Read tharaka KÛGWÛRÎRWA 3 Bible Online

KÛGWÛRÎRWA 3 - tharaka bible

KÛGWÛRÎRWA 3

¹“Na andîkîra mûraîka wa kanica ya Sandis mantû mama.” Mwîre, “Ûra arî na irundu mûgwanja na nthata mûgwanja ariuga ûûgû. Imbiyî bûra ngûgî îra ûrutaga îkari. Antû baugaga ûrî mwoyo îndî ûmma n'atî ûrî ûmûkuû.

²Ûkîîra! Riûkia kîra ûtigeerie mbere ya gîkua buru. Mboneete atî mantû mara ûkûrûtha matiri akubî na bûra Ngai wakwa eendaga kûrûthwa.

³Kwoogu ûtikaariganîrue i bûra weegiirue kuumania na bûra weerirwe. Îrire na ûbwathîkîre. Weegua ûtiirûtha ûgu, nkaaya ta bûra mwamba aayaga. Ûtiimenya nkîîya.

⁴Îndî kûrî antû bamwe baaku baakai naagu Sandis bara bo bataagwatithia nguo ciao rûko. Îgiita rîakinya bakeegua barî amwe naani beekîrîte nguo injerû n'ûntû ibaagîrîte ba mantû ta mamu.

⁵“Ûra akaûmbana ageekîra nguo înjerû ta bo. Riîtwa rîake rîgaakara îbukuuni rîa mwoyo na nkeera Baaba na araîka baake muntû ûyu n'wakwa.

⁶Ûra arî na matû neegue bûra Kîrundu akwîra makanica.

⁷“Na andîkîra mûraîka wa kanica ya Birandebia mantû mama.” Mwîre, “Ûra mûtheru na wa mma, ûra arî na rûcaabi rwa Ndaundi, ûra aarugûra mûrango gûtarî we aûmba gûcuinga kana ainga mûrango gûtarî we aûmba kuurugûra, ariuga ûûgû:

⁸Imbiyî bûra ngûgî îra ûrutaga îkari. Mbere yaku kûrî na mûrango ndugûrîîte, na gûtirî we aûmba gûcuinga. Imbiyî tika ûrî na inya îrî thau îndî amwe na ûgu nûûmbîîte kwathîkîra ûrutani bwakwa na ûtankaana.

⁹Naagu kûrî na gîkundi gîa antû ba Saitaani. Beebîtaga Ayaundi îndî bo t'Ayaundi bongwa, n'arongo. Ngaatûma bagûturîria maru na bamenya inkwendeete.

¹⁰Na n'ûntû nwathîkagîra ûrutani bwakwa ûkarega gûtiga gwîtîgia, ngakûrigîîria ûtikoone kînyamaara kîra kîîyîîte nthîgûrû kûgeria antû.

¹¹Kûûya gwakwa kûrî akubî. Karaga wîrikîîtie wîtîgioni kaingo gûtagîta we atûma waga kîewa.

¹²“Ûra akaûmbana ngaatûma akarage nyomba ya Ngai wakwa arî ta gîtugî kîa iiga. Nkamwandîka riîtwa rîa Ngai wakwa na rîa taûni ya Ngai wakwa, ta yo Njerusaremu înjerû îra îkauma îgûrû kîrî Ngai wakwa na mmwandîke riîtwa rîakwa rîîgeni.

¹³Ûra arî na matû neegue bûra Kîrundu akwîra makanica.

¹⁴“Na andîkîra mûraîka wa kanica ya Raondisia mantû mama.” Mwîre, “Ûra eetagwa ‘Aameni’, ûra arî mwîtîgua na mûkûûyî wa mma, mwanjîîria wa biûmbe bionthe bia Ngai, ariuga ûûgu.

¹⁵Imbiyî bûra ngûgî îra ûrutaga îkari. Ûtirî mwanki na ûtirî mpîo. Îndî mbenda wîgua ûkari bûmwe bwa ûgu!

¹⁶Îndî n'ûntû woû ûrî agu gatîgatî, ûtirî mwanki kana mpîo, ingaagûtuîra nthî, uume kanyua gaakwa.

¹⁷Wîbîîraga, ‘Na mma niû ndî gîtonga, gûtirî kîo ntarî.’ Woû ka ûtaiyî ûrî ûmûthirîre, ûrî wa kwîguîrwa kîao, nkîa, ntûngi na ûrî ûtheri.

¹⁸Ndîkûroria ûgûre kuuma kîrî niû into bibi—thaabu îkembeetue na mwanki kaingo ûtonga, nguo înjerû wîkîre kaingo witha ûtheri bwaku antû batiga kûbuona, na ndawa wîkîre meetho kaingo ûûmba kwona.

¹⁹“Bara mbendeete i bo nkaanagia, nkaboonia mabîtia maao. Kwoogu endaga kûrûtha bûra kwagîrîte na wîrire.

²⁰Na ga ngûkwîra, ndûngi mûrangooni nkîringaringaga. Ûra akeegua kayû gaakwa andugûrîre, nkaathûngîra tûrîyanîre amwe n'we.

²¹“Ûra akaûmbana agaakaranîîra naani gîtîîni gîakwa kîa ûnene, ta bûra na niû ndakaranîîre na Baaba gîtîîni gîake kîa ûnene nkûûmbana.

²²Ûra arî na matû neegue bûra Kîrundu akwîra makanica.”