Read tharaka KÛGWÛRÎRWA 19 Bible Online

KÛGWÛRÎRWA 19 - tharaka bible

KÛGWÛRÎRWA 19

¹Nyuma ya mantû mamu ndeegua tûyû ta twa kîrîndî gîa antû baingî mûno. Ndeegua baugîîria na inya bauga, “Arerûûya! I Ngai oonokanagia, na n'we mwene inya na mwago,

²n'ûntû agiitaga îgamba na njîra ya mma na bûra kwagîrîte. Nagiitîîte îgamba rîa îrwaya rîra rîrathûûkagia nthîgûrû na ûmaraaya bwa rîo. Narîete îkaanûkia n'ûntû bwa gûtûma aruti ngûgî baake bakua!”

³Bauga kaîrî, “Arerûûya! Ntoogo ya rîo îra rîkuuma rîkîbîîthua îgeetagia îgûrû tene na tene.”

⁴Ndoona akûrû bara mîrongo îîrî na bana na biûmbe bira bina baaturia maru, baagonga Ngai akari gîtîîni kîa ûnene. Bauga, “Aameni, arerûûya!”

⁵Kayû kauma gîtîîni gîku kîa ûnene, kauga, “Kumagiani Ngai wetû, bwinthe bara bûmûtûmîkagîra, biû bûmûkuthûkaga, baanene na baaniini.”

⁶Ndacooka ndeegua gîtuma ta gîa tûyû twa kîrîndî gîa antû baingî mûno, kana ta gîtuma kîa muuro ûûyîîte, kana ta gîtuma gîa nkwa îgondokeete. Ndeegua kwaugwa, “Arerûûya! Mwathani wetû, Ngai mwene inya, n'we aathanaga.

⁷Tûkeneeni mûno mûno na tûkumie Ngai, n'ûntû wiki bwa Kagondu bûgûkinya, na mwiki wake neethuuranîrîte.

⁸Mwiki eekîrîte nguo înthongi mûno, înjerû na întheru, îra eetwe.” (Nguo înthongi i mantû maagîru mara antû ba Ngai barûthîîte.)

⁹Mûraîka aambîîra, “Andîka ûûgû: Kîthaarimo i kîrî bara beete kîathooni kîa wiki bwa Kagondu!” Ndeegua kaîrî ndeerwa, “Bibi i bio biugo bia mma bia Ngai.”

¹⁰Ndaturia maru ngonga mûraîka ûyu aambîîraga mantû mamu. Îndî nkiuga mmûgonga aambîîra, “Arî, ûtikangonge! Niû ndî mûruti ngûgî ta woû, kana aruanyûkwe na aaranyûkwe bara barikîîtie ntûmwa ya mma ya Yiesû. Gonga Ngai!” (Kûrikia ntûmwa ya Yiesû i kwîgua muntû arî na Kîrundu ûra aaragia gûkûrûkîîra kîrî iroria.)[11]

¹¹Ndoona îgûrû rîarugûka, ndoona mbaraathi înjerû na muntû amîtwete. Muntû ûyu eetagwa ‘Mwîtîgua na wa mma’. N'we agiitaga îgamba na njîra ya mma na akarûa bûra kwagîrîte.

¹²Muntû ûyu aarî na meetho maakari ta ndîrîmbî cia mwanki. Na eekîrîte nthûmbî cia ûnene kîongo gîake teke. Naandîkîîtwe riîtwa îndî gûtirî ûngî aariiyî tatiga we wenka.

¹³Nguo ira eekîrîte ciakundîîte nthakame ciarindara. Muntû ûyu eetagwa ‘Kiugo kîa Ngai’.

¹⁴Ikwarî na njûûrî cia îgûrû ciamûthingatîîte itwete mbaraathi injerû, ciîkîrîte nguo inthongi mûno, injerû na intheru.

¹⁵Muntû ûyu aatwete mbaraathi înu naarûmîîte rûyiû rûûgî mûno na kanyua. Rûyiû rûru i ru agaatûmîra acinde mîgongo ya nthîgûrû. Amîcinda, amîathe atarî na mathee. Na agaakinyangîra ncabiibû kîrinyaani kîra ikinyangagîrwa, ta kîo kîrinya kîa mûthûûro ûmûnene wa Ngai, mwene inya.

¹⁶Aandîkîîtwe nguoni na kîerooni, ‘Mûnene wa anene na Mwathani wa aathani.’

¹⁷Ndoona mûraîka arûngi riûani. Nyoni cionthe ira ibuurûûkagîra maanganyoni aciîra na inya, “Ncûûni bwîthîrane amwe kîathooni gîkî kînene ûûgû, kîa Ngai.

¹⁸Ncûûni bûrîe nyama cia mîîrî ya anene, anene ba acikaarî, acikaarî, mbaraathi na bara baitwete, na antû bonthe—nkombo na bara batarî nkombo, baanene na baaniini.”

¹⁹Ndoona nyamû îra, anene ba nthîgûrû na njûûrî ciao beethîrana amwe baarûa na muntû ûyu aatwete mbaraathi na njûûrî yake.

²⁰Nyamû înu na kîroria kîa ûrongo kîra kîamîringagîra biama baagwatwa. Kîroria gîku gîatûmagîra biama gîkeeneeria antû bara beekîrîtwe rwano rwa nyamû înu, bara bagongaga mûbuanaano wa yo. Nyamû înu na kîroria gîku baagwatwa baagerwa îriani rîa mwanki wa ûbiriti barî mwoyo.

²¹Njûûrî ya nyamû înu yathirua i muntû ûyu aatweete mbaraathi na rûyiû rûra aarûmîîte na kanyua. Nyoni cionthe ciegaagûra na nyama cia mîîrî yao ciabaa.