Read tharaka KÛGWÛRÎRWA 8 Bible Online

KÛGWÛRÎRWA 8 - tharaka bible

KÛGWÛRÎRWA 8

¹Kagondu gakûrûmûra mûûra wa mûgwanja, gwakirwa ki gûku îgûrû bantû ta a nucu îthaa.

²Ndoona araîka mûgwanja barûngi mbere ya Ngai. Na wakîra ûmwe wa bo aanenkerwa karumbeeta.

³Ndacooka ndoona mûraîka ûngî aaya aarûngama akubî na kîthînjîro, agwete kabakûri ka thaabu kûra macoco maabîîthagîrua. Ndoona aanenkeerua macoco maingî mûno aruta marî kîgongwana amwe na maromba ma antû bonthe ba Ngai. Mûraîka ûyu aarîkîîra kîgongwana gîku îgûrû rîa kîthînjîro kîa thaabu agu mbere ya gîtî kîa ûnene.

⁴Ntoogo îra yaumaga macocooni mamu yeetia îgûrû kîrî Ngai kuuma njaraani cia mûraîka ûyu yungeene na maromba mamu ma antû ba Ngai.

⁵Mûraîka ûyu akûrûtha ûgu, aarûma mwanki kîthînjîrooni agîîkagîra kabakûriini gaku mwanka kaûyûra. Gakûûyûra, agakanyania nthîgûrû gaûka mpeni, nkwa yagondoka, ndeegua gîtuma kîînene mûno, na nthîgûrû yainaina.

⁶Ndoona araîka babu mûgwanja beethuuranîra kûringa tûrumbeeta.

⁷Mûraîka wa mbere aaringa karumbeeta gaake. Akûringa, mbura ya maiga, mwanki, na nthakame ciaura nthîgûrû. Ikuura nthîgûrû, ciarûngûria kûrû gîcuncî kîmwe kîrî bithatû kîa nthîgûrû, mîtî, na nyaki îmbîthî.

⁸Mûraîka wa baîrî aaringa karumbeeta gaake. Akûringa, ndoona gîntû gîakari ta kîrîma kîînene mûno kîarûkua îriani gîgîakanaga mwanki. Gîntû gîku gîkwarûkua, gîcuncî kîmwe kîa bithatû kîa rûûyî rwa îria rîru rwatuîka nthakame.

⁹Nyamû cia îrîa rîru ciakua gîcuncî kîmwe kîa bithatû, na meeri gîcuncî kîmwe kîrî bithatû cienyangua.

¹⁰Mûraîka wa bathatû aaringa karumbeeta gaake. Akûringa, ndoona nthata înene mûno yarûkua kuuma îgûrû îmûrîkîîte ta tooci, yagwîra miuro na inyaka gîcuncî kîmwe kîa bithatû.

¹¹Nthata înu yeetagwa ‘Gana’. Rûûyî gîcuncî kîmwe kîa bithatû rûra nthata înu yagwîrîîre rwagîa gana. Antû baingî baakua bakûnyua rûûyî rûru rwa gana.

¹²Mûraîka wa bana aaringa karumbeeta gaake. Akûringa, gîcuncî kîmwe kîrî bithatû kîa riûa, mweri, na nthata gîaumpwa, kîagîa mwindu. Gîcuncî kîmwe kîa bithatû kîa mûthenya, kîaga werû. Na gîcuncî kîmwe kîa bithatû gîa ûtugû kîaga gîa kûmûrîka.

¹³Ncûûbîîte woogu, ndoona ndiû îbuurûkîrîte îgûrû mûno. Ndeegua yauga na kayû kaanene mûno, “Irû! Irû! Irû bara batûûraga nthîgûrû. Bûkoona thîîna tûrumbeeta tûra tûtigeere twaringwa n'araîka bara bangî bathatû bathiîte gûtûringa.”