Read tharaka KÛGWÛRÎRWA 10 Bible Online

KÛGWÛRÎRWA 10 - tharaka bible

KÛGWÛRÎRWA 10

¹Ndacooka ndoona mûraîka ûngî aarî na inya mûno eendamîîte aumîîte îgûrû. Eekîrîte îtu ta nguo na mûkûngambura ûrî kîongo. Aarî na ûthiû bwakari ta riûa na magûrû maake maakari ta itugî bigwakana mwanki.

²Na naagwete kabuku kaniini na njara gaakunûre. Aakinyîîte na kûgûrû gwake kwa ûrîo îriani na kwa ûmotho nthîgûrû.[7]

³Ndeegua aagondoka na inya ta cimba. Akûgondoka, ndeegua nkwa mûgwanja ciaria.

⁴Nkwa inu mûgwanja ikwaria, nkîenda kwandîka, ndeegua kayû kauma îgûrû kambîîra, “Bûbu weegua nkwa inu mûgwanja ciauga ibûkare bûrî witho. Ûtikaabuandîke.”

⁵Rîru mûraîka ûyu ndooneete arûngi akinyîîte na kûgûrû kûmwe îriani na kûra kûngî nthîgûrû, aûkîîria njara yake ya ûrîo îgûrû.

⁶Aathiîtia na ûra atûûraga tene na tene, ta we ûra aûmbire îgûrû, nthîgûrû, îria na bira birî gûku kunthe. Auga, “Gûtirî weteera kaîrî,

⁷n'ûntû rîra mûraîka wa mûgwanja akaaringa karumbeeta gaake, Ngai akeegua akwingia mûbango wake, ta uu kîriga kîa ntheto îmbega kîra eerire aruti ngûgî baake, iroria.”

⁸Kaîrî ndeegua kayû gaku kaumîîte îgûrû kaambîîra, “Îthi ûthûkie kabuku kaara gakunûre kagwetwe i mûraîka ûûra akinyîîte îria na nthîgûrû.”

⁹Ndathi kîrî mûraîka ndamwîra aanenkere kabuku gaku. Mûraîka aambîîra, “Ka ûrîe. Ûkeegua karî na mûrîo ta ûkî ûgîgatagunya, îndî gaakinya nda gakaagîa gana.”

¹⁰Ndathûkia kabuku gaku kuuma njaraani cia mûraîka ndaarîa. Kaarî na mûrîo ta ûkî ngîgatagunya, îndî gagûkinya nda kaagîa gana.

¹¹Ndeerwa, “Nwa mwanka ûrorie kaîrî mantû ma antû baingî, mîgongo îmingî, nthiomi inyingî, na anene baingî.”