Read tiv Genese 18 Bible Online

Genese 18 - tiv bible

Genese 18

¹Tsô TER shi ande her a na hen ikon i terebin i Mamre er a tema hen hunda u tenti na, oo gera gera yô.

²Er a kende ashe sha yô, a nenge iorov utar tile un sha ishi; nengen a ve yô, a mough hen hunda u tenti saghera sha u una za kegh ve gbenda yô. A gure inya a kaa er:

³Terem, aluer a doo u a mo yô, de karen a kar hen wanakiriki wou ze he!

⁴De i̱ va a anmnger, ôô nen angahar a en, mem nen hen itinekon ne;

⁵yô, m̱ va a ankwaghyan, kundu nen asema a mi man né mase yemen ye; man a bee er ne kar hen wanakiriki wen ye. Ve kaa er: Yô, er ase er u kaa nahan.

⁶Tsô Aberaham nyôr ken tenti hen Sara fese, kaa er: Hôr mwem ma kengese, uikaren utar, kaa masa a mi fefa je.

⁷Aberaham kar ayem za hen ikum i abua, za kôr gumbua u dedoo u a lu inyam legh legh yô, na kpan na; ngula bur fefa je.

⁸A tôô atumba a kôrough man a lun alatata kua gumbua u a sôr la, a va ver ve inya; a tile a ve her, hen itinekon la, ve ya.

⁹Ve pine un er: Kwase wou Sara, ngu hana? A kaa er: Ngula ken tenti la.

¹⁰A kaa er: Shi Mea hire her a we kpee, hen shighe ne nahan; man nenge, kwase wou Sara una mar wan. Yô, Sara gema lu sha hunda u tenti ken ijime Na, lu ungwan.

¹¹Aberaham man Sara yô, ve bee iyol, ve tsa sha won; Sara de u duen won.

¹²Tsô Sara gba sen ken ishima na, kaan er: Er m bee iyol kera, terem kpaa a bee iyol, nahan kpaa me shi me mar wana?

¹³Tsô TER kaa a Aberaham er: Ka nyi Sara a sen a kaan er: Er m bee iyol kera, nahan kpaa me shi me mar wana?

¹⁴Ma kwagh u kpilighyol u hemban TER ngu jee? Me hide hen a we sha shighe u i ver la, hen shighe ne nahan, Sara una lu a wan ave.

¹⁵Tsô Sara gba tunan kaan er: M se ga; gadia lu cian. Kpa TER kaa er: Ei, u se.

¹⁶Ior mbala mough heregh, ver ishigh ken Sodom; Aberaham kpaa mough a ve, za ver ve gbenda.

¹⁷Tsô TER kaa er: Me yer Aberaham kwagh u M lu eren ne shinii;

¹⁸er Aberaham a lu hingir ikyurior i vesen i ageegh, man akuraior sha won cii aa zua a iveren ken a na yôô?

¹⁹Gadia M tsuwa un sha er a̱ kaa ônov nav man mba ken ya na ken ijime, ve̱ waan gbenda u TER iko, ve̱ eren perapera man kwagh u a lu vough, sha er TER Una kure Aberaham kwagh u A ôr sha a na la yô.

²⁰TER shi kaa er: Er mliam ma i vaa Sodom man Gomora ma gbe ikôr, man er asorabo a ve a vihi yum yô,

²¹Me hungwa hegen. Me nenge; aluer ieren ve ia kuma sha mliam ma ma nyer her a Mo la yô, Me fa; shin a lu nahan ga kpaa Me fa.

²²Tsô ior mbala undu ijiir la gba yemen ken Sodom, kpa Aberaham tile her sha ishigh ki TER.

²³Nahan Aberaham kporom kaa er: Ú tim orperapera a orifer imôngoo?

²⁴Alaghga mbaperapera vea lu ken gar la akunduahargber, nahan kpaa Ú tim ijiir la, Ú tsegha i sha ci u mbaperapera mba akunduahargber la gaa?

²⁵Tuna u We nahan Ú er injakwagh ne sha u wuan mbaperapera a mbaaferev imôngo, je mbaperapera geman hingir kwagh môm a mbaaferev; kwagh ne tuna U tsô; Orjirigh u tar cii, Una kera er vough gaa?

²⁶Tsô TER kaa er: Aluer Mea zua a mbaperapera akunduahargber ken Sodom yô, Me tsegha ijiir la cii, sha ci ve.

²⁷Aberaham gema kaa er: Nenge, m gbe cihin ôron kwagh a TER tsô, mo u m lu di inya kua mtwem tsô ne;

²⁸alaghga á zua a mbautaan ken mbaperapera akunduahargber la ga, nahan Ú tim gar cii sha ci u mbautaan mba ve lu ga laa? A kaa er: Aluer Mea zua a akunduahar kar utaan ker yô, Me tim un ga.

²⁹A shi a ôr kwagh a Na a kaa er: Alaghga á zua a mi akunduahar keregh. A kaa er: Sha ci u mbaakunduahar mbala yô, Me kera er kwagh la ga.

³⁰A shi a kaa er: TERE, ishima i̱ de vihin We ga, shi me ôr kwagh; alaghga á zua a mi ikundugber keregh. A kaa er: Aluer Mea zua a mi ikundugber ker yô, Me kera er kwagh la ga.

³¹A shi a kaa er: Nenge, m gbe cihin ôron kwagh a TER tsô, alaghga á zua a mi ikundu keregh. A kaa er: Sha ci u mbaikunduv mbala Me tim ga.

³²A shi a kaa er: TERE, ishima i̱ de vihin We ga, me mase ôron kwagh ne môm tsô. Alaghga á zua a mi pue. A kaa er: Sha ci u mbapuev kpaa, Me tim ga.

³³Tsô TER gba yemen, zum u A kure kwaghôron na a Aberaham la. Aberaham kpaa gba hiden hen ijiir na.