Read tiv Genese 14 Bible Online

Genese 14 - tiv bible

Genese 14

¹Tsô sha ayange a Amrafel tor u Shinar, man Arioki tor u Elasar, man Kedor-laomer tor u Elam, man Tidal tor u Goim la,

²ve gba ityav a Ber, tor u Sodom, man Birsha, tor u Gomora, man Shinabi, tor u Adema man Shemeber, tor u Seboim man tor u Bela, ka Soar je la.

³Mban cii zua shin pev u Shidim ka Zegemnger u Bar je la.

⁴Anyom pue kar ahar ve lu sha ikev i Kedor-laomer, kpa sha inyom i sha pue kar utar la, ve mough ahendan.

⁵Sha inyom i sha pue kar unyiin la, Kedor-laomer va a utor mba ve lu a na ityô, ve va hemba Mbarefai ityav ken Asheteroti-Karnaim, man Mbashushi shin Ham, man Mbaemi ken Shave Kiriataim,

⁶man Mbahor hen uwo ve u Seir, zan zan za ar hen El-paran ua lu hen kpe desereti la.

⁷Shi ve hide ve va hen Enmisepati, ka Kadeshi je la; ve hemba tar u Mbaamaleki cii, kua Mbaamor mba ve tema ken Hasason-Tamar la kpaa.

⁸Tsô tor u Sodom man tor u Gomora man tor u Adema man tor u Seboim man tor u Bela, ka Soar je la; ve due ve cinge ityav a ve shin pev u Sidim;

⁹ve gba nôngon ityav a Kedor-laomer tor u Elam, man Tidal tor u Goim, man Amrafel tor u Shinar, man Arioki tor u Elasar; ka utor unyiin lu nôngon a utor utaan ye.

¹⁰Kpa pev u Sidim la mgbough a ahungwa a inya i tiher. Utor mba Sodom man Gomora mba ngur yevese yô, ve za gba shimi; mba ve shi her yô, mase yevese unden sha iwo.

¹¹Nahan ve kura akaa a Sodom man Gomora cii, kua akaayan a ve cii kpaa, ve gba yemen.

¹²Ve kôr Loti, wan u idyondon u Aberam la kpaa, a akaa a na, ve yem a mi; gadia a lu ken Sodom.

¹³Tsô orgen u a war yô, za ôr Aberam Orheberu u a tema hen ikon i terebin i Mamre, Oramor la. Mamre ne lu angbian u Esekol man u Aner la; ve yô, ve lian a Aberam.

¹⁴Zum u Aberam ungwa er i kôr anngô na yô, a mough a ior nav mba fan ityav, mba i mar ve hen ya na yô, ior deri utar man pue kar anigheni, a gba tôvon ve hwange zan zan za ar hen Dan.

¹⁵A pav ior nav tugh, lu un kua mbashiren nav, za ta num sha a ve; a hemba ve, a zenda ve zan zan za ar hen Hoba, u a lu Damaseku vegher u imbusutarimese la.

¹⁶Tsô a hide a akaa la cii; man Loti anngô na a akaa a na kpaa, a hide a mi; man kasev kua ior mbagenev kpaa.

¹⁷Er a lu hiden ken ityav mbi a hemba Kedor-laomer aa utor mba ve lu a na ityô yô, tor u Sodom due va kegh un gbenda shin pev u Shave, ka pev u tor je la.

¹⁸Tsô Melkisedeki tor u Salem za va a bredi man wain, un lu zegepristi u Aôndo Uhembansha.

¹⁹A ver un doo doo, a kaa er: Aôndo Uhembansha A̱ ver Aberam doo doo, u A gbe Sha man tar la;

²⁰I̱ wuese Aôndo Uhembansha, u A ne mbaihomov ou sha ikev you yô. Tsô a tsuwa môm-ken-upue u ken hanma kwagh, a na un.

²¹Nahan tor u Sodom kaa a Aberam er: Nam ior, kpa akaa agen yô, saa a mi tsô.

²²Kpa Aberam kaa a tor u Sodom er: M kende uwegh agh sha, sha TER Aôndo Uhembansha u A gbe Sha man tar,

²³me ngohol gwarmou tsô kpaa ga, shin kwange u akôvough, shin hanma kwagh u a lu u wou cii, sha u de kaan wer: Ka mo, m ne Aberam a hingir ornyar, ga;

²⁴M soo kwagh môm ga, saa di kwagh u mbayev ve ye tsô, man kwar u mba ve ze a mo imôngo, Aner man Esekol man Mamre; ve, ve̱ tôô kwar ve.