Read tharaka KÛGWÛRÎRWA 11 Bible Online

KÛGWÛRÎRWA 11 - tharaka bible

KÛGWÛRÎRWA 11

¹Ndacooka ndanenkerwa kamûtî kaaraaya ga gûtûmîra karî kîthimi. Ndeerwa, “Îthi ûthime nyomba ya Ngai na kîthînjîro, na ûtare bara bagongagîra Ngai ku.

²Ûtigaatindanîre na ome ya nyomba ya Ngai. Ûtikaamîthime n'ûntû n'ya antû batarî Ayaundi. Bakaatha taûni întheru na njîra înthûûku mîeri mîrongo îna na îîrî.

³Na îgiitaani rîru nkaa akûûyî baakwa inya barî baîrî barorie ntugû ngiri îmwe na magana maîrî ma mîrongo îthanthatû (1,260), beekîrîte maguo matarî meega kwonania kîeba.”

⁴Akûûyî babu i mîceituuni îîrî kana taa ciîrî ira ndoonaga irî agu mbere ya Mwathani wa nthîgûrû.

⁵Anthû baao bakageria kûbathûûkia, mwanki uuma tûnyua twa akûûyî babu ûkaûraga anthû babu. Ûgu i bu anthû baao bakaûragangwa baageria kûbathûûkia.

⁶Îgiitaani rîao rîa ûroria, akûûyî babu baîrî barî na inya ya kûrigîîria îgûrû rîtaurithie mbûra. Barî na inya ya kûgarûra ndûyî igatuîka nthakame na ya kûreeta mûthemba unthe wa inyamaara nthîgûrû, maita wamara bakeenda.

⁷Akûûyî babu baîrî bakûrîîkia gûkûûyîîra na ûroria, ndoona nyamû kuuma îrinyaani rîra rîorokeru mûno yarûa na bo, yabacinda, yabaûraga.

⁸Mîîrî ya akûûyî babu baîrî yatungumana barabaraani ya taûni îra nene, taûniini îra Mwathani aambirwe. Taûni înu yîtagwa na gîîkîrundu Sondomu kana Miisiri.

⁹Ndoona antû kuuma kîrî mîîraga yonthe, mîgongo, na nthiomi baakara baraithîîte mîîrî ya akûûyî babu ntugû ithatû na nucu, kûregeetwe bathikwa.

¹⁰Bara batûûraga nthîgûrû baakeneera ûgu mûno, na kweyana beeyana biewa n'ûntû bwa bûra akûûyî babu baabareetagîra thîîna barî mwoyo.

¹¹Îndî ntugû inu ithatû na nucu ikûthira, Ngai aabuîrîîra akûûyî babu mîruke ya mwoyo. Akûbabuîrîîra, iroria bibu biarûngama. Bara baaboonire baamaka mûno.

¹²Iroria bibu biegua kayû kaanene kuuma îgûrû, kabeera, “Ncûûni gûkû îgûrû!” Iroria bibu bietia îgûrû na îtu, anthû baao babicûûbîîte.

¹³Warîo nthîgûrû yainaina mûno. Gîcuncî kîmwe gîa îkûmi gîa taûni înu kîenyangua, antû ngiri mûgwanja baûragwa i kwinaina gûku kwa nthîgûrû. Bara baatigarire baamaka mûno, baakîra Ngai wa îgûrû.

¹⁴Kînyamaara kîa biîrî gîgûkûrûka. Kîa bithatû îîndî i kîo kîyîîte weendî.

¹⁵Mûraîka wa mûgwanja aaringa karumbeeta gaake. Akûringa, ndeegua tûyû twagondoka gûku îgûrû, twauga, “Wathani bwa nthîgûrû îîndî i bwa Mwathani wetû na Kîrîstû mûthuure wake. Akaathana tene na tene.”

¹⁶Akûrû bara mîrongo îîrî na bana, bara bakari itîîni biao bia ûnene bathiûrûkîîrîîte Ngai baaturia maru batiirithîîtie moothiû maao nthîgûrû, bamûgonga.

¹⁷Bauga, “Mwathani mwene inya yonthe, woû ûtûîre oogo, woû warî oogo wana tene, itûgûgûcookeria nkaatho n'ûntû bwa kwanjîîria kwathana na inya yaku înene.

¹⁸Antû ba nthîgûrû ibarathûûri i woû, îndî îîndî nûbooneetie bûra mûthûûro waku ûgana. Îîndî îgiita rîgûkinya rîa kûgiitîra bara bakuû îgamba. Îîndî n'îgiita rîa kwaa aruti ngûgî baaku biewa, ta bo iroria. Na ûkaa biewa kinya antû baaku, ta bo bara bagûtîîyaga, baanene na baaniini. Îgiita rîgûkinya rîa kwînyangia bara beenyangagia nthîgûrû!”

¹⁹Ndoona nyomba ya Ngai gûku îgûrû yarugûrwa, kathandûkû kara kaarî na maathana gaatua kwonekana. Ndoona gwatua kwenia, ndeegua gîtuma, nkwa yatua kwaria, nthîgûrû yatua kwinaina, na gwatua kuura mbura ya maiga.