Read tharaka KÛGWÛRÎRWA 1 Bible Online

KÛGWÛRÎRWA 1 - tharaka bible

KÛGWÛRÎRWA 1

¹Gûkû i ku kûgwûrîrwa kûra Yiesû Kîrîstû aagwûrîîrwe i Ngai, kaingo agwûrîra athingati baake mantû mara meengeerie gûtuîkîka kagiita gatarî karaaya, gûtarî kîrigîîria. Yiesû aatûmire mûraîka wake kaingo amenyithia mo Njoana, mûruti ngûgî wake.

²Njoana akûûyîîrîîte mantû mama eegiirue kuuma kîrî Ngai, na mara ooniirue i Yiesû Kîrîstû.

³Kîthaarimo i kîrî ûra athoomaga ûroria bûbû na bara babuîgagua bakaiga bûbû bwandîkîîtwe nkorooni ciao, n'ûntû kagiita karî akubî ka mantû mama gûtuîkîka.

⁴I niû Njoana nkûbwandîkîra, biû eetîgîri ba makanica mûgwanja kîrî mara marî nthîgûrû ya Îcia. Ûra atûîre oogo, ûra aarî oogo wana tene, ta we ûra agaatûûra tene na tene, irundu mûgwanja bira birî mbere ya gîtî gîake kîa ûnene, na Yiesû Kîrîstû, baroobwaa ûtugi na ûkiri. Yiesû i mûkûûyî mwîtîgua, wa mbere kûriûkua, na mûnene wa anene ba nthîgûrû. Oonaniirie natwendeete na nthakame yake îra aatûthaûrire n'yo twauma meeyiani meetû.

⁶N'we aatûmire twathanaga na tûrutagîra Ngai Îthe ngûgî ta athînjîri. Arookumagua, na inya yake îroonekanaga bûra îgana tene na tene. Aameni.

⁷Ga nkûbwîra, Yiesû naayîîte na matu, na gûtirî we atakîmwona. Wana bara baamûûragire bakamwona akîîya. Antû ba mîgongo yonthe ya nthîgûrû bakamûrîrîra. Na ûgu i bu gûgaakara! Aameni.

⁸Mwathani Ngai ariuga, “I niû Kîambîrîria na i niû Mûthia.[1] I niû ntûîre oogo, ûra aarî oogo wana tene, ûra agaatûûra tene na tene. I niû mwene inya yonthe.”

⁹Niû Njoana ndî mûruanyûkwe. Wana niû innyamaaragua ta bûra bûnyamaaragua, imbîgagua ndî amwe naabi ûneneeni, na mbûmagîîria wata biû n'ûntû bwa Yiesû. N'ûntû bwa ntheto ya Ngai na gûkûûyîîra mantû ma Yiesû, i ntûma ndî gîcîgîîrioni kîa îria gîîtagwa Patimos.

¹⁰Mantû mama maatuîkîkire ngwetwe i Kîrundu[2] ntugû ya Mwathani. Ndeegiirue kayû kaanene ta ga karumbeeta nyuma yakwa,

¹¹kauga, “Andîka îbukuuni bûra ûkwona ûtûme rîo makanicaani mûgwanja ta mo—Ebeeso, Simaana, Pagamamu, Thiatira, Sandis, Birandebia na Raondisia.”

¹²Nkwîgua ûgu, ndagarûka mbona n'ûû aaragia. Nkûgarûka, ndoona taa mûgwanja igîakanaga irî itugîîni bia thaabu,

¹³na muntû “aakari ta mwana wa muntû” arûngi gatîgatî ga taa inu. Eekîrîte rwambambio na oogeete mûciibi wa nguo ya thaabu kîbara.

¹⁴Kîongo gîake kîarî kîîyerû. Na wana ntundu ciake ciarî injerû ce ta îra kana nyange. Meetho maake maakari ta ndîrîmbî cia mwanki.

¹⁵Magûrû maake maakari ta gîkama rîra kîgwete mwanki mûno gîgatuunea tune. Na akîaria kayû gaake keeguîkaga ta ntherû îkwaria.

¹⁶Aagwete nthata mûgwanja na njara ya ûrîo, arûmîîte rûyiû rûûgî mbarî cionthe na kanyua, na ûthiû bwake bwakengakengaga ta riûa.

¹⁷Nkûmwona ndagwa agu nthî magûrûûni maake, ndakara ta muntû ûmûkuû. Aambaigîîra njara yake ya ûrîo ambîîra, “Tiga kûmaka. I niû Mbere na Mûthia.

¹⁸I niû ntûûraga mwoyo. Kûrî rîo ndakuîte, îndî îîndî ndî mwoyo tene na tene! Ncaabi cia gîkuû na cia nthiko ndî na cio.

¹⁹Kwoogu andîka mara ûkwona, mantû mara marîo îgiitaani rîrî na mara makoonekana nyumaani.”

²⁰Aambîîra, “Ga nkuumbûrîre bûra nthata ino mûgwanja ûkwona irî njaraani yakwa ya ûrîo, na bûra taa ino mûgwanja cia thaabu ikwonania. Taa ino mûgwanja i makanica mûgwanja. Nthata ino mûgwanja n'araîka ba makanica mamu.”