Read tharaka KÛGWÛRÎRWA 20 Bible Online

KÛGWÛRÎRWA 20 - tharaka bible

KÛGWÛRÎRWA 20

¹Ndoona mûraîka eendamîîte kuuma îgûrû, agwete rûcaabi rwa îrinya rîra rîorokeru mûno. Na naarî na nyororo înkamu.

²Mûraîka ûyu aakumbata njoka îra nene, îra îtûîre yîtagwa Nkoma kana Saitaani. Amîthaîka mîanka ngiri îmwe.

³Akûmîthaîka, amîgera îrinyaani rîra rîorokeru mûno, amiingîra ku bûra îtauma ku yeneeria antû, mwanka mîanka înu ngiri îmwe îthire. Na mîanka ngiri îmwe yathira, nwa mwanka njoka înu îtharue îrekeerue kaîrî bantû a kagiita gaakai.

⁴Ndacooka kaîrî ndoona itî bia ûnene. Itî bibu biakarîrîtwe n'antû beetîgîîtue beewa inya ya kûgiitîra antû îgamba. Na ndoona mîoyo ya antû bara baûragirwe n'ûntû bwa kwîgua barî eetîgua ntûmwaani ya Yiesû na kiugooni kîa Ngai. Antû babu i bara bataagonga nyamû îra kana mûbuanaano wa yo. Na bateekîrwa rwano rwa nyamû înu moothiû maao kana njara ciao. Ndoona baatuîka antû barî mwoyo kaîrî, baathana na Kîrîstû mîanka ngiri îmwe.

⁵Gûku i ku kûriûka kwa mbere. Bara bangî baarî baakuû bo bataatuîka antû barî mwoyo mwanka mîanka îra ngiri îmwe yathira.

⁶N'ûmûthaarime na n'ûmûtheru ûra aakaariûkua îriûkua rîa mbere. Bo batiikua îkua rîa maîrî. Bakeegua barî athînjîri ba Ngai na Kîrîstû. Na bakaathana na Kîrîstû mîanka ngiri îmwe.

⁷Mîanka înu ngiri îmwe yathira, Saitaani akaatharua aume gûku aingîrîtwe,

⁸athi nteere cionthe cia nthîgûrû eeneerie antû ba mîgongo yonthe, amîîthîranie amwe n'ûntû bwa ndûa. Ûkeegua barî antû baingî mûno ta mûthanga wa îria. I bo antû ba Ngoogu na Maagoogu.

⁹Bakaathi barî mûkondo bacereere kambî ya antû ba Ngai, ta yo taûni îra Ngai eendeete, îndî mwanki ûkauma îgûrû ûbathirie.

¹⁰Ûra akeegua abeeneereetie, ta we Nkoma, agerwe îriani rîa mwanki wa ûbiriti, kûra nyamû îra na kîroria kîra kîa ûrongo baagerirwe. Na bakaanyamaarîra gûku tene na tene, mûthenya na ûtugû.

¹¹Ndacooka ndoona gîtî kîa ûnene. Kîarî gîtî kîînene, kîîyerû. Na ikwarî na ûra aagîkarîrîte. Îgûrû na nthîgûrû bitoonwa kaîrî.

¹²Ndoona bara baakuite, baanene na baaniini, barûngi mbere ya gîtî gîku kîa ûnene. Mabuku maagwûrua na îbuku rîa mwoyo rîagwûrua. Bara baakuîte baagiitîrwa îgamba kûringana na mantû mara woora muntû aarûthîîte, mara maandîkîîtwe mabukuuni mamu.

¹³Baarî bonthe bara baanenkanîîrue n'îria, bara baakuîrîrîte ku, na bara Nthiko yanenkanîîrie. Bonthe baagiitîîrwe îgamba kûringana na mantû mara woora muntû aarûthîîte.

¹⁴Ndoona Gîkuû na Nthiko biagerwa îriani rîa mwanki. Îria rîa mwanki i rîo rîreetaga îkua rîa maîrî.

¹⁵Ûra riîtwa rîake rîtaandîkîîtwe îbukuuni rîa mwoyo aagerirwe îriani rîru rîa mwanki.