Read tiv Genese 11 Bible Online

Genese 11 - tiv bible

Genese 11

¹Tar cii lu zwa môm, ilyam kpaa môm.

²Zum u ve lu yemen vegher u sha ityoughkitaregh la, ve zua a ijiir i lun gbulumaa ken tar u Shinar, maa ve haa her.

³Tsô ve kaa ayol a ve er: Sé gbidye nen akam, sé sôô nen dedoo. Akam la hingir ve er ka awen, man inya i tiher hingir ve er ka inya i hôron yô.

⁴Ve kaa er: Sé maa nen Zegegar man gôgôyou u taven sha, a̱ za tagher sha Aôndo je, iti yase i̱ za gwa sha won, sé kera samber nen sha tar cii ga.

⁵Tsô TER sen sha u Una nenge gar man gôgôyou u ônov mba iorov ve maan yô.

⁶TER kaa er: Nenge, ve cii, ka nongo môm, zwa ve kpaa ngu môm je; man ka kwagh u ve hii u eren je ne, nahan ma kwagh u ve we ishima u eren yô, una hemba ve ga.

⁷Yô, Sé sen, Sé za nzughul ve zwa, ve̱ de kera ongo kwaghôron u ayol a ve ga.

⁸Nahan TER va num ve heregh, sambe ve sha tar cii wue wue, man ve de u maan zegegar la.

⁹Ka nahan man i yer iti na er Babel ye, gadia ka heregh man Ter nzughul zwa u ior sha won cii ye; ka heregh la kpaa TER sambe ve sha tar cii wue wue ye.

¹⁰Ungun ka tsombor u Shem ne: Shem lu anyom deri man a mar Arpakeshadi ye, zum u mngerem ma deemee bee anyom kar ahar la;

¹¹er a mar Arpakeshadi kera yô, Shem shi seer tsan anyom deri utaan; a shi a mar ônov mba nomso man mba kasev.

¹²Arpakeshadi lu anyom ikundugber kar ataan man a mar Shela ye;

¹³mar Shela kera yô, Arpakeshadi seer tsan anyom deri unyiin kar atar; a shi a mar ônov mba nomso man mba kasev.

¹⁴Shela lu anyom ikundugber man a mar Eber ye;

¹⁵mar Eber kera yô, Shela shi seer tsan anyom deri unyiin kar atar; a shi a mar ônov mba nomso man mba kasev.

¹⁶Eber lu anyom ikundugber kar anyiin man a mar Pelegi ye;

¹⁷mar Pelegi kera yô, Eber shi seer tsan anyom deri unyiin man ikundugber; a shi a mar ônov mba nomso man mba kasev.

¹⁸Pelegi lu anyom ikundugber man a mar Reu ye;

¹⁹mar Reu kera yô, Pelegi shi seer tsan anyom deri uhar kar ataankaranyiin; a shi a mar ônov mba nomso man mba kasev.

²⁰Reu lu anyom ikundugber kar ahar man a mar Serugi ye;

²¹mar Serugi kera yô, Reu shi seer tsan anyom deri uhar kar ataankarahar; a shi a mar ônov mba nomso man mba kasev.

²²Serugi lu anyom ikundugber man a mar Nahor ye;

²³mar Nahor kera yô, Serugi shi seer tsan anyom deri uhar; a shi a mar ônov mba nomso man mba kasev.

²⁴Nahor lu anyom ikundu kar ataankaranyiin man a mar Tera ye;

²⁵mar Tera kera yô, Nahor seer tsan anyom deri man pue kar ataankaranyiin; a shi a mar ônov mba nomso man mba kasev.

²⁶Tera lu anyom akunduatargber man a mar Aberam man Nahor man Haran ye.

²⁷Ungun ka tsombor u Tera ne: Tera mar Aberam man Nahor man Haran; Haran gema mar Loti.

²⁸Haran kpe er ter na Tera lu uma her, ken tar u i mar un la, ka Ur u Mbakaldi je la.

²⁹Kpa Aberam man Nahor er kasev; iti i kwase u Aberam yô, er Sarai; iti i kwase u Nahor yô, er Milka, wan u Haran, ter u Milka man ter u Yiseka kpaa.

³⁰Sarai yô, lu ikômkwase, lu a wan ga.

³¹Tsô Tera kua a wan na Aberam man Loti, wan u wan na Haran, kua Sarai, kwase u wan na Aberam, a mough a ve ken Ur u Mbakaldi, ve gba yemen ken tar u Kanaan; mba za ar hen Haran yô, ve tema heregh.

³²Ayange a Tera yô, lu anyom deri uhar kar ataan; Tera maa kpe ken Haran.