Read tiv Genese 27 Bible Online

Genese 27 - tiv bible

Genese 27

¹Tsô zum u Isaka bee iyol, ime kpaa wa un ashe, kera nengen ga la, a yila wan na u iunda Isou, a kaa a na er: Wan wam! Un kpaa a rumun er: Mo ne.

²A kaa er: Nenge, m bee iyol, m fa iyange i ku wam ga.

³Nahan yô, shi tôô ikav mbi tohov you, gbande avaan man ada, za ken toho za wua swase,

⁴erem kwaghyan u doon ken zwa, imba i m soo yô, vam a mi, m̱ ya, ishima yam i̱ ver u doo doo, er m lu a kpe ga ne.

⁵Yô, Rebeka lu ungwan er Isaka lu ôron kwagh a wan na Isou yô. Isou yem ken toho u za wuan swase, van a mi.

⁶Nahan Rebeka ôr kwagh a wan na Yakob, kaa er: Nenge, m ungwa teru ngu ôron kwagh a anngôu Isou, kaan er:

⁷Vam a swase, erem kwaghyan u doon mo ken zwa m̱ ya, m̱ ver u doo doo sha ishigh ki TER, er m lu a kpe ga ne.

⁸Hegen yô, wan wam, ungwa imo yam sha kwagh u me wa u ne.

⁹Yô, za hen ikumuile, za vam a anivoov uhar, mba dedoo, m̱ er kwaghyan u doon ken zwa a mi, sha ci u teru, inja i i doon un la;

¹⁰nahan ú gema ú za a mi hen teru, a̱ ya, a̱ ver u doo doo, er a lu a kpe ga ne.

¹¹Yakob kaa a ngô na Rebeka er: Nenge, anngôm Isou ka or u lun a ice iyol, man mo m gema m kôngor iyol.

¹²Alaghga terem una pevem ave iyol, nahan me hingir un or u eren beer sha a na, me gema me haa ifan iyol, á kera lu iveren ga.

¹³Kpa ngô na kaa a na er: Ifan you i̱ hide sha a mo wan wam, gba eren sha imo yam tsô; za, za vam a mi.

¹⁴Tsô a za, a za kôr, a za na ngô na, ngô na er kwaghyan u doon ken zwa, inja i i doon ter na la.

¹⁵Nahan Rebeka tôô uicighanmbaakondov mba wan na u iunda Isou, mba ve lu hen na ken iyou yô, a haa Yakob wan na u kiriki la;

¹⁶shi a tôô akôv a anivoov mbala, a cir un sha akaseaveegh man sha mon;

¹⁷a gema inyam i doon ken zwa kua bredi u a er la, a na wan na Yakob.

¹⁸Tsô a za hen ter na, a kaa er: Tereme! Un kpaa rumun er: Een, ka we ana, wan wama?

¹⁹Yakob kaa a ter na er: Ka mo wan wou u iunda Isou, m er kwagh u u kaam la ve; yô, mough ase, tema sha, ya swase wam ne sha er ú verem doo doo yô.

²⁰Isaka kaa a wan na er: U er nan man u zough a mi fefa nahan, wan wama? A kaa a na er: Ka TER, Aôndo wou, A ne ikôr i diom nahan ye.

²¹Isaka kaa a Yakob er: Shi kporom ase heen, m̱ pev u ave iyol yôô; ka we wan wam Isou mimi je kpa!

²²Nahan Yakob za ikua ikua a ter na Isaka; tsô a pev un ave iyol a kaa er: Imo yô, ka imo i Yakob, kpa ave yô, gema ka ave a Isou.

²³A kav er i lu un ga, sha ci u ave na lu a ice sha mi er ave a anngô na Isou yô; nahan a ver un doo doo.

²⁴Shi a pine er: Ka we wan wam Isou mimi je he? A rumun er: Een, ka mo.

²⁵A kaa er: Kporom a mi ikua ikua, m̱ ya swase u wan wam, sha er m̱ ver u doo doo yô. Tsô a kporom a mi her a na, a ya; shi a va na un wain kpaa, a ma.

²⁶Ter na Isaka kaa a na er: Kporom, susem zwa yôô, wan wama.

