Read tiv Genese 32 Bible Online

Genese 32 - tiv bible

Genese 32

¹Tsô Yakob gba yemen, mbatyomov mba Aôndo va kohol un.

²Yakob nengen a ve yô, a kaa er: Ka ikumior i Aôndo je; a maa a ii ijiir la iti er Mahanaim.

³Yakob tindi mbazan a loho er ve̱ hemen ve̱ vande za nyôron hen anngô na Isou ken tar u Seir, ipaventar u Edom la.

⁴A kaa a ve er: Kaa nen terem Isou nahan ner: Wanakiriki wou Yakob ngu kaan nahan er: M tsa shir hen Laban je m lu ker zan zan nyian;

⁵m ngu a abua man ujaki man akumaiyôngo kua ivo man ikpan i nomso man i ukase; yô, m tindi mer, i̱ za kaa terem, sha u ma i doo u a mo.

⁶Tsô mbazan a loho mbala hide hen Yakob va kaa er: Se za nyôr hen anngôu Isou, ngu van je, u va keghen we gbenda a ior deri unyiin a na ityô.

⁷Nahan cier Yakob iyol kpishi, ishima gba nyian un; ior mba ve lu a na man akumaiyôngo kua ivo man abua kua urakumi kpaa, a pav ve akum ahar;

⁸a hen er: Aluer Isou una va due sha ikum i môm una ta num sha mi yô, ikum i i shi la i̱ war.

⁹Yakob kaa er: Aôndo u terem Aberaham, Aôndo u terem Isaka, TERE, We u U kaa a mo Wer: Hire hen ya wou man hen ityô you, Me ver u doo doo,

¹⁰mo m kuma sha erdoo ne cii, man sha mimi ne cii, u U er a wanakiriki wou ne ga; gadia iyange m peren Yordan ne yô m lu a aga tseegh, man hegen yô, hingir akum ahar je.

¹¹Shi yimam sha ikev i anngôm, sha ikev i Isou; gadia m ngu cian un mer, a̱ de va te num sha a mo, a̱ wuan ngô a ônov ga.

¹²Ka We je, U kaa Wer: Mimi je, Me er a we dedoo, Me gema tsombor wou ua hingir er waarawa u zegemnger u i fetyô u ôron u ga, sha ci u mngee u u yô.

¹³Tsô maa a tsa heregh; akaa a a lu a mi kpaa, a tsuwa kwagh ker u za sughun anngô na Isou a mi;

¹⁴ungômbaivoov deri uhar man ukpev ikundu, ungômbaiyôngov deri uhar man anomaiyôngo ikundu,

¹⁵ungômbaurakumi mba amben atumba ikundugber a ônov vev, ungômbaabuav akunduahar, anomabua pue, anmgbianajaki ikundu man agumajaki pue.

¹⁶A gema a, a na sha ikev i mbatomov, akum akum; a kaa a mbatomov nav er: Hemen nen je, man shi ver nen akum akum a̱ gba angbar.

¹⁷A kaa a u sha hemen la er: Zum u anngôm Isou una kohol we, una pine u er: We u ngu u ana? Man ka han u zee, man akaa a a lu u sha hemen la ka a ana?

¹⁸Nahan kaa wer: Ka a wanakiriki wou Yakob; ka ishughun i i tindi terem Isou a mi yô; nenge, un iyol na kpaa ngu van se ijime je.

¹⁹Shi a kaa a u sha uhar man u sha utar kua mba ve dondo sha akumauile la cii, er: Kape nea kohol Isou ve, kaa nen un la;

²⁰kaa nen ner: Wanakiriki wou Yakob kpaa ngu se ijime je. Gadia a kaa er: Me wam un sha ishughun i i vande hemen la, tsô me mase nengen ishigh nagh, alaghga una rumun mo.

²¹Tsô ishughun la kar vande hemen a na; kpa un iyol na yô, a tsa hen afo tugh mbula.

²²A mough tugh mbula je, a kasev nav uhar, man ikpan na i ukase ihiar, kua ônov nav pue kar môm, a per hen ihongo i Yaboki.

²³A kua a ve, a na ve gbenda er ve̱ per ifi; akaa a un lu a mi cii kpaa, i per a mi.

²⁴Yakob mase lun her tswen; tsô or va nôngo wav a na zan zan sev sôôn aven.

²⁵Man er nan nenge er nan hembe un ga yô, nan gema nan kôr un hen ijuwan i ikooso, nahan ijuwan i ikooso i Yakob maa ndivir er a lu nôngon wav a nan la.

²⁶Nan kaa er: Pasem, gadia sev mbu aven. Kpa a kaa er: Me pase u ga, saa ú verem doo doo ve.

²⁷Nan pine un er: Iti you er ana? A kaa er: Ka mo Yakob.

²⁸Nan kaa er: Á kera yilan we iti er Yakob ga, kpa á yilan we er Iserael, gadia u nôngo wav a Aôndo kua ior, u hemba kpaa.

²⁹Yakob pine un er: Shi kaam iti you. Nan kaa er: Inja na nan man u pin iti yama? Tsô maa nan ver un doo doo hen ijiir la.

³⁰Yakob maa ii ijiir la iti er Peniel; gadia a kaa er: M zua ishigh a Aôndo, nahan kpaa, uma wam war.

³¹Iyange due un shighe u a va kar hen Peniel, a lu keer ikooso la.

³²Kape i lu man Mbaiserael ve kera ye igbela i ikooso, i hen ijuwan i ikooso la ga, zan zan ainge ne, sha ci u nan kôr Yakob hen ijuwan i ikooso, hen ape igbela i ikooso i lu la.