Read tharaka KÛGWÛRÎRWA 15 Bible Online

KÛGWÛRÎRWA 15 - tharaka bible

KÛGWÛRÎRWA 15

¹Ndoona mantû mangî maanene ma kûgegania gûku îgûrû. Ndaraithire ndoona araîka mûgwanja bara baareetire inyamaara mûgwanja. Bibi i bio inyamaara bia mûthia bia kûthirîkîria mûthûûro wa Ngai.

²Kaîrî ndoona gîntû gîakari ta îria rîa kîyici kiungeene na mwanki. Ndaraitha ndoona bara baacindîîte nyamû îra, mûbuanaano wa yo, na namba ya riîtwa rîa yo. Baarûngi rûteere rwa îria rîru bakiinaga na wandîndî ira beetwe i Ngai.

³Bainaga rwîmbo rwa Musa, mûruti ngûgî ya Ngai, na rwîmbo rwa Kagondu. Bainaga, “Mantû mara ûrûthaga i mantû maanene na i ma kûrigaria, Mwathani, Ngai, mwene inya. Bûra bunthe ûrûthaga ibwagîrîte na i bwa mma, mûnene wa mîgongo yonthe.

⁴N'ûntû Mwathani, i woû wenka mûtheru, n'ûû atagîgûkuthûka, atûme riîtwa rîaku rîtîîywa? Mîgongo yonthe ya nthîgûrû îkaaya îkûgonge n'ûntû mantû maagîru mara ûrûthaga i maiyîkeene.”

⁵Nyuma ya mantû mamu ndoona nyomba ya Ngai yarugûka gûku îgûrû, ta yo îrema rîra, kûra maathana ma Ngai maigîîtwe.[9]

⁶Araîka mûgwanja bara baareeteete inyamaara mûgwanja bauma ku beekîrîte nguo igûkengakenga, injerû ce, na boogeete mîciibi ya nguo ya thaabu ibaraani.

⁷Kîûmbe kîmwe kîrî bira bina kîanenkera wakîra ûmwe wa araîka babu mûgwanja mbakûri ya thaabu yûyûri mûthûûro wa Ngai ûra atûûraga mwoyo tene na tene.

⁸Ndoona Ngai aûyûria ntoogo gûku nyomba ya Ngai kwonania bûra arî inya na mwago ûgana. Gûtirî muntû akîthûngîra gûku mwanka rîra inyamaara bibu mûgwanja biathirire, bibu biareeteetwe n'araîka babu.