Read tiv Genese 3 Bible Online

Genese 3 - tiv bible

Genese 3

¹Iyô yô, i hemba inyamtoho i TER Aôndo er la cii atseregh. I kaa a kwase la er: Ka mimi je, Aôndo kaa er, né de ye atam a ma kon u ken sule ne gaa?

²Tsô kwase la gema kaa a iyô la er: Atam a ikon i ken sule ne yô, i rumun er se̱ ya,

³kpa atam a kon u u lu hen atô sule la yô, Aôndo kaa er: De ye nen ga, ave tsô kpaa, de benden nen sha min ga, sha er né kpe ga yô.

⁴Tsô iyô kaa a kwase la er: Né kpe je ga;

⁵gadia Aôndo fa iyange i né ya a la, iyange la ashe aa bugh ne, né hingir er Aôndo nahan, né gba fan kwagh u dedoo man kwagh u bo.

⁶Tsô zum u kwase la nenge er kon la u doo u yan, man shi er u doo ashe kpaa, man u lu kwagh u saren sha u nan or kwaghfan yô, a zôr atam a u, a ya, shi a na nom na, u lu vea na la, un kpaa ya je.

⁷Tsô ve uhar cii ashe a ve bugh, ve kav er ve lu idyelegh yô, nahan ve kor ika i tur, hingir ve akondo a zeren.

⁸Tsô ve ungwa iov i TER Aôndo, er lu zenden ken sule shighe u kundun iyol u aikighe la. Or la vea kwase na maa ve cia TER Aôndo, ve yer ken ikon i ken sule la.

⁹Tsô TER Aôndo yila or la, pine un er: U ngu hana?

¹⁰Un gema kaa er: M ungwa iov You ken sule, nahan cier mo iyol, sha ci u m lu idyelegh yô; maa m yer.

¹¹A pine un er: Ka an nan kaa u er u ngu idyeleghee? U ya kon u yan M ta icin Mer, de ye ga la, zee?

¹²Or la gema kaa er: Kwase u U nem Wer a lu a mo imôngo la, ka un a nem atam a kon la, m ye ye.

¹³Tsô TER Aôndo kaa a kwase la er: Ka nyi kwagh u er nee? Kwase la kaa er: Ka iyô, i tsughum, ve m ye ye.

¹⁴TER Aôndo kaa a iyô er: Er u er nahan yô, u ngu a ifan iyol ken uzendenya cii man inyamtoho cii; ú kpelan a kpela iyav inya, man ú yaan inya gbem sha ayange a ou cii.

¹⁵Me ver ihom hen atô wou vea kwase man hen atô u vor wou a vor na kpaa, u ua cagh u ityough, we di kpaa ú cagh u ikishinguhar

¹⁶Shi A kaa a kwase la er: Me seer we ican tsung sha iyav mbu wan ou, ú maren sha ican je; isharen you ia lu sha nomu, ú lu sha ikev na.

¹⁷Shi A kaa a or la er: Er u ongo imo i kwase wou, u ye atam a kon u iyange M ta u icin Mer, de ye ga la yô, tar u̱ lu a ifan iyol sha ci wou, ka sha ican je man ú ya u, sha ayange a ou cii ye,

¹⁸usaa man usagher vea mende u sha mi; ú yaan akaamenden a ken toho;

¹⁹ka sha iusa i sha ishigh you man ú ya kwaghyan ye, zan zan ú hide hen inya, gadia ka i, i tee, i er u min ye, gadia u ngu vuulevu, nahan ú shi ú hide ú hingir vuulevu.

²⁰Or la gema ii kwase na iti er Ifa, sha ci u un a lu ngô u uuma cii yô.

²¹TER Aôndo er or la vea kwase na, uriga mba akôvough, haa ve.

²²Man TER Aôndo kaa er: Nenge, or hingir er mô Wase nahan, sha u fan kwagh u dedoo man kwagh u bo; hegen yô, a̱ de naregh uwegh a̱ tôôn ityamegh ki kon u uma ne a̱ yaan, a̱ tsôron ga.

²³Tsô TER Aôndo dugh un ken sule u Eden kera, er a̱ kahan inya i i tee, i er un min la.

²⁴Nahan A zenda or la kera, A gema A ver ucerubi hen sule u Eden vegher u sha ityoughkitaregh la, kua sanker u usu u jingir, sha u kuran gbenda u kon u uma la.