Read tharaka KÛGWÛRÎRWA 18 Bible Online

KÛGWÛRÎRWA 18 - tharaka bible

KÛGWÛRÎRWA 18

¹Nyuma ya kîoneki gîku, ndoona mûraîka ûngî eendamîîte kuuma îgûrû arî na inya înene ya wathani. Mwago wake waamûrîka nthîgûrû.

²Augîîria na inya, auga, “Taûni îra nene ya Mbabironi îkwomorangwa, îkwomorangwa! Îgûtuîka gîkaro gîa nkoma na kîa irundu bionthe biithûûku. Îgûtuîka gîkaro kîa nyoni na nyamû cionthe irî nting'o.

³Mîgongo yonthe ya nthîgûrû îranyua ndibei ya wîrirîîria bwa ûmaramari bwake. Anene ba nthîgûrû baramaama n'we baaruta ngûgî ya ûmaramari n'we. Abiacaara ba nthîgûrû batongeetue i wîrirîîria bûra arî bwingî mûno bwa kwenda into nkûrûki ya kîthimi.”

⁴Ndacooka ndeegua kayû kangî kauma îgûrû kauga, “Umaani taûni înu, biû antû baakwa, bûtikaagwetanîrue na wîyia bwake, na kaingo bûtagwatwa i kînyamaara kîra gîkaamûgwata.

⁵Wîyia bwake i kîthûmba gîkinya îgûrû matuuni, na Ngai atiiriganagîrua i mabîtia maake.

⁶Newe ta bûra eeyanaga, narûthîrwe maita maîrî nkûrûki ya bûra aarûthaga. Nakundue gîkombe kîa ndibei îndûru maita maîrî nkûrûki ya îra aakundagia antû.

⁷Nanyamaarue na eekîrwe kîeba kûringana na bûra eendeete into nkûrûki ya kîthimi na îgweta. N'ûntû arîîbîîra na nkoro, ‘Nkari nthî ta mûnene wa mûka akarîrîte gîtî gîake kîa ûnene. Niû ntirî ntigwa, gûtirî rîo nkaagwatwa i kîeba.’

⁸Kwoogu akoona kinyamaara na ntugû îmwe - gîkuû, kîeba na yûûra. Akaabîîthua na mwanki n'ûntû ûra akaagiita îgamba rîake i Mwathani Ngai mwene inya.”

⁹Anene ba nthîgûrû boona ntoogo ya îrwaya rîrî rîkîbîîthua ibakaarîrîrîra bagwetwe i kîeba. Anene babu i bara ûkeegua baamaamîîte na rîo baaruta ngûgî ya ûmaramari na beenda into nkûrûki ya kîthimi bûra rîendeete.

¹⁰Boona bûra rîkûnyamaara bûgana bakaamaka beebûmbe gataaria bauge, “Irû! Irû! Yîî kûrû, taûni îra nene, woomboranua na îthaa rîmwe, Mbabironi, taûni îrî inya!”

¹¹Na abiacaara ba nthîgûrû boona rîkîbîîthua kinya bo ibakaarîrîrîra bagwetwe i kîeba n'ûntû bationa muntû wa kûgûra into biao kaîrî.

¹²Gûtirî we akaabagûrîra thaabu, fetha, twiga twa goro, ruru, nguo cia goro, cia rangi ya ûkûyû, intuune, na ikûmetameta. Kana mbaaû cia mîtî ya mîthemba yonthe, into bia mîthemba yonthe bira birûthagwa na mîguongo, bira birûthagwa na mbaaû cia ûgûri bûûmo, yûmba rîra rîrûthagwa gîkama, into bia mathaga, bira birûthagwa na twiga tûkengakengaga tûûtenderu mûno,

¹³into bia gwîkîra irio mûrîo, mîtaa, ndibei, maguta ma ncabiibû, mîtu, ngano, ng'ombe, ng'ondu, mbaraathi, nkaarî cia ndûa ira ikururagua i mbaraathi, na nkombo—mîoyo ya antû. Abiacaara bakauga,

¹⁴“Mantû mara ûreendeete ûtimoona kaîrî. Ûtonga bwaku bunthe na mwago bikûthira. Ûtibiona kaîrî.”

¹⁵Abiacaara bara bagaatonga kuumania n'we boona bûra akûnyamaara bûgana bakaamaka beebûmbe gataaria barîre barî na kîeba

¹⁶bauge, “Irû! Irû! Yîî kûrû taûni îra nene! Îreekagîra nguo inthongi cia rangi ya ûkûyû na intuune, îkeegemia na thaabu, twiga twa goro na ruru.

¹⁷Îndî ûtonga bûbu bunthe bwathira na îthaa rîmwe!” Anene ba meeri, bara bathiyaga na meeri, bara barutaga ngûgî meeriini, na bara bonthe bathûkûmaga kuumania na îria batiithengeera Mbabironi.

¹⁸Boona ntoogo Mbabironi îkîbîa bakauga na inya, “Gûtooneka taûni îngî înene ta îno!”

¹⁹Bageetûûrîria mûthetu biongo biao barîre barî na kîeba bauge na inya, “Irû! Irû! Yîî kûrû, taûni îra nene! Bara bonthe barî meeri batongeete kuumania na ûtonga bwa yo! Îndî yomorangwa na îthaa rîmwe.

²⁰Îgûrû, keneera ûgu Mbabironi yarûthwa! Keneeraani ûgu antû ba Ngai, atûmwa na iroria, n'ûntû Ngai akûmîkaanûkia n'ûntû bwa bûra yabûrûthire.”

²¹Ndoona mûraîka ûmwe aarî na inya mûno ooya iiga rîînene mûno rîkari ta rîa kûthia, arîgera îriani. Auga, “Ta ûgu i bu Mbabironi taûni îra nene îkaarûkua, na îtikooro yonwa kaîrî.

²²Tûyû twa antû bakiina na wandîndî ira cia ndigi inyingî, kana into bingî bia wini, mîtûûrirû, kana tûrumbeeta tûtiîguîka kîrî woû kaîrî. Gûtirî mûruti ngûgî akoonwa kîrî woû kaîrî. Na gûtiîguîka iiga rîkîthia kîrî woû kaîrî.

²³Gûtioneka taa îmûrîkîîte kîrî woû kaîrî, na kayû ka mûgûrani na mwiki gatiîguîka kîrî woû kaîrî. Abiacaara baaku i bo baraarî abiacaara bara banene nthîgûrû na ûrogi bwaku i bu bûrakangayîtie mîgongo yonthe.

²⁴Na ikwoonekanire i woû weetûûrithiirie nthakame ya iroria, antû ba Ngai, na bara bonthe baûragirwe nthîgûrû.”