Read tiv Genese 13 Bible Online

Genese 13 - tiv bible

Genese 13

¹Tsô Aberam mough ken Igipiti, gba yemen ken Imbusutariyan vea kwase na kua akaa a a lu a mi cii, man Loti kpaa a na imôngo.

²Aberam lu ornyar, a ngee a uzendenya man azurfa kua zenaria.

³A mough ken Imbusutariyan la, lu tsan gbenda yemen zan zan a za nyôr ken Betel, henpe tenti na lu hiihii, hen harga u Betel vea Ai la;

⁴ka henpe a ta atse a nan nagh sha mi hiihii la; Aberam yila sha iti i TER heregh.

⁵Loti u a za vea Aberam imôngo la kpaa, lu a iyôngo man abua kua utenti kpaa.

⁶Tar la gema yina ve u vea tema ijiir i môm; gadia akaa a ve lu a mi ngee yum, nahan ve kera fatyô u vea lu imôngo ga.

⁷Tsô mbakuranilev mba Aberam man mba Loti mough num ayol a ve. Sha ayange la, Mbakanaan kua Mbaperishi lu ken tar la.

⁸Tsô Aberam kaa a Loti er: Ayôôso a̱ de luun mo a we ga, man hen atô u mbakuranilev av a mba ou kpaa ga, gadia se mba anmgbianev je.

⁹Tar ne cii, u ngu a ian sha mi gaa? Pav a mo kera tsô; wea zaan ken imese yô, mo me za ken iyan; man wea zaan ken iyan yô, mo me za ken imese.

¹⁰Tsô Loti kende ashe, nenge gbulumaa u Yordan cii, lu a mngerem han han kpaa; er TER lu a tim Sodom man Gomora ga la, vegher u zan hen Soar la, lu er sule u TER yô, bee tar u Igipiti.

¹¹Maa Loti tsôr gbulumaa u Yordan la cii; tsô Loti hembe, yem vegher u sha ityoughkitaregh; ve pav ayol a ve.

¹²Aberam yô, tema ken tar u Kanaan; Loti di tema ken uzegembaagarev mba ken gbulumaa la; a kporom a utenti nav za sôsom a Sodom.

¹³Kpa ior i Sodom yô, lu aferaior, lu eren akaabo kpishi sha ishigh ki TER.

¹⁴TER ôr kwagh a Aberam, zum u Loti pav a na la, kaa er: Kende ashe sha yôô; hen ape u lu ne je, gema nenge ken imbusutarimese man iyan man ityoughkitaregh man ityôtar kpaa,

¹⁵gadia tar u, u nengen ne cii, Me na u, u̱ lu u wou kua u tsombor wou, gbem sha won.

¹⁶Man shi Me gema tsombor wou ua hingir er vuulevu u hen inya nahan; aluer or nana fatyô u ôron vuulevu u hen inya yô, ka ape tsombor wou kpaa á ôr u la.

¹⁷Mough, zende tar ne cii, za kighir sha ilihen i u man igbanger i u, gadia nan Yam we u.

¹⁸Tsô Aberam mough a utenti nav yem za tema hen ikon i terebin i Mamre i i lu ken Heberon la. A ta TER atse a nanden nagh sha mi heregh.