Read tharaka 1 NJOANA 5 Bible Online

1 NJOANA 5 - tharaka bible

1 NJOANA 5

¹Ûra eetîgîîtie Yiesû n'we Kîrîstû, ûyu i mwana wa Ngai. Na ûra eendeete îthe neendeete kinya mwana.

²Tûmenyaga itwendeete aana ba Ngai n'ûntû itwendeete Ngai na itwathîkagîra maathana maake.

³Rîra twathîkagîra maathana ma Ngai i rîo twonanagia itûmwendeete na maathana maake ti maûmo.

⁴Ûra aciarîîtwe i Ngai nacindîîte nthîgûrû na tûcindaga nthîgûrû na njîra ya wîtîgio bwetû.

⁵Na n'ûû we aûmba gûcinda nthîgûrû, twanga ûra eetîgîîtie Yiesû i Mwana wa Ngai?

⁶Yiesû Kîrîstû noonaniirue i Mwana wa Ngai na njîra ya rûûyî na nthakame ya gîkuû gîake. Ataaya na rûûyî runka. Aayire na rûûyî na nthakame. Kîrundu nakûûyagîîra ntheto ino i cia mma n'ûntû Kîrundu aaragia ûmma.

⁷Akûûyî i bathatû. Na bo i

⁸Kîrundu, rûûyî na nthakame. Na bonthe barî bathatû ibagwatanagîra.

⁹Itwîtîgagia ûkûûyî bûra antû beeyanaga. Îndî ûkûûyî bwa Ngai bûra eeyanaga bwa Mwana wake i bu bûnene.

¹⁰Ûra eetîgîîtie Mwana wa Ngai arî na ûkûûyî nkorooni. Îndî ûra ateetîgîîtie Ngai namûtuîkithagia mûûrongo n'ûntû atiîtîgagia ûkûûyî bwa Ngai bûra augaga îgûrû rîa Mwana wake.

¹¹Ûkûûyî bwa Ngai buugaga, Ngai atwete mwoyo wa tene na tene na mwoyo ûyu ûrî ndeni ya Mwana wake.

¹²Ûra arî na Mwana wa Ngai arî na mwoyo. Îndî ûra atarî n'we atirî na mwoyo.

¹³Mbwandîkîrîte baarûa îno kaingo bûmenya bûrî na mwoyo wa tene na tene, n'ûntû ibwîtîgîîtie Mwana wa Ngai.

¹⁴Tûtirî na ûguaya mbere ya Ngai tûkîmûromba n'ûntû itwiyî natwîgagua. Na tûkaaya kûmûromba gîntû kûringana na bûra eendaga, natweyaga kîo.

¹⁵Itwiyî n'ûmma neegagua rîra tûkûmûromba. Kwoogu kinya bira tûmûrombaga itwiyî natweyaga.

¹⁶Muntû akaaya kwona mwîtîgîri ûra ûngî akîrûtha wîyia bûtaûmba kûreeta gîkuû, namûrombere Ngai ûra akamwaa mwoyo. Kûrî wîyia bûûmba kûreeta gîkuû. Ntikuuga bûrombe n'ûntû bwa wîyia ta bûbû.

¹⁷Mabîtia monthe i meeyia, îndî ti meeyia monthe mareetaga gîkuû.

¹⁸Itwiyî ûra aciarîîtwe i Ngai atikaraga meeyiani n'ûntû Mwana wa Ngai namûrigagîîria atikaathûkue i Nkoma.

¹⁹Itwiyî tûrî ba Ngai na itwiyî antû bonthe ba nthîgûrû baathagwa i Nkoma.

²⁰Itwiyî Mwana wa Ngai naayire na atwa ûmenyo, kaingo tûûmba kûmenya Ngai wa mma. Tûkaraga ndeni ya Ngai wa mma na ndeni ya Mwana wake Yiesû Kîrîstû. Ûyu n'we Ngai wa mma na n'we mweyani wa mwoyo wa tene na tene.

²¹Aana baakwa, îmenyeereeni kuuma kîrî ngai cia mîbuanaano.