Read tharaka KÛGWÛRÎRWA 16 Bible Online

KÛGWÛRÎRWA 16 - tharaka bible

KÛGWÛRÎRWA 16

¹Ndeegua kayû kaaria na inya îra nene gûku nyomba ya Ngai. Keera araîka babu mûgwanja, “Îthiini bûtûûrîrie nthîgûrû mûthûûro ûyu wa Ngai ûrî mbakûriini inu mûgwanja.”

²Mûraîka wa mbere aathi eetûûra mûthûmba wa mbakûri yake nthîgûrû. Agwîtûûra, bara baarî na rwano rwa nyamû îra, bara baagongaga mûbuanaano wa yo bauma maronda maathûûku mûno.

³Mûraîka wa baîrî eetûûra mûthûmba wa mbakûri yake îriani. Agwîtûûra, rûûyî rwakara ta nthakame ya muntû ûmûkuû. Kîonthe kîra kîarî mwoyo îriani gîakua.

⁴Mûraîka wa bathatû eetûûra mûthûmba wa mbakûri yake miurooni na inyakaani. Agwîtûûra, ndûyî ciatuîka nthakame.

⁵Ndeegua mûraîka ûra aathanaga ndûyîîni auga, “Woû mûtheru, woû ûtûîre oogo, woû warî mwoyo na tene, i woû mwagîru, n'ûntû i woû weyanîîte îkaanûkia rîrî.

⁶Nthakame îno wakundia antû baba ibaagîrîte kûmînyua n'ûntû ibeetûûrire nthakame ya antû baaku na ya iroria.”

⁷Ndeegua kayû kauma kîthînjîrooni. Kauga, “Yîî wabu, Mwathani, Ngai mwene inya, woû ûgiitaga magamba na njîra ya mma, bûra kwagîrîte.”

⁸Mûraîka wa bana eetûûrîria riûa mûthûmba wa mbakûri yake. Riûa rîewa watho bwa kûrûngûria antû na mûrugutîra wa rîo.

⁹Antû baarûngûra i mwanki wa riûa. Warî mûrugutîra ûmûnene mûno. Antû baaruma Ngai ûra eeyanîîte inyamaara bibu, baarega kwîrira na bataatîîya Ngai.

¹⁰Mûraîka wa bataano eetûûra mûthûmba wa mbakûri yake gîtîîni kîa ûnene kîa nyamû îra, ûnene bwa yo bwaruma mwindu. Antû baincia n'ûrûrû.[10]

¹¹Baaruma Ngai wa îgûrû n'ûntû bwa ûrûrû bûbu beegagua na n'ûntû bwa maronda mamu baarî na mo. Baarega kwîrira mantû mara baarûthîîte maathûûku.

¹²Mûraîka wa bathanthatû eetûûra mûthûmba wa mbakûri yake muurooni ûmûnene ûra wîtagwa Ubarates. Agûcuîtûûra ku, muuro ûyu wabwa. Kwoneka njîra ya anene bara bakauma bwa uumîîro bwa riûa.

¹³Ndacooka ndoona irundu bithatû biithûûku bikari ta biûra. Kîrundu kîmwe ndoonire kîauma kanyuani ka njoka îra yarî nene mûno, kîa biîrî kîauma kanyuani ka nyamû îra, na kîa bithatû kîauma kanyuani ga kîroria kîa ûrongo.

¹⁴Irundu bibu biithûûku i nkoma ira irî inya ya kûringa biama. Ndoona biathi biethîrania amwe anene ba nthîgûrû yonthe n'ûntû bwa ndûa îra îkaarûîgwa ntugû îra nene ya Ngai, mwene inya.

¹⁵Mwathani ariuga, “Thikîîria! Nkaaya ta mwamba bûra aayaga! Kîthaarimo i kîrî ûra akaraga eethuuranîrîte, ûra akaraga amenyeereete nguo ciake kaingo atathi ûtheri mbere ya antû, eebîkîrithia nthoni.”

¹⁶Irundu bibu biithûûku biethîrania anene amwe bantû eetagwa Amagendoni na rwaria rwa Kîîbirania.

¹⁷Mûraîka wa mûgwanja eetûûra mûthûmba wa mbakûri yake ruuoni. Ndeegua kayû kauma gîtîîni kîra kîa ûnene, gûku nyomba ya Ngai. Kaugîîria na inya kauga, “N'ûgu îîndî!”

¹⁸Kayû gaku gakuuga ûgu rweni rwatua kwenia, ndeegua gîtuma kîînene mûno na mûrurumo wa nkwa. Nthîgûrû yainaina na inya mûno bûra îtaaroinaina kuuma muntû akûûmbwa.

¹⁹Taûni îra nene yaatûkanua icuncî bithatû na taûni ira ingî cionthe cia nthîgûrû ciomoranangua. Ngai aaririkana taûni înene ya Mbabironi. Amîkundia gîkombe kîa ndibei ya mûthûûro wake ûmûnene.

²⁰Icîgîîrio bionthe bia îria biaûra. Na irîma bitoonwa kaîrî.

²¹Kwaura mbura ya maiga înene mûno. Îthanta rîmwe rîa yo rîarî rîa ûrito ta bwa kiro mîrongo îna. Mathanta maumaga îgûrû makawîra antû. Antû baaruma Ngai akuurithia mbura înu, n'ûntû kînyamaara kîra boonire kîarî kîînene bwa kûrigaria.