Read tiv Genese 2 Bible Online

Genese 2 - tiv bible

Genese 2

¹Nahan i kure u gban Sha man tar, kua akum a ve cii:

²Sha iyange i sha utaankaruhar la, Aôndo kure tom Na u A er yô; sha iyange i sha utaankaruhar la, A mem tom Na u A er cii yô:

³Man Aôndo ver iyange i sha utaankaruhar la doo doo, A tsegha i kpaa; sha ci u lu sha i man Aôndo mem tom Na cii, u A er sha u gban a gba u la ye.

⁴Akaa angan ka mhii u akaa a Sha man a tar zum u i gba a je la. Sha iyange i TER Aôndo er Sha man tar la yô,

⁵ma imendenegh ki ken toho lu a lu sha won ga, ma ihuugh kpaa lu a mende ga, gadia TER Aôndo lu a na ura u nôô sha tar ga, or u kahan sule kpaa lu a lu ga,

⁶saa di irkpiigh tsô, lu gban, ndôhôr tar cii ye.

⁷TER Aôndo maa or sha vuulevu u inyaagh, fehe nan iôôn i uma ken ahenga, or la maa hingir or u uma:

⁸TER Aôndo er sule ken Eden vegher u sha ityoughkitaregh, ver or u A er la keregh.

⁹TER Aôndo er hanma kon u doon u nengen man shi u doon u yan, u mende hen inya; man kon u uma kpaa lu her atô sule, kua kon u mfe u fan kwagh u dedoo man kwagh u bo.

¹⁰Ifi kpaa due ken Eden sha u ndôhôr sule la, ka haala a pav a ta agbaa a anyiin ye.

¹¹Iti i u hiihii la er Pishon; ka un je man a ningir a wa tar u Havila atô, ape zenaria a lu la ye.

¹²Zenaria u tar la ka u doon, man iniôndo i balsem man iwen i oniki kpaa mba ker je.

¹³Iti i ifi u sha uhar la er Gihon; ka un man a ningir tar u Kushi cii a we u atô la.

¹⁴Iti i ifi u sha utar la er Hidekel; ka un a tera sha ishigh ki tar u Ashiria ye. Ifi u sha unyiin la ka Uferati.

¹⁵Tsô TER Aôndo tôô or la ver un ken sule u Eden, sha u a̱ sôron u man a̱ kuran u kpaa.

¹⁶TER Aôndo wa or kwagh kaa er: Hanma kon u ken sule ne, gbaa yan u tsô,

¹⁷kpa kon u mfe u fan kwagh u dedoo man kwagh u bo la, de ye u ga, gadia iyange i ú ya u la, ú kpe je.

¹⁸TER Aôndo gema kaa er: Doo u or nana lu tswen ga; yô, Me er nan orwasen u lun er nan nahan.

¹⁹Ka inya, TER Aôndo er hanma inyamtoho man hanma inyon i sha a mi ye. Tsô A va a mi hen or la er Una nenge er nana yila ve yô; hanma myer u or la a yila hanma kwagh u uma yô, maa hingir iti na je.

²⁰Or la ii uzendenya cii ati kua inyon i sha man inyamtoho kpaa cii; kpa or la yô, zua a or u wasen un, u lun er un nahan ga.

²¹Tsô TER Aôndo haa or la mnyam tsung, a hungul mnyam; A dugh hwan na môm, A hide a inyam A kondo ijiir la.

²²Nahan TER Aôndo gema hwan u A tsuwa hen or la, maa kwase a mi, va a mi hen or la.

²³Or la kaa er: Ngun yô, ka kuhe u ikuhe yam, ka inyam i inyam yam je; nahan a yila un er kwase, sha ci u i dugh un ken nomsoor yô.

²⁴Ka sha ci u nahan man or ka nan undu ter u nan kua ngô u nan, nan var ken kwase u nan, ve hingir iyôgh i môm ye:

²⁵Ve uhar cii ve lu idyelegh, or la vea kwase na, kunya kôr ve ga.