Read tharaka KÛGWÛRÎRWA 21 Bible Online

KÛGWÛRÎRWA 21 - tharaka bible

KÛGWÛRÎRWA 21

¹Rîarî îgûrû rîîyerû na nthîgûrû înjerû n'ûntû îgûrû rîra rîkûrû na nthîgûrû îra nkûrû ibiarî bikûûra na îria rîene.

²Ndoonire taûni îra ntheru, ta yo Njerusaremu înjerû yeendamua kuuma îgûrû kîrî Ngai. Yathuuranîrîtwe yakara ta bûra mwiki athuuranagîrwa eeteereete mûgûrani.

³Kayû kara ndeegiirue kaaria kuuma gîtîîni kîa ûnene, kaariirie na inya kauga, “Îîndî ûtûûro bwa Ngai bûrî kîrî antû, Ngai agaatûûrania na bo. Ûkeegua barî antû baake, na Ngai we wengwa akeegagua arî amwe na bo arî Ngai wao.

⁴Ngai akabagiria meethori. Ûtiîgua kûrî na gîkuû kaîrî, kana kîeba, kana kîrîro, kana ûrûrû. Mara makûrû monthe ûkeegua magûkûrûka.”

⁵Ûra aakarîrîte gîtî kîa ûnene auga, “Raitha wone! Ndîgarûra mantû monthe matuîke maayerû!” Aambîîra, “Andîka ûgu n'ûntû mîgambo înu n'ya gwîtîgîka na n'ya mma.”

⁶Aambîîra, “N'ûgu îîndî. I niû Alfa na Omega,[12] Mwanjîîrio na Mûthia. Ûra arî na bûûta, eenda nkamûkuundia rûûyî rwa kînyaka kîa mwoyo, gûtarî kîo akûûrua,

⁷ûra akaûmbana. Ngaatuîka Ngai wake n'we atuîke mwana wakwa.

⁸Îndî iguaya, bara batarî wîtîgio, bara barûthaga mantû mara mataankenagia, aûragani, bara barutaga ngûgî cia ûmaramari, arogi, bara bagongaga ngai cia ûrongo, na bara bonthe baaragia ûrongo, babu bonthe bakaagerwa îriani rîra rîa mwanki wa ûbiriti, ta rîo îkua rîa maîrî.”

⁹Ûmwe wa araîka bara mûgwanja, bara baarî na mbakûri ira mûgwanja ciaûyûri inyamaara bira mûgwanja bia mûthia, aaya aambîîra, “Ncû nkwonie mwiki, mwekûrû wa Kagondu.”

¹⁰Aanthûkia na njîra ya gîîkîrundu aambira kîrîmaani kîîraaya, kîînene. Aambonia taûni îra ntheru, ta yo Njerusaremu, îîndamîîte kuuma îgûrû kîrî Ngai,

¹¹îgîkengakengaga i mwago wa Ngai na îgîyicaga ta kaiga ka goro geetagwa njacipa, îkembûkîîte ta kîyici.

¹²Yairigîrîtwe na rûthingo rûûkamu, rûraaya. Rûthingo rûru rwarî na mîîrîga îkûmi na îîrî. Kîrî wakîra mwîrîga ikwarî na mûraîka. Na wakîra mwîrîga kîrî mîîrîga înu, ikwandîkîîtwe rîmwe rîa mariîtwa ma mîîrîga îra îkûmi na îîrî ya Isiraeri.

¹³Na wakîra mbarî kîrî nteere cia rûthingo rûru irî inya, ikwarî na mîîrîga îthatû, îthatû.

¹⁴Rûthingo rûru rwakîîtwe mûcingiini wa maiga îkûmi na maîrî. Na wakîra iiga rîa mûcingi irîandîkîîtwe rîmwe rîa mariîtwa mara îkûmi na maîrî ma atûmwa bara îkûmi na baîrî ba Kagondu.

¹⁵Mûraîka ûyu aaragia naani naagwete mûraagi wa thaabu wa kûthima gîntû. Warî wa kûthima taûni înu, mîîrîga ya yo na nthingo ciayo.

¹⁶Mûraîka ûyu aathima taûni înu na mûraagi ûyu. Wariî na ûraaya bwa mbarî cia taûni înu irî inya, ibwaganeene. Ûraaya na wariî bwa yo bwarî bwa mairi ngiri îmwe na magana mataano. Wana gwîtia îgûrû nwabu yagana ûgu.

¹⁷Aacooka kaîrî aathima rûthingo. Na kûringana na kîthimi kîra aatûmagîra, rwarî rwa ûraaya ta bwa biiti magana maîrî, gwîtia.

¹⁸Rûthingo rûru rwakîîtwe na njacipa. Taûni yaakîîtwe na thaabu îtaunganîîtue na gîntû kîngî, îra nkembûku ta kîyici.

¹⁹Maiga mara îkûmi na maîrî ma mûcingi maagemeetue na twiga twa goro twa mîthemba yonthe. Iiga rîa mbere rîagemeetue na njacipa, rîa maîrî na cabire, rîa mathatû na karekandooni, rîa mana na emerandi,

²⁰rîa mataano na carindoniki, rîa mathanthatû na carindioni, rîa mûgwanja na kiricorite, rîa manaana na beriri, rîa kenda na topaci, rîa îkûmi na kîricopiraco, rîa îkûmi na rîmwe na njacinthi, na rîa îkûmi na maîrî rîagemeetue na amethîsto.

²¹Mîîrîga îrî îkûmi na îîrî yarî ruru. Wakîra mwîrîga warûthîîtwe na ruru îmwe. Barabara ya taûni înu yarî ya thaabu îtarî mbunganie na gîntû kîngî. Yakari ta kîyici.

²²Ntoona nyomba ya Ngai taûni înu n'ûntû Mwathani Ngai mwene inya na Kagondu ibaarî gûku, barî bo.

²³Gûtaarî gîtûmi gîa kûmûrîkîrwa i werû bwa riûa kana bwa mweri, n'ûntû taûni înu îmûrîkagîrwa i mwago wa Ngai. Kagondu n'we taa ya yo.

²⁴Mîgongo yonthe yamûrîkîrwa i werû bwa taûni înu, anene ba nthîgûrû baareeta into biao ku bira birî mwago mûno, birî biewa.

²⁵Na gûtirî ntugû mîîrîga ya taûni înu yaingwa n'ûntû gûku gûtitugaga.

²⁶Na mîgongo yonthe yareeta into bia yo bira birî mwago mûno, birî biewa kwonania gûtîîya kûra baatîîyîîte taûni înu.

²⁷Ûra ateethereetie, kana ûra aarûthaga mantû mara matakenagia Ngai, kana ûra aaragia ûrongo atikîthûngîra gûku. Bara mariîtwa maao maandîkîîtwe îbukuuni rîa mwoyo, ta rîo îbuku rîa Kagondu, i bo bonka baathûngîîre gûku.