Read tharaka 2 NJOANA 1 Bible Online

2 NJOANA 1 - tharaka bible

2 NJOANA 1

¹I niû Mûkûrû ngûkwandîkîra woû mwekûrû athuurîîtwe i Ngai na aana baaku. Mbwendeete mûno na wendo bwa mma. Na ti niû ninka mbwendeete, bwendeetwe i bonthe bara baiyî ûmma.

²Na ûmma bûbû bûgaatûûra kîrî tiû tene na tene.

³Ûtugi, kîao na ûkiri bwa Ngai Baaba na bwa Yiesû Kîrîstû, Mwana wake, bigaakaraga naabi ûmmaani na wendooni.

⁴Indakenire mûno rîra ndamenyire aana bamwe baaku ibatûûraga ûmmaani ta bûra yathana rîra tweerwe i Baaba riugîîte.

⁵Ka ngûkwîra, mwekûrû, twendanageeni. Kwoogu ntigûkwandîkîra yathana rîîyerû, nwa warîra tûtûûraga na rîo kuuma kîambîrîîria.

⁶Wendo na bu n'atîrî, tûkare tûkîathîkagîra maathana ma Ngai. Yathana rîake ta bûra bweegiirue kuuma kîambîrîîriani, i bûtûûrage bwendanîîte.

⁷Kûrî na eenania baingî baumîrîte nthîgûrû bakuuga Yiesû Kîrîstû ataarî na mwîrî ta wa muntû. Antû ta babu n'eenania na aregi Kîrîstû.

⁸Kwoogu bwîmenyeere bûtikaaye gûta kîra bwîcereretie kaingo bûkeewa kîewa kîenu kîûyûri.

⁹Muntû ûra atakaraga na ûrutani bwa Kîrîstû, ûra arî na ûrutani bûngî, ûyu atirî na ngwatanîro na Ngai. Îndî ûra akaraga na ûrutani bwake arî na ngwatanîro na Îthe na Mwana.

¹⁰Muntû akaaya kûûya na ûrutani bûngî bûtikaamûthookie mîciî yenu kana kinya bûmûkeethia.

¹¹Ûra akaamûkeethia akeegua akîgwatanîra n'we mantûûni maake maathûûku mara arûthaga.

¹²Ndî na mantû maingî mûno ma kûbwîra, îndî ntikwenda kûbwîra monthe na baarûa îno. Ndî na wîrîgîîro bwa kûûya kûbûriûngîra na tûkaaranîria kaingo tûkenanîra kûrû tûrî amwe.

¹³Ûgûkeethua n'aana ba mwaranyûkwe ûra athuurîîtwe i Ngai.