Read tiv Genese 31 Bible Online

Genese 31 - tiv bible

Genese 31

¹Tsô a ungwa alam a ônov mba Laban mba nomso, a ve lu kaan er: Yakob ngohol ter wase akaa cii; man ka sha inyaregh ki ter wase je, a hingir ornyar a mi yum ye.

²Yakob kpaa, er a nenge ishigh ki Laban yô, nenge, ki kera lu a na er ngise nahan ga.

³Tsô TER kaa er: Hide ken tar u uter ou, hen ityô you; Mo Me lu a we.

⁴Nahan Yakob tindi i za yila Rahel kua Lea er ve̱ va hen akôngo hen ilev nav;

⁵a kaa a ve er: M nenge ishigh ki ter wen, kera ki a mo er ngise nahan ga; kpa Aôndo u terem gema lu a mo.

⁶Ne ayol a en kpaa, ne fa er m lu eren ter wen tom sha agee am cii yô.

⁷Ter wen nzughul a mo, a gema injar yam acin pue je; kpa Aôndo na un ian i vihin mo kwagh ga.

⁸Ka una kaa er: Mbi amian amian mbi̱ lu injar you yô, nahan ilev cii i gba maren mbi lun amian amian; shi una kaa er: Mbi anger anger mbi̱ lu injar you yô, shi nenge, ilev cii mbi mar mbi lun anger anger.

⁹Kape Aôndo ngohol ilev mbi ter wen gema nam la.

¹⁰Zum u ilev lu keren noov la, m gema ashe ken mnyam ma cien, m nenge ukpev mba ve lu undun ilev cii, ve lu anger anger man amian amian man abeen abeen.

¹¹Ortyom u Aôndo yilam ken mnyam ma cien mala er: Yakob; mo kpaa m rumun mer: Een.

¹²A kaa er: Gema ase ashe, nenge, ukpev mba ve undu ilev cii, ka mba anger anger man amian amian man abeen abeen; gadia M nenge kwagh u Laban a eren a we la cii.

¹³Ka mo, Aôndo u Betel, henpe yan u haa mkurem sha iwen, man u tsegha zwa a Mo la; yô, mough ase, due ken tar ne, hide ken tar u i mar u ker yô.

¹⁴Rahel vea Lea ve gema ve kaa a na er: Shi se mba a ma kwagh shin dyako hen ya u ter wasea?

¹⁵Kera nengen se er se mba un iorvannya tsô gaa? Gadia a tee se a tee je; inyaregh ki sha vese kpaa, a ya cii.

¹⁶Inyaregh ki Aôndo ngohol ter wase la cii yô, ka ki yasegh je, kua ki ônov asev kpaa; nahan hanma kwagh u Aôndo A kaa u yô, er je.

¹⁷Tsô Yakob mough, penda ônov nav kua kasev nav sha urakumi;

¹⁸a kura uzendenya nav cii, man inyaregh nagh ki a kohol, uzendenya nav mba a zua a mi, mba a kohol hen Padan-aram la, sha u una yem hen ter na Isaka, ken tar u Kanaan yô.

¹⁹Er Laban yem sha u za tôndon iyôngo na aive yô, Rahel gema ii ter na terafim.

²⁰Yakob er a Laban Orshiria sha ayom; a kera pase un er i lu un pe yemen nahan ga.

²¹Nahan a yevese a akaa a un lu a mi cii. A mough a per ifi u Uferati, a ver ishigh sha uwo u Gileadi.

²²Sha iyange i sha utar la i za kaa Laban er Yakob a yevese yô.

²³Nahan a mough a anmgbianev nav, a gba tôvon un angahar, kuma zende u ayange ataankarahar je; a za kohol un hen uwo u Gileadi.

²⁴Tsô Aôndo va hen Laban Orshiria la ken mnyam ma cien tugh, kaa a na er: Kura iyol you, de er ma kwagh a Yakob ga, shin a lu u doon shin a lu u bo kpaa ga.

²⁵Tsô Laban va kohol Yakob. Yô Yakob vande timin tenti na hen uwo la kera ve; nahan Laban a anmgbianev nav kpaa tim di mba vev her, hen uwo u Gileadi.

²⁶Tsô Laban kaa a Yakob er: Inja na nan u er a mo sha ayom, u kerem ônov mba kasev er ka mbakwarev mba sha ishôm nahana.

²⁷Er nan u yevese myer u yem her a mo sha ayom nahan; mkaa tsô kpaa, u shi kaam er ma m ne u gbenda a ahan zwa man a atsam man sha genga kua adiguve gaa?

²⁸Mrumun tsô kpaa, u rumun wer, m̱ va suse ônov av mba nomso man mba kasev zwa ga. U er ibumekwagh.

²⁹M ngu a agee a eren ne kwagh u vihin; kpa Aôndo u ter wen, nyen ôr kwagh a mo tugh, kaa er: Kura iyol you, de er ma kwagh a Yakob ga, a lu u doon shin a lu u bo kpaa ga.

³⁰Myem yô, u yem je ve, er ya u teru a sar u yum yô; man ka nyi u gem u iim mbaaôndoo?

