Read tiv Genese 23 Bible Online

Genese 23 - tiv bible

Genese 23

¹Mtse u Sara sha won cii, lu anyom deri man ikundu kar ataankarahar; ka iyenge i anyom a uma u Sara sha won je la.

²Sara kpe ken Kiriati-arba, ka Heberon je la, ken tar u Kanaan; Aberaham nyôr gba zungwen ku u Sara vaan un.

³Tsô Aberaham mough hen ku na la, za ôr kwagh a Mbahiti, kaa er:

⁴Mo m ngu orvannya man shiror hen a ven; yô, nam nen ijiir i iwaregh her a ven, i̱ hingir i yam je, sha u me ii ku wam kera yô.

⁵Tsô Mbahiti gema ôr kwagh a Aberaham, kaa a na er:

⁶Ungwa imo yase, tere; we u ngu ityough ki orough hen vese; yô, ii ku wou shin uwar wase u hemban la; man se kpaa, ma or u nana nyume u uwar u nan, er u̱ de iin ku wou ga yô, nan ngu ga.

⁷Tsô Aberaham mough, gure civir ior mba hen tar la, ka Mbahiti je la.

⁸A shi a ôr kwagh a ve, a kaa er: Aluer a lu ishima yen u m̱ ii ku wam kera yô, ungwa nen imo yam, ôr nen a Eferon wan u Sohar,

⁹a̱ nam bar u Makpela, u a lu a mi, u a lu hen ikighir i tar na la, sha ishe na vough, a̱ hingir u wam, a̱ lum ijiir i iwaregh hen a ven.

¹⁰Eferon kpaa tema lu hen atô u Mbahiti; tsô Eferon Orhiti gema kaa a Aberaham sha ato a Mbahiti, ka mba ve lu karen nyôron sha hundagar na la cii er:

¹¹Nahan ga terem, ungwa imo yam; tiôntar ne m na u, kua bar u a lu heregh la kpaa, m na u; m ngu nan we un sha ishigh ki ior av; ii ku wou.

¹²Tsô Aberaham gure sha ishigh ki ior mba ken tar la.

¹³A ôr kwagh a Eferon kpaa, sha ato a ior mba ken tar la, a kaa er: We kpaa, ma u shi ongo imo yam; me na u inyaregh ki sha ijiir la, ngohol; yô, me ii ku wam her.

¹⁴Eferon gema ôr kwagh a Aberaham, kaa a na er:

¹⁵Terem, ver ato hen mo: Tiôntar u ishe na i kom azurfa ushekel deri unyiin ne, we vea mo yum nahan, ngun gba nyi? Gba iin ku wou tsô.

¹⁶Aberaham ungwa imo i Eferon; nahan Aberaham kar Eferon inyaregh ki a ter sha ato a Mbahiti la, ka azurfa ushekel deri unyiin, ka inyaregh ki i eren kasua a min je la.

¹⁷Nahan tiôntar u Eferon u a lu ken Makpela sha ishigh ki Mamre, tar la, man bar u a lu kimi kua ikon cii, i i lu ken tiôntar la cii kpaa,

¹⁸i na Aberaham hingir kwagh na, sha ishigh ki Mbahiti, sha ashe a mba ve lu karen nyôron sha hundagar na cii.

¹⁹Tsô ken masetyô la, Aberaham ii kwase na Sara ken bar u tiôntar u Makpela sha ishigh ki Mamre, ka Heberon je la, ken tar u Kanaan.

²⁰Tiôntar la man bar u a lu ker la, Mbahiti gema na Aberaham hingir ijiir i iwaregh na jim je.