ûra augaga Yiesû aayire arî muntû, Kîrundu ûyu n'wa Ngai.

³Îndî kîrundu kîonthe kîra kîugaga Yiesû ataaya arî muntû, kîrundu gîku gîtiumîîte kîrî Ngai. Kîumîîte kîrî mûregi Kîrîstû ûra bwiyî akaaya, na îîndî ûûgû arî gûkû nthîgûrû.

⁴Îndî biû, aana, bûrî ba Ngai, na ibûbacindîîte n'ûntû Ngai ûra bûrî n'we n'ûmûnene kîrî ûra arî nthîgûrû.

⁵Iroria bibi bia ûrongo biaragia mantû ma nthîgûrû n'ûntû i bia nthîgûrû, na i ntûma antû ba nthîgûrû babithikagîîria.

⁶Îndî tiû tûrî ba Ngai. Bara bamwiyî ibatûthikagîîria. Bara batamwiyî batitûthikagîîria. Ûgu i bu tûûmba kûmenya Kîrundu wa mma na kîrundu kîa ûrongo.

⁷Eendwa, twendanageeni n'ûntû wendo buumaga kîrî Ngai. Ûra eendanaga i mwana wa Ngai na naiyî Ngai.

⁸Ûra ateendanaga atiyî Ngai, n'ûntû Ngai i wendo.

⁹Ngai naatwoniirie wendo bwake na njîra ya gûtûma Mwana wake wa kîmoomwe nthîgûrû, kaingo twona mwoyo n'ûntû bwake.

¹⁰Na wendo bûbû bûkari ûûgû. Ti tiû tweendire Ngai, îndî i Ngai aatwendire aatûma Mwana wake atuîka kîgongwana gîa gûtûma tûrekagîrwa meeyia meetû.

¹¹Eendwa, weegua i bu Ngai aatwendire ûgu na tiû itûbatîîrue twendanaga.

¹²Gûtirî muntû oona Ngai. Îndî ûkeegua tûkeendanaga twingwa, Ngai nakaraga ndeni yetû na wendo bwake ibûtûûyûraga.

¹³Tûmenyaga tûrî ndeni ya Ngai na Ngai arî ndeni yetû n'ûntû natwete Kîrundu wake.

¹⁴Itwoneete na itûkûûyagîîra atî Baaba naatûmire Mwana wake atuîka Mwonokia wa nthîgûrû.

¹⁵Ûra augaga Yiesû i Mwana wa Ngai, Ngai nakaraga ndeni yake na n'we nakaraga ndeni ya Ngai.

¹⁶Na tiû twingwa itûmenyeete na itwîtîgîîtie wendo bûra Ngai atwendeete na bu. Ngai i wendo. Ûra akaraga wendooni akaraga ndeni ya Ngai na Ngai nakaraga ndeni yake.

¹⁷Wendo bûûyûragua ndeni yetû kaingo tûûmba kûrûngama tûtarî na ûguaya mûthenya wa kûgiitîrwa îgamba n'ûntû ûtûûro bwetû gûkû nthîgûrû bûkari ta bwa Kîrîstû.

¹⁸Wendo bûtirî ûguaya. Wendo bwa mma ibûrûngagia ûguaya. Kwoogu muntû ûra arî na ûguaya, wendo bwake ti bwa mma n'ûntû ûguaya i bwa îkaanûkia.

¹⁹Twendeete Ngai n'ûntû n'we aatwendire mbere.

²⁰Ûra augaga neendeete Ngai na athûîre eetîgîri bara bangî n'ûrongo aaragia, n'ûntû atiûmba kwenda Ngai ûra atoona, îndî amena mwîtîgîri ûra oonaga.

²¹Yathana rîra Kîrîstû atwete i rîrî—ûra eendeete Ngai nwa mwanka eende mwîtîgîri ûra ûngî.