³¹Yakob gema kaa a Laban er: Ka sha ci u m lu cian mer, alaghga wea ngohol mo ônov ou mba kasev sha agee.

³²Or u ú zua a mbaaôndo ou her a nan yô, nana kera lu uma ga; ker ase ikav yav sha ashe a anmgbianev asev je, tôô kwagh wou; kpa Yakob fa er i lu Rahel a ii ve ga.

³³Tsô Laban nyôr ken tenti u Yakob man ken tenti u Lea man ken tenti u ikpan i ukase ihiar la, kpa a zua a mi ga. Dugh ken tenti u Lea yô, a kar a za nyôr ken tenti u Rahel kpaa.

³⁴Rahel yô, tôô terafim la wa ken shidi u rakumi, tema sha mi. Laban pev akaa ken tenti wue wue kpa zua a mi ga.

³⁵A kaa a ter na er: Terem a̱ de yugh er m fetyô u moughon tilen sha ishigh you ga ze, gadia gbaaôndo u ukase kôrom. A ker, kpa a zua a terafim la ga.

³⁶Ishima nyoon Yakob, a zôhô a Laban. Yakob gema kaa a Laban er: Ibo yam ngi hana? Ka nyi kwaghbo je m er man u tevem ityô sha kume nahana?

³⁷Er u pev ikav yav cii, nahan yô, ka nyi kwagh i ken ya wou u zough a mini? Due a mi heen sha ashe a anmgbianev av kua a anmgbianev ou kpaa, ve̱ kure se kwagh.

³⁸M tsa a we anyom ikundu je, ungômbaiyôngov ou man ungômbaivoov ou dugh iyav ga, anomaiyôngo ken ikumuile you kpaa, m ya ga.

³⁹Kwagh u inyamikume i woo kpaa, m va na u ga, mo m kimbi a kimbi; kwagh u i ii kpaa, a lu atetan shin a lu tugh kpaa, u va ker her a mo.

⁴⁰Kape m lu la; oo u shiin tan mo tetan; tugh yô, m tsa wuhe; mnyam kpaa ma kôrom ashe ga.

⁴¹Anyom ikundu angan, m lu hen ya wou; m er u tom anyom pue kar anyiin sha ci u ônov ou mba kasev uhar, anyom ataratar kpaa lu sha ci u ilev you; u gemam injar acin pue je.

⁴²Ka er Aôndo u terem, Aôndo u Aberaham man Mcieryol u Isaka lu a mo yô, gayô, mimi je, hegen ma u nem gbenda aveve. Aôndo nenge zayol wam man tom u tsung u ave am, man nyen yange u tugh ye.

⁴³Laban gema kaa a Yakob er: Ônkasev mban, ka mba av; mbayev mban kpaa, ka mba av; ilev mbin kpaa, ka mbi yav; akaa a u nengen a mi ne cii kpaa, ka a am je; ahegen yô, ônov av mba kasev mban kua ônov vev mba ve mar la, me er nan man me er ve kwagha?

⁴⁴Yô, sé ya ikur, mo vea we, i̱ hingir shiada hen atô wase.

⁴⁵Nahan Yakob tôô iwen tim i sha er i̱ lu ikav i umbur.

⁴⁶Tsô Yakob kaa a anmgbianev nav er: Kohol nen awen; nahan ve kura, ve va ta tihi, maa ve ya kwagh heregh.

⁴⁷Laban ii un iti er Yegar-sahaduta; kpa Yakob yô, ii un iti er Galedi.

⁴⁸Laban shi kaa er: Tihi ne ka shiada her atô wam a we nyian; ka nahan man a ii un iti er Galedi

⁴⁹man shi Misepa kpaa ye, gadia a kaa er: TER A̱ kuran her atô wam a we, zum u se kera lu imôngo ga yô.

⁵⁰Aluer ú er ônov av mba kasev ican, shi aluer ú er kasev mbagenev ú seer sha ônov av mban yô, shin or á kera lu a vese ga kpa, nenge, Aôndo ngu orshiada hen atô wam a we.

⁵¹Laban kaa a Yakob er: Nenge tihi awen ne, man iwen i m tim i sha mer i̱ lu ikav i umbur her atô wam a we ne.

⁵²Tihiawen ne a̱ lu shiada, iwen i i tim i sha ne kpaa, i̱ lu shiada, mayange me aver tihiawen ne me za ker a we ga, we di kpaa, ú aver tihiawen ne, man iwen i i tim i sha ne, ú va her a mo a awashima u bo ga.

⁵³Aôndo u Aberaham man Aôndo u Nahor, Aôndo u ter ve, A̱ ôr ijir her atô wase. Nahan Yakob maa bum Mcieryol u ter na Isaka.

⁵⁴Tsô Yakob na nagh ku sôngon sha uwo la, a lôhô anngôôv nav er ve̱ va ya kwagh; ve va ya di je, maa ve tsa hen uwo la.

⁵⁵Nahan Laban mough pepe pepe, suse ônov nav mba nomso kua mba kasev zwa, ver ve doo doo; tsô Laban kôr gbenda ikev, hire ken ya na.