Read tiv Genese 15 Bible Online

Genese 15 - tiv bible

Genese 15

¹Ken masetyô u akaa ne yô, mkaanem ma TER va hen Aberam sha mpase u sha mnenge er: De cie ga Aberam, Mo M ngu u perutya, injar you kpaa ia vese kpishi.

²Tsô Aberam kaa er: Ter AÔNDO, ka nyi Ú nama, er m lu yemen, m ver wan ga, nahan or u nana ya dyako u ya wam á lu Elieser, Ordamaseku ne.

³Shi Aberam kaa er: Nenge, U nam tsombor ga, nahan wanye wam u shiren mo, una ya dyako wam.

⁴Tsô mkaanem ma TER va hen a na, kaa er: Or ne una lu or u yan dyako wou ga, saa u ú mar iyol you je, una ya dyako wou ye.

⁵Maa A due a na ken won, A kaa er: Kende ashe sha yôô, ôr iyenge i asan, aluer wea fatyô u ôron yô; shi A kaa a na er: Kape tsombor wou ua lu je la.

⁶A na TER jighjigh, tsô A gema kwagh ne hingir perapera na je.

⁷Shi TER kaa a na er: Ka Mo TER u M dugh a we ken Ur u Mbakaldi sha u nan we tar ne u̱ ya dyako u u yô.

⁸A kaa er: Ter AÔNDO, ka sha nyi man me fa er me ya dyako u u?

⁹A kaa a na er: Vam a tulebua u a kom anyom atar man ngôivo u anyom atar man nomiyôngo u anyom atar man atii kua tuleikungu kpaa.

¹⁰Tsô a va Un a akaa ne cii, a pav ve her atô, a ver vegher ugen ken, vegher ugen ken; kpa inyon yô, a pav i ga.

¹¹Tsô inyon i wan akor sen sha u ia ya inyam la, nahan Aberam hure i kera.

¹²Iyange i gbe been yô, Aberam gba mnyam, yav mem mem; tsô mcieryol u angôghime haa un iyol.

¹³Nahan A kaa a Aberam er: Fa dedoo, tsombor wou ua lu shir ken tar u lu u ve ga yô, ua er tom u ikpan, man á er u ican anyom deri unyiin je;

¹⁴man ikurior i vea er i tom u ikpan la, Me ôr i ijir; ken masetyô yô, vea due a akaa kpishi.

¹⁵Kpa we yô, ú za kohol uter ou bem bem, ú tsa sha won man ú kpe á ii u ye.

¹⁶Kov u sha unyiin la ua shi á hide hen ijiir ne; gadia ibo i Mbaamor ngi a iv ve ga.

¹⁷Tsô er iyange bee, ime wa mgbigh mgbigh yô, nenge, atse a duen mnyim man ikaghusu kar hen atô u avegher a inyam la.

¹⁸Ka sha iyange la man Aôndo ya ikur a Aberam ye. Ka tsombor wou je, Me na u tar ne ye, hii hen ifi u Igipiti zan zan za ar hen zegeifi, ka ifi u Uferati je la:

¹⁹Mbakeni man Mbakenishi man Mbakademoni

²⁰man Mbahiti man Mbaperishi man Mbarefai

²¹man Mbaamor man Mbakanaan man Mbagirgashi kua Mbayebushi kpaa.