²⁷A kporom a suse un zwa; ongo ihuma i dedoo i akondo na yô, a ver un doo doo, a kaa er: Nenge, ihuma i wan wam ngi er ihuma i toho u TER A ver u doo doo yô;

²⁸Aôndo A̱ na u avure a Sha man inya i doon sule i shin tar, man iyiagh kua wain wuee kpaa.

²⁹Ior ve̱ shiren we tom, akuraior kpaa, a̱ gure u inya. Lu ityough sha anmgbianev ou, ônov mba ngôu, ve̱ gure u inya. Hanma or u nana wa u ifan yô, ifan i̱ kôr nan; hanma or u nana ver u doo doo yô nana̱ lu a iveren.

³⁰Tsô zum u Isaka veren Yakob been yô, Yakob mough sha ishigh ki ter na due; hen shighe la je, anngô na Isou maa hidi ikôr va nyer.

³¹Un kpaa, a er kwaghyan u doon ken zwa, a va a mi hen ter na, a kaa a ter na er: Terem a̱ mough, a̱ ya swase u wan na, sha er ú verem doo doo yô.

³²Tsô ter na Isaka, kaa a na er: Ka we ana? A kaa er: Ka mo wan wou u iunda Isou je.

³³Isaka cia sulugha, pine er: Ka an nan woo swase nan va nem m ye cii er u lu a ar ga la, m ver nan doo doo laa? Man iveren la, ia lu i nan kpee je.

³⁴Zum u Isou ungwa kwaghôron u ter na yô, a ngor mliam genger genger sha ishima i vihin je, a kaa a ter na er: Mo kpaa, shi verem doo doo terem!

³⁵A kaa er: Anngôu va ngohol iveren sha icugh kera ve.

³⁶A kaa er: Kera ka nahan man i yer un iti er Yakob ye gaa? Gadia ka kwa har je a mgbeghem kera ne; a ngohol dyako wam u waniunda, man nenge hegen a shi a ngohol iveren yam kpaa. A pine er: U shi shim ma iveren her gaa?

³⁷Isaka gema kaa a Isou er: Nenge, m vande veren un mer, a̱ lu ityough sha a we, m shi m na un anmgbianev nav cii, ve̱ hingir mbashiren un, man m koso un sha uyia kua wain; tsô we yô, me shi me er a we nana, wan wama?

³⁸Isou kaa a ter na er: U ngu a iveren i môm tsô, tereme? Mo kpaa, shi verem doo doo terem! Isou shi ngor mliam gba vaan.

³⁹Ter na Isaka gema kaa a na er: Nenge, ijiir you i teman ia gba ca a inya i doon sule, i shin tar, man a avure a Sha kpaa.

⁴⁰Ka sha sanker wou man ú lu uma ye, ú shiren anngôu kpaa; zum u ú kpoghol iyol yô, ú kende igbur na sha mon wou kera.

⁴¹Nahan Isou kôr Yakob ihom sha ci u iveren i ter na ver un la; man Isou kaa ken ishima na er: Ayange a zungwen ku u terem mgbôghom ve, tsô shighe la me wua anngôm Yakob.

⁴²Er i va pase Rebeka kwaghôron u wan na u iunda Isou la yô, a tindi i za yila Yakob wan na u kiriki, a kaa a na er: Nenge anngôu Isou, ngu cirin we, veren ishima u wuan we.

⁴³Hegen yô, wan wam, ungwa imo yam, mough, yevese yem hen anngôm Laban, ken Haran,

⁴⁴za tema a na ayange kpeghee, zan zan num u anngôu u̱ mem;

⁴⁵zan zan ishima i vihin i anngôu a we i̱ kar kera, kwagh u u er un la a̱ hungul un ve; tsô me tindi i̱ za kua a we keregh; ka nyi man ne uhar cii né va saam kera iyange i mômô?

⁴⁶Rebeka kaa a Isaka er: Nyôrom iyol a ônkasev mba Mbahiti mban. Aluer Yakob una er kwase ken ônkasev mba Mbahiti, inja mban nahan, ken ônkasev mba hen tar ne yô, me shi me lu uma sha won sha ci u nyi?