Read tharaka KÛGWÛRÎRWA 6 Bible Online

KÛGWÛRÎRWA 6 - tharaka bible

KÛGWÛRÎRWA 6

¹Ndoona Kagondu kaarûmûra mûûra wa mbere kîrî îra mûgwanja yarûmanîîrîîtie îbuku. Gakûrûmûra, ndeegua kîûmbe kîmwe kîrî bira bina kîagondoka ta nkwa, kîauga, “Ncû!”

²Ndacûûba ndoona muntû atwete mbaraathi înjerû arî na mîguî na ûta. Ndoona muntû ûyu eekîrwa nthûmbî ya ûnene. Na agwîkîrwa yo aathi gûcinda.

³Kagondu gakûrûmûra mûûra wa îîrî, ndeegua kîûmbe kîa biîrî kîauga, “Ncû!”

⁴Waagu mbaraathi îngî yaumîîra, întuune. Ûra aamîtwete eewa watho bwa kûthiria ûkiri nthîgûrû na bwa gûtûma antû baûraganaga. Aanenkerwa rûyiû rûûnene.

⁵Kagondu gakûrûmûra mûûra wa îthatû, ndeegua kîûmbe kîa bithatû kîauga, “Ncû!” Ngûcûûba ndoona mbaraathi înjirû na muntû amîtwete agwete thatiiri ciîrî na njara.

⁶Na kuuma kîrî biûmbe bibu ndeegua gîntû ta kayû kauga, “Kathimi kaniini tu ka ngano kariuma îrîi rîa ngûgî ya ntugû yonthe. Na tûthimi tûthatû tûniini twa cayiri tûriuma îrîi rîa ngûgî ya ntugû yonthe. Ûtikeenyangie mîceituuni kana mîcabiibû!”

⁷Kagondu gakûrûmûra mûûra wa îna, ndeegua kîûmbe kîa bina kîauga, “Ncû!”

⁸Ngûcûûba ndoona mbaraathi yarî na rangi ya rûbiti. Ûra aamîtwete eetagwa Gîkuû na ûngî eetagwa Nthiko amûrûmarûmîîte nyuma. Beewa watho îgûrû rîa antû gacuncî kamwe ka bina. Beerwe watho bwa kûûraga antû na njîra ya ndûa, mayûûra, ndwari, na nyamû cia kîthaka.

⁹Kagondu gakûrûmûra mûûra wa îtaano, ndoona rungu rwa kîthînjîro mîoyo ya bara baûragîîtwe n'ûntû bwa kiugo kîa Ngai na n'ûntû bwa gûkûûyîîra ûmma.

¹⁰Mîoyo înu yaaria na inya, yauga, “Mûtheru, Mwathani wa mma, i mwanka rî tûgeeteera ûgambithia antû ba nthîgûrû, ûrîie nthakame yetû?”

¹¹Ndoona wakîra mwoyo wanenkerwa rwambambio rûûyerû, yeerwa înogokange yeteere aniini. Yeerirwe înogoke yeteere aruagina na aaragina bara baarutagîra na bo Kîrîstû ngûgî. Yeerirwe ibeeteere baûragwe ta bo, bagane.

¹²Ndacooka ndoona Kagondu gakîrûmûra mûûra wa îthanthatû. Gakûrûmûra, nthîgûrû yainaina mûno. Riûa rîayirûa biri ta îkara, na mweri unthe watuunea tune ta nthakame.

¹³Nthata cia îgûrû ciagwa nthî ta ûgaa bûûkûûrûrûka ruuo rûkîbuutana.

¹⁴Îgûrû rîarima ta bûra maandîko marimaga îbuku rîakûnjwa.[5] Irîma bionthe na icîgîîrio bia îria biakûûrwa ara bitûûraga.

¹⁵Ndoona anene ba nthîgûrû, aathani, anene ba njûûrî, itonga, bara barî îgweta, nkombo na bara bataarî nkombo bonthe beebitha makurunguuni na maigaani ma irîma.

¹⁶Beera irîma na maiga, “Tûgwîreeni. Twitheeni tûtikoonwe n'ûra akarîrîte gîtî kîa ûnene, na tûrigîîrieni mûthûûro wa Kagondu tûtigaakaanûkue!

¹⁷Ntugû îra nene ya kwonania mûthûûro wao îgûkinya na îtiûmîîrîka kinya n'ûû!”