Read tharaka KÛGWÛRÎRWA 13 Bible Online

KÛGWÛRÎRWA 13 - tharaka bible

KÛGWÛRÎRWA 13

¹Ndacooka ndoona nyamû yatiibûka îriani. Nyamû înu yarî na ngoci îkûmi, na wakîra rûgoci irweekîrîtwe nthûmbî ya ûnene. Na yarî na biongo mûgwanja. Na wakîra kîongo kîandîkîîtwe riîtwa rîa kûruma Ngai.

²Nyamû înu ndoonire yakari ta ngo. Yarî na mathu maakari ta ma ndû, na kanyua gaakari ta ga cimba. Njoka înu yarî nene ûgu yanenkera nyamû înu inya ya yo, gîtî kîa yo kîa ûnene, na inya înene mûno ya wathani.

³Kîongo kîmwe kîa nyamû înu gîakari taka kîarî kîîmunte bwa kûrigaria, gîakua kûrû, îndî îmuntîrwa rîru rîora, kîongo kîabua kaîrî. Kîrîndî kîa nthîgûrû yonthe kîarigarua i nyamû înu, gîatuîka athingati ba yo.

⁴Kîagonga njoka înu yarî nene ûgu n'ûntû bwa inya înu ya yo yeere nyamû înu. Baagonga nyamû înu, bauga, “N'ûû aganaane na îno? N'ûû amîota?”

⁵Nyamû înu yeewa watho bwa kwaria mîgambo îmîthûûku mûno ya kûrumanga Ngai. Yeetîgîîrua mîeri mîrongo îna na îîrî îrûtha wabûra îkwenda.

⁶Ndoona yaatîka yaruma Ngai, kûra atûûraga, na bara batûîre îgûrû.

⁷Yeewa watho bwa kûrûa na antû ba Ngai îkaboota, inya ya kwatha mîgongo yonthe, antû ba rangi cionthe, nthiomi cionthe, na nthîgûrû cionthe.

⁸Antû bonthe bamîgonga bara baatûîre nthîgûrû, bara mariîtwa maao mataandîkwa îbukuuni rîa mwoyo mbere ya nthîgûrû yûmbwa. Îbuku rîru rîa mwoyo, i rîra rîa Kagondu kara kaûragirwe.

⁹Ûra arî na matû neegue.

¹⁰“Ûra arî mûtagwa, nagaataîgwa. Ûra arî mûûragwa na rûyiû, nakaûragwa na ru. Ûgu i ta kwonania, bara ûkeegua barî antû ba Ngai bakeendekana beegua barî na kûûmîîria na wîtîgio.”

¹¹Ndoona nyamû îngî yatiibûka nthîgûrû. Yarî na ngoci ciîrî ta cia gatûrûme, na kayû ka yo keeguîkaga ta ka njoka îra nene mûno.

¹²Yatûmagîra inya ya nyamû îra ya mbere, îgatûma antû ba nthîgûrû bagonga nyamû înu ya mbere, îra yarî na kîronda kîra.

¹³Antû bakîonaga, nyamû înu yaringa biama bia kûrigaria, ta gûtûma mwanki ûkauma îgûrû mwanka nthîgûrû.

¹⁴Yeeneeria antû ba nthîgûrû na biama bibu yaringaga kuumania na inya îra yeetwe i nyamû înu îngî îmîringîîra bio. Yeera antû nwa mwanka barûthe mûbuanaano wa nyamû înu yamuntîîtwe kîongo kîmwe na rûyiû, gîakua, îndî gîacooka kîabua.

¹⁵Yeewa inya ya gwîkîra mûbuanaano ûyu mwoyo. Mûbuanaano ûyu watua kwaria na ûkîûraga bara bataugonga.

¹⁶Nyamû înu yeekîrithia antû bonthe rwano njara ya ûrîo kana ûthiû, baanene na baaniini, itonga na nkîa, nkombo na bara batarî nkombo.

¹⁷Gûgûkarîka ûgu, gwatuîka gûtirî muntû akîgûra kana eendia gîntû atarî na rwano rûru. Na rwano rûru i riîtwa rîa nyamû înu kana namba ya riîtwa rîa yo.

¹⁸Ûtitaûra rwano rûru ûtarî mwe ûûme. Ûra mûûgî nacerie amenye kîra namba înu îrûngamîîrîîte, n'ûntû namba înu îrûngamîîrîîte riîtwa rîa muntû. Namba înu i magana mathanthatû ma mîrongo îthanthatû na ithanthatû (666).