Read tharaka KÛGWÛRÎRWA 4 Bible Online

KÛGWÛRÎRWA 4 - tharaka bible

KÛGWÛRÎRWA 4

¹Nyuma ya nkwona mantû mamu ndacooka ndoona mûrango ûrugûrîîtwe îgûrû. Kayû wakara kaarîîtie naani mbereeni, kara kaaragia ta karumbeeta, kambîîra, “Ncû naaga îgûrû nkwonie bûra kûthiîte gûkara.”

²Warîo ndaayîîrwa i Kîrundu. Ndaraitha mbere yakwa ndoona gîtî kîa ûnene gûku îgûrû na kûrî we aakarîrîte kîo.

³Ûyu aagîkarîrîte aarî na mwago ta wa twiga twa goro mûno. Aakari ta kaiga geetagwa njacipa kana kangî geetagwa kaneria. Na gîtî gîku kîa ûnene kîathiûrûkîîtwe i mûkûngambura wakengakengaga ta kaiga kangî ka goro geetagwa emerandi.

⁴Na kaîrî gîtî gîku kîathiûrûkîîtwe n'itî bingî bia ûnene mîrongo îîrî na bina. Na wakîra gîtî gîakarîrîtwe i mûkûrû. Akûrû babu mîrongo îîrî na bana beekîrîte nguo injerû na nthûmbî cia ûnene biongo, cia thaabu.

⁵Ndoona gîtî gîku gîkîenia ndweni. Na kuuma kîrî kîo ndeegua gîtuma na mûrurumo wa nkwa. Mbere ya kîo ikwarî na taa mûgwanja ciakanaga, ta cio irundu mûgwanja bia Ngai.

⁶Na agu mbere ya kîo kaîrî, ikwarî na gîntû gîakari ta îria rîayicaga ta kîyici. Ndoona biûmbe bina. Wakîra kîûmbe kîarî rûteere rûmwe rwa gîtî gîku. Biûmbe bibu biarî na meetho mwîrî unthe, mbere na nyuma.

⁷Kîûmbe kîmwe gîakari ta cimba. Kîa biîrî ta kayaû, kîa bithatû kîarî na ûthiû ta bwa muntû, na kîa bina gîakari ta ndiû ibuurûûkîîte.

⁸Na wakîra kîûmbe kîaarî na mathabu mathanthatû na gîakunîkîîtwe i meetho gûntû kunthe. Mûthenya na ûtugû biaugaga: “Mûtheru, mûtheru, mûtheru i Mwathani Ngai mwene inya, We naarî oogo wana tene, atûîre oogo, na agaatûûra mwoyo tene na tene.”

⁹Biûmbe bibu bina biugaga ûgu îgûrû rîa ûra akarîrîte gîtî kîa ûnene îrî njîra ya kûmûkumia, kûmûtîîya na ya kûmûcookeria nkaatho. N'we atûûraga mwoyo tene na tene.

¹⁰Rîra biûmbe bibu biauga ûgu, akûrû bara mîrongo îîrî na bana bagatiirithia moothiû maao nthî mbere ya ûra aakarîrîte gîtî kîa ûnene bakîmûgonga, we ûra atûûraga tene na tene. Baamûgongaga barutîîte nthûmbî biongo mbere ya gîtî kîa ûnene, bakauga,

¹¹“Nwagîrîte ûkumua na ûtîîywa. Na inya yaku îroonekanaga bûra îgana, woû Mwathani Ngai wetû, n'ûntû i woû ûûmbîîte into bionthe. Bionthe biumanîîtie na wendi bwaku na ûbiûmbîîte kûringana na wendi bwaku